ചാലയിലെ ജ്വല്ലറിയില് നിന്ന് മോഷണം പോയ സ്വര്ണ്ണം പറമ്പില് കുഴിച്ചിട്ട നിലയില് കണ്ടെത്തി

ചാലയിലെ ജ്വല്ലറിയില് നിന്ന് കവര്ന്ന 2 കിലോയോളം സ്വര്ണത്തില് 146 പവന് വെള്ളായണി ക്ഷേത്രത്തിനു സമീപത്തെ ഒഴിഞ്ഞ പറമ്പില് കുഴിച്ചിട്ട നിലയില് കണ്ടെത്തി. കണക്കില്പ്പെടാത്ത സ്വര്ണമായതിനാല് ഉടമനന്ദകുമാര് പൊലീസിനെ സമീപിക്കില്ലെന്ന പ്രതികളുടെ കണക്കുകൂട്ടല് തെറ്റിയതാണ് അന്വേഷണത്തിലേക്ക് വഴിതെളിച്ചത്. കവര്ച്ചയ്ക്കു ശേഷം തമിഴ്നാട്, കര്ണാടക എന്നിവിടങ്ങളിലൂടെ നീങ്ങിയ പ്രതികള് യാത്രയ്ക്കിടെ സ്വര്ണം വിറ്റതായാണു സൂചന.
പ്രതികളിലൊരാളായ അനൂപാണ് സ്വര്ണം കുഴിച്ചിട്ട സ്ഥലം പൊലീസിന് കാട്ടിക്കൊടുത്തത്. 2 കിലോ സ്വര്ണം നഷ്ടമായെന്ന പരാതി കളവാണെന്നും കഴിഞ്ഞ ദിവസം വയനാട്ടില് കാറില് നിന്നു പിടിച്ചെടുത്ത 450 ഗ്രാം മാത്രമേ കവര്ന്നിട്ടുള്ളു എന്നുമുള്ള പ്രതികളുടെ വാദം കളവാണെന്നു വ്യക്തമായി. വീണ്ടെടുത്ത സ്വര്ണത്തിന്റെ അളവ് ഇതോടെ 202 പവന് ആയി.
കേസിലെ പ്രതികളായ അമോല്, അനില്, അനൂപ് രാജ്, ആന്റണി, ദിലീപ്, ശ്രാവണ് എന്നിവരെ പൊലീസ് ചോദ്യം ചെയ്തപ്പൊഴാണ് സ്വര്ണം കുഴിച്ചിട്ട വിവരം പുറത്തുവന്നത്. നന്ദകുമാറിന്റെ ബിസിനസ് തങ്ങള്ക്ക് വെല്ലുവിളിയായതാണു കവര്ച്ചയ്ക്ക് പ്രേരിപ്പിച്ചതെന്ന് അമോല് പൊലീസിനോടു വെളിപ്പെടുത്തി. പ്രതികളെ 7 ദിവസത്തേക്കാണ് കസ്റ്റഡിയില് ലഭിച്ചിട്ടുള്ളത്. ഗൂഢാലോചനയില് പങ്കുണ്ടെന്നു പൊലീസ് ഉറപ്പിക്കുന്ന മാളവിക ജ്വല്ലറി ഉടമ ജയറാമിനെ സ്റ്റേഷനില് വിളിച്ചുവരുത്തി നോട്ടിസ് നല്കി അയച്ചു. കവര്ച്ചയുടെ പ്രധാന ആസൂത്രകന് ജയറാമാണെന്ന് അനൂപും അമോലും മൊഴി നല്കിയിട്ടുണ്ട്. കൂടുതല് തെളിവുകളുടെ അടിസ്ഥാനത്തില് ജയറാമിന്റെ അറസ്റ്റ് രേഖപ്പെടുത്താനാണു പൊലീസിന്റെ നീക്കം.
https://www.facebook.com/Malayalivartha

























