മന്ത്രവാദം ചെയ്യുന്നുവെന്നാരോപിച്ച് 35 കാരിയെ അയല്‍വാസികള്‍ മര്‍ദിച്ച് കൊലപ്പെടുത്തി. കിരണ്‍ ദേവി (35) എന്ന യുവതിയാണ് കൊല്ലപ്പെട്ടത്. ഇവരുടെ ബന്ധുവായ രണ്ട് സ്ത്രീകള്‍ക്ക് സാരമായി പരിക്കേറ്റിട്ടുണ്ട്. ബീഹാറിലെ നവാഡ ജില്ലയിലാണ് ക്രൂരമായ കൊലപാതകം നടന്നത്.

മന്ത്രവാദം ചെയ്യുന്നുണ്ടെന്നും അതുകാരണം തങ്ങളുടെ കുട്ടിക്ക് അസുഖം ബാധിച്ചുവെന്നും ആരോപിച്ചാണ് അയല്‍വാസികള്‍ കിരണ്‍ ദേവിയെ ക്രൂരമായി മര്‍ദിച്ചതെന്നാണ് വിവരം. മുകേഷ് ചൗധരി, മഹേന്ദ്ര ചൗധരി, നത്രു ചൗധരി, ശോഭാ ദേവി എന്നിവരാണ് യുവതിയെ ഇഷ്ടികയും കല്ലും ഇരുമ്പ് ദണ്ഡും ഉപയോഗിച്ച് അതിക്രൂരമായി മര്‍ദിച്ചതെന്നാണ് കിരണ്‍ ദേവിയുടെ ബന്ധു പറയുന്നത്.

നിരന്തരമായ ശാരീരിക പ്രശ്‌നങ്ങള്‍ കാരണം മുകേഷിന്റെ കുട്ടിയെ ഡോക്ടറെ കാണിച്ചിരുന്നു. പരിശോധനയില്‍ കുട്ടിക്ക് തലച്ചോറുമായി ബന്ധപ്പെട്ട അസുഖമാണെന്ന് കണ്ടെത്തി. ഇതോടെ കുട്ടിയുടെ അസുഖത്തിന് കാരണം കിരണ്‍ദേവിയാണെന്ന് കുടുംബം നിരന്തരം കുറ്റപ്പെടുത്തുമായിരുന്നു. കിരണ്‍ ദുര്‍മന്ത്രവാദിയാണെന്നും ദുരാചാരം ചെയ്യുമെന്നുമായിരുന്നു അവരുടെ ആരോപണം. പിന്നാലെ വ്യാഴാഴ്ച അയല്‍വീട്ടുകാര്‍ സംഘം ചേര്‍ന്ന് കിരണ്‍ ദേവിയെ കൊലപ്പെടുത്തി. കിരണിന്റെ വീട്ടുകാര്‍ക്കും മര്‍ദനത്തില്‍ മാരകമായി പരിക്കേറ്റു. ഇവരെ ആശുപത്രിയില്‍ പ്രവേശിപ്പിച്ചു. പ്രതികളെ ചോദ്യം ചെയ്യാനായി കസ്റ്റഡിയിലെടുത്തിട്ടുണ്ട്. ഫോറന്‍സിക് സംഘം തെളിവുകള്‍ ശേഖരിച്ചു. പോസ്റ്റ്‌മോര്‍ട്ടത്തിന് ശേഷം കിരണ്‍ ദേവിയുടെ മൃതദേഹം ബന്ധുക്കള്‍ക്ക് കൈമാറും.