ബസില്‍ ലൈംഗികാതിക്രമം നടത്തിയെന്ന തരത്തില്‍ വീഡിയോ പ്രചരിച്ചതിന് പിന്നാലെ ദീപക്കിനെതിരെ യുട്യൂബര്‍ ചെകുത്താന്‍ എന്ന അജു അലക്‌സ്. ദീപക് ജീവനൊടുക്കിയ സംഭവത്തില്‍ പ്രതി ഷിംജിത മുസ്തഫയെ 14 ദിവസത്തേക്ക് കോടതി റിമാന്‍ഡ് ചെയ്തിരുന്നു.

ബസിലെ ഇത്തരം സംഭവങ്ങളുടെ സ്ഥിരം പാറ്റേണാണ് ദീപകും പിന്തുടര്‍ന്നിരിക്കുന്നതെന്നാണ് അജു അലക്‌സ് പറയുന്നത്. അയാള്‍ തട്ടിയിട്ടുണ്ട്. ഒന്നല്ല രണ്ട് പേരെയെങ്കിലും തട്ടിയിട്ടുണ്ട്. അയാളുടെ ബാഗില്‍ എന്താണ് എന്ന് പൊലീസ് പരിശോധിക്കാത്തതെന്താണ്. റീച്ചുണ്ടാക്കാന്‍ ചെയ്തതാണെന്നാണ് നാട്ടുകാര്‍ പറയുന്നത്. റീച്ചുണ്ടാക്കുന്നത് ഇതേ നാട്ടുകാരല്ലേ. ഒരു തിന്മയ്‌ക്കെതിരെ വീഡിയോ ചെയ്താല്‍ റീച്ചുണ്ടാവുന്നത് സ്വാഭാവികമാണ്. ബസില്‍ നടന്ന സംഭവം പൊലീസ് അന്വേഷിക്കുന്ന രീതിയും ശരിയല്ല. വീഡിയോ എടുക്കുന്നതും പബ്ലിഷ് ചെയ്യുന്നതും ഇവിടെ പതിവല്ലേ. ബസില്‍ കയറി പെണ്‍കുട്ടികളുടെ ശരീരത്ത് അനുവാദമില്ലാതെ സ്പര്‍ശിക്കുന്നവരുടെ കയ്യില്‍ ഒരു ബാഗ് കാണും അത് സാധാരണമാണ്. ഷിംജിത ഇവിടെ സാധാരണമായി ചെയ്യുന്ന കാര്യമാണ് ചെയ്തത്. ഒന്നും എക്‌സ്ട്രാ ചെയ്തിട്ടില്ല.

തെറ്റ് ചെയ്തുവെന്ന് ബോധ്യമുള്ളതുകൊണ്ടാണ് ആത്മഹത്യ ചെയ്തതെങ്കിലോ?കുറ്റം ചെയ്തു, നാളെ വാര്‍ത്തയാവും, പൊലീസ് പിടിക്കും എന്ന് ഭയന്നാണ് ദീപക് ആത്മഹത്യ ചെയ്‌തെങ്കിലോ?അപ്പോള്‍ ആ ആത്മഹത്യയ്ക്ക് ഈ സമൂഹത്തിനും ഉത്തരവാദിത്തമില്ലേയെന്നാണ് ചെകുത്താന്‍ വീഡിയോ പ്രതികരണത്തില്‍ ചോദിക്കുന്നത്. വീഡിയോ ശ്രദ്ധിച്ചാല്‍ മനസിലാകും ദീപക് രണ്ട് പെണ്ണുങ്ങളെ തട്ടുന്നുണ്ടെന്നും ബാഗ് എടുക്കുന്നതുപോലെ തട്ടുന്നതാണ് അയാളുടെ പാറ്റേണെന്നും ചെകുത്താന്‍ എന്ന അജു അലക്‌സ് ആരോപിക്കുന്നത്.

നേരത്തെ നടന്‍ മോഹന്‍ലാലിനെതിരെ അപകീര്‍ത്തിപരമായ പരമാര്‍ശം നടത്തിയതിന് അജു അലക്‌സിനെ പൊലീസ് കസ്റ്റഡിയില്‍ എടുത്തിരുന്നു. മോഹന്‍ലാല്‍ പട്ടാള യൂണിഫോമില്‍ വയനാട് ഉരുള്‍പൊട്ടല്‍ സ്ഥലം സന്ദര്‍ശിച്ചതിന് എതിരെയാണ് നേരത്തെ ചെകുത്താന്‍ യൂട്യൂബ് ചാനലിലൂടെ അപകീര്‍ത്തിപ്പെടുത്തി പരാമര്‍ശം നടത്തിയത്.