ബസില്‍ ലൈംഗികാതിക്രമ ആരോപണത്തെ തുടര്‍ന്ന് യുവാവ് ജീവനൊടുക്കിയ സംഭവത്തില്‍ നടി സീമ ജി. നായര്‍ പ്രതികരിച്ചു. സ്ത്രീകള്‍ക്ക് അനുകൂലമായ നിയമങ്ങള്‍ ചിലര്‍ സോഷ്യല്‍ മീഡിയയില്‍ പ്രശസ്തി നേടാനായി ദുരുപയോഗം ചെയ്യുന്നുണ്ടെന്ന് അവര്‍ അഭിപ്രായപ്പെട്ടു.

ലൈംഗികാതിക്രമം നടത്തിയെന്നു ചൂണ്ടിക്കാട്ടി സമൂഹമാധ്യമങ്ങളിലൂടെ ദൃശ്യം പ്രചരിച്ചതിനു പിന്നാലെ യുവാവ് ജീവനൊടുക്കിയ സംഭവത്തില്‍ പ്രതികരണവുമായി നടി സീമ ജി നായര്‍. സ്ത്രീകള്‍ക്ക് അനുകൂലമായി നിയമങ്ങള്‍ വന്നതു മുതല്‍ അത് ദുരപയോഗം ചെയ്യുന്ന രീതിയില്‍ പലരും മാറുന്നുവെന്നും അതിനു വേണ്ടി എത്ര കള്ളകഥകള്‍ മെനയാനും മടിയില്ലെന്ന് സോഷ്യല്‍ മീഡിയയില്‍ പങ്കുവച്ച കുറിപ്പില്‍ സീമ പറയുന്നു.

കുറിപ്പിന്റെ പൂര്‍ണരൂപം

ഒരു ഗുഡ് ഈവനിങ്ങ് പോസ്റ്റ് ഇടാമെന്നു കരുതിയാണ് ഇരുന്നത്, അതിനുള്ള മനസ്സായിരുന്നില്ല.. മനസ്സാക്ഷി ഉള്ളവര്‍ക്കാര്‍ക്കും ഈ പെറ്റമ്മയുടെ കരച്ചില്‍ കണ്ടുനില്‍ക്കാനാവില്ല, പ്രായമായ അച്ഛന്റെയും, അമ്മയുടെയും ഏക അത്താണിയായിരുന്നവന്‍.. മുത്തേ നീ ഇല്ലാതെ അമ്മക്ക് എങ്ങനെ ജീവിക്കാന്‍ പറ്റുമെന്ന ആ അമ്മയുടെ വാക്കുകള്‍.. ദൈവമേ ആര്‍ക്കും ഇങ്ങനെ ഗതി വരുത്തല്ലേ.. ഒരിക്കലും കാണാത്ത, കേള്‍ക്കാത്ത, അറിയാത്ത ആളായിട്ടു പോലും ദീപക് ഈ മരണം വല്ലാതെ ഉലക്കുന്നു.. സ്ത്രീകള്‍ക്ക് അനുകൂലമായി ചില നിയമങ്ങള്‍ വന്നതു മുതല്‍ അതിനെ ഏതു രീതിയിലും, മിസ് യൂസ് ചെയ്യാവുന്ന രീതിയില്‍ ഇവിടെ പലരും മാറുന്നു.. അതിനു വേണ്ടി എത്ര കള്ളകഥകള്‍ മെനയാനും മടിയില്ല.. എല്ലാവര്‍ക്കും റീച്ച് കൂട്ടുക, സമൂഹ മാധ്യമങ്ങളില്‍ നിറയുക, റേറ്റിങ് കൂട്ടുക ഇത് മാത്രമേ ഉള്ളു, പെണ്ണൊരുമ്പെട്ടാല്‍ എന്ന് പഴമക്കാര്‍ പറഞ്ഞപ്പോള്‍, നാടിനു തന്നെ ആപത്താകുന്ന രീതിയില്‍ ഇത് മാറുമെന്ന് സ്വപ്നത്തില്‍ പോലും കരുതിയിട്ടില്ല.

പലരും പറയുന്നത് കേട്ടു, ദീപക് പിടിച്ചു നില്‍ക്കണമായിരുന്നു വെന്ന്. എങ്ങനെ പിടിച്ചു നില്‍ക്കും, എങ്ങനെ നേരിടും? വര്‍ഷങ്ങള്‍ കേസിന്റെ പുറകെ പോയി.. നാട്ടിലും, വീട്ടിലും നാണം കെട്ടവനായി എങ്ങനെ ജീവിക്കും, എല്ലാം കലങ്ങി തെളിയുമ്പോള്‍, അവനും കുടുംബവും അനുഭവിക്കാവുന്നതിന്റെ അപ്പുറം അനുഭവിച്ചിട്ടുണ്ടാകും, റീച് കിട്ടാന്‍ വേണ്ടി പെണ്ണെന്നു പറയുന്ന നീ കാണിച്ചു കൂട്ടിയ തെമ്മാടിത്തരത്തിനു നീ അനുഭവിക്കും.. ആ അമ്മയുടെ നെഞ്ച് പിളരുന്ന വാക്കുകള്‍ മനുഷ്യനായി ജനിച്ച ആര്‍ക്കും സഹിക്കാന്‍ കഴിയില്ല.. നാളെ നമ്മുടെ കുടുംബത്തിലും ഇങ്ങനെ സംഭവിക്കാം.. അങ്ങനെ ഒരു ആപത്തു വളര്‍ന്നു വരുവാന്‍ അനുവദിക്കരുത്.. ദീപക് താങ്കള്‍ പെട്ടെന്ന് എല്ലാം ഉപേക്ഷിച്ചു പോകുമ്പോള്‍ ഒരു നിമിഷം നൊന്തു പെറ്റ അമ്മയെയും ആ പാവം അച്ചനെയും ഒന്ന് ഓര്‍ത്തു കൂടായിരുന്നോ?