എടയാറിലെ സി.ജി. ലൂബ്രിക്കന്‍സ് കമ്പനിയില്‍ ഉണ്ടായ തീപിടിത്തത്തില്‍ ഇതര സംസ്ഥാന തൊഴിലാളി ശത്രുഘ്‌നന്‍ മരിച്ച സംഭവത്തില്‍ 15 ലക്ഷം രൂപ നഷ്ടപരിഹാരം നല്‍കാന്‍ തീരുമാനം. നിയമപരമായ മറ്റ് ആനുകൂല്യങ്ങള്‍ ലഭിക്കാനുള്ള നടപടികള്‍ സ്വീകരിക്കുമെന്ന് അധികൃതര്‍ അറിയിച്ചു. പ്രത്യേക അനുമതി വാങ്ങി മൃതദേഹം രാത്രി കളമശേരിയില്‍ സംസ്‌കരിക്കാനും തീരുമാനിച്ചു. അസി. കലക്ടര്‍ പാര്‍വതി ഗോപകുമാര്‍, മരിച്ച ബിഹാര്‍ സ്വദേശി ശത്രുഘ്‌നന്‍ മുഖ്യ(45) യുടെ മകന്‍, നാട്ടുകാരുടെ പ്രതിനിധികള്‍, കമ്പനി ഉടമ, മകന്‍ എന്നിവരാണ് ചര്‍ച്ചയില്‍ പങ്കെടുക്കുന്നത്. കുടുംബത്തിന് 25 ലക്ഷം രൂപയെങ്കിലും നഷ്ടപരിഹാരം നല്‍കണമെന്ന് ആവശ്യപ്പെട്ട് ശത്രുഘ്‌നന്റെ മൃതദേഹവുമായി കുടുംബവും നാട്ടുകാരും മണിക്കൂറുകളോളം റോഡ് ഉപരോധിച്ചതിന് പിന്നാലൈയാണ് ചര്‍ച്ച നടന്നത്. ആറു മണിക്കൂറോളം തുടര്‍ന്ന ചര്‍ച്ചയ്ക്കു ശേഷമാണ് ഒത്തുതീര്‍പ്പിലെത്തിയത്.

എടയാര്‍ വ്യവസായ മേഖലയിലെ സി.ജി. ലൂബ്രിക്കന്‍സ് എന്ന കരിഓയില്‍ സംസ്‌കരണ യൂണിറ്റില്‍ ഇന്നലെയുണ്ടായ തീപിടിത്തത്തിലാണ് ശുത്രുഘ്‌നന്‍ മരിച്ചത്. 22 വര്‍ഷമായി കേരളത്തില്‍ ജീവിക്കുന്നവരായിരുന്നു ശത്രുഘ്‌നനും കുടുംബവും. കുടുംബത്തിന് 5 ലക്ഷം രൂപ നല്‍കാനായിരുന്നു രാവിലെ ജില്ലാ കലക്ടറുടെ നേതൃത്വത്തില്‍ നടന്ന ചര്‍ച്ചയില്‍ തീരുമാനമായത്. കുട്ടികളുടെ പഠനച്ചെലവ് ഏറ്റെടുക്കുന്നതിനും ഭാര്യക്ക് സമ്മതമെങ്കില്‍ തൊഴില്‍ നല്‍കുന്നതിനും ഓയില്‍ കമ്പനി മാനേജ്‌മെന്റിന് നിര്‍ദേശം നല്‍കിയതായും കലക്ടര്‍ വ്യക്തമാക്കിയിരുന്നു. ഇതുകൂടാതെ നിയമപ്രകാരമുള്ള എല്ലാ അനുകൂലങ്ങളും നഷ്ടപരിഹാരങ്ങളും കുടുംബത്തിന് ലഭ്യമാക്കാനുള്ള നടപടികള്‍ സ്വീകരിക്കുമെന്നും ഓയില്‍ കമ്പനിയുടെ ഭാഗത്തുനിന്ന് വീഴ്ചകള്‍ ഉണ്ടായിട്ടുണ്ടോ എന്ന് അന്വേഷിക്കാന്‍ പോലീസിന് നിര്‍ദേശം നല്‍കിയിട്ടുണ്ടെന്നും കലക്ടര്‍ പറഞ്ഞു. പ്രഥമദൃഷ്ട്യാ കമ്പനിയുടെ ഭാഗത്തുനിന്ന് വീഴ്ച ഉണ്ടായിട്ടുണ്ട് എന്നാണ് മനസ്സിലാക്കുന്നതെന്നും കലക്ടര്‍ വ്യക്തമാക്കിയിരുന്നു.

എന്നാല്‍ ഭാര്യയും 3 കുട്ടികളും അമ്മയും അടങ്ങുന്ന ശത്രുഘ്‌നന്റെ കുടുംബത്തിന് ഇതുകൊണ്ടു ജീവിക്കാന്‍ കഴിയില്ലെന്നും 25 ലക്ഷം രൂപ നഷ്ടപരിഹാരം നല്‍കണമെന്ന ആവശ്യവുമായി നാട്ടുകാര്‍ രംഗത്തെത്തി. എന്നാല്‍ കമ്പനി ഉടമ ഇതിനോട് അനുകൂലിച്ചില്ല. ഇതോടെ മൃതദേഹവുമായി റോഡ് നാട്ടുകാര്‍ റോഡ് ഉപരോധിക്കുകയായിരുന്നു. തന്റെ പിതാവിന്റെ മരണത്തിന് കമ്പനിയാണ് ഉത്തരവാദിയെന്ന് ശതുഘ്‌നന്റെ മകന്‍ പറഞ്ഞു. എന്നാല്‍ ഇതര സംസ്ഥാനക്കാരെന്ന പേരില്‍ തങ്ങളെ ഒഴിവാക്കാനാണ് ശ്രമമമെന്നും ഇവര്‍ ആരോപിച്ചു.

ശത്രുഘ്‌നന്റെ മൃതദേഹം പോസ്റ്റുമോര്‍ട്ടത്തിന് ശേഷം രാവിലെ ബന്ധുക്കള്‍ക്ക് വിട്ടു നല്‍കിയിരുന്നു. കളമശേരിയില്‍ തന്നെ സംസ്‌കരിക്കാനായിരുന്നു തീരുമാനം. എന്നാല്‍ പിന്നീട് പ്രതിഷേധം രൂക്ഷമാവുകയായിരുന്നു. വ്യാഴാഴ്ച രാവിലെ 9 മണിയോടെയാണ് കമ്പനിക്കുള്ളില്‍ തീപിടുത്തമുണ്ടായത്. ഈ സമയം കമ്പനിക്കുള്ളിലുണ്ടായിരുന്ന തൊഴിലാളികള്‍ പുറത്തേക്ക് ഓടി രക്ഷപെട്ടു. എന്നാല്‍ വാല്‍വ് ഓഫാക്കാനായി അകത്തേക്ക് കയറിയ ശത്രുഘ്‌നന്‍ അഗ്‌നിബാധയില്‍ കുടുങ്ങുകയായിരുന്നു. ഭാവിയില്‍ അപകടങ്ങള്‍ ഒഴിവാക്കുന്നതിനായി അടുത്ത 10 ദിവസത്തിനുള്ളില്‍ ജില്ലയിലെ ഇത്തരത്തിലുള്ള സ്ഥാപനങ്ങളില്‍ ബന്ധപ്പെട്ട വകുപ്പുകള്‍ സംയുക്ത പരിശോധന നടത്തുമെന്ന് ജില്ലാ കലക്ടര്‍ വ്യക്തമാക്കിയിട്ടുണ്ട്.