തിരുവനന്തപുരം ആറ്റിങ്ങലില്‍ സുഹൃത്തുക്കള്‍ക്കൊപ്പം നദിയില്‍ കുളിക്കാനിറങ്ങിയ രണ്ടു വിദ്യാര്‍ഥികള്‍ മുങ്ങി മരിച്ചു. ആറ്റിങ്ങല്‍ കടയ്ക്കാവൂര്‍ ഗ്രാമപഞ്ചായത്തിലെ മേലാറ്റിങ്ങല്‍ ഉദിയറ കുളിക്കടവിലാണ് സംഭവം. കല്ലൂര്‍ക്കോണം ഗവ. ഹൈസ്‌കൂളിലെ പത്താം ക്ലാസ് വിദ്യാര്‍ഥികളായ നിഖില്‍, ഗോകുല്‍ എന്നിവരാണ് മരിച്ചത്.

ഇന്ന് വൈകിട്ടോടെയാണ് സുഹൃത്തുക്കള്‍ നദിയില്‍ കുളിക്കാനിറങ്ങിയത്. കുറച്ചു സമയത്തിന് ശേഷം കൂടെയുണ്ടായിരുന്ന രണ്ടു വിദ്യാര്‍ഥികള്‍ ഓടിവന്ന് മറ്റു രണ്ടുപേരെ കാണാനില്ലെന്ന് നാട്ടുകാരോട് പറയുകയായിരുന്നു. സംഭവം അറിഞ്ഞ് നാട്ടുകാര്‍ സ്ഥലത്തെത്തിയെങ്കിലും വിദ്യാര്‍ഥികളെ കണ്ടെത്താനായില്ല. ഫയര്‍ഫോഴ്‌സെത്തിയാണ് കുട്ടികളെ കണ്ടെത്തിയത്. രണ്ടുപേരെയും പുറത്തെടുത്തെങ്കിലും മരിച്ചിരുന്നു.