നിയമസഭാ തിരഞ്ഞെടുപ്പിന്റെ ആവേശം കൊടുമുടിയിലെത്തിച്ച് കേന്ദ്രസഹമന്ത്രി സുരേഷ് ഗോപി മുഖ്യമന്ത്രി പിണറായി വിജയന്റെ ജന്മനാടായ പിണറായിയില് വന് ജനസാഗരത്തെ സാക്ഷിയാക്കി റോഡ് ഷോ
നിയമസഭാ തിരഞ്ഞെടുപ്പിന്റെ ആവേശം കൊടുമുടിയിലെത്തിച്ച് കേന്ദ്രസഹമന്ത്രി സുരേഷ് ഗോപി മുഖ്യമന്ത്രി പിണറായി വിജയന്റെ ജന്മനാടായ പിണറായിയില് വന് ജനസാഗരത്തെ സാക്ഷിയാക്കി റോഡ് ഷോ നടത്തി. ധര്മ്മടം മണ്ഡലത്തിലെ എന്ഡിഎ സ്ഥാനാര്ത്ഥി കെ. രഞ്ചിത്തിന്റെ പ്രചാരണത്തിനായി വ്യാഴാഴ്ച ഉച്ചയ്ക്ക് 12.30-ഓടെ പിണറായി പാണ്ട്യാല മുക്കില് നിന്നാണ് റോഡ് ഷോ ആരംഭിച്ചത്.
പ്രത്യേകം സജ്ജമാക്കിയ തുറന്ന വാഹനത്തില് സുരേഷ് ഗോപി എത്തിയതോടെ പ്രവര്ത്തകര് ആവേശത്തിലായി. ബാന്ഡ് വാദ്യങ്ങളും വര്ണ്ണക്കുടകളും വാദ്യമേളങ്ങളുമായി നടന്ന പ്രകടനം പിണറായി ടൗണിലെ പെട്രോള് പമ്പ് പരിസരത്താണ് സമാപിച്ചത്. പാതയോരങ്ങളില് തടിച്ചുകൂടിയ നൂറുകണക്കിന് ജനങ്ങളെ കൈവീശി കാണിച്ചും വോട്ടഭ്യര്ത്ഥിച്ചുമാണ് സുരേഷ് ഗോപി മുന്നോട്ട് നീങ്ങിയത്.
രമിത്തിന്റെ വസതിയില് വികാരാധീനനായി മന്ത്രി
റോഡ് ഷോയ്ക്ക് ശേഷം സുരേഷ് ഗോപി, കൊല്ലപ്പെട്ട ബിജെപി പ്രവര്ത്തകന് രമിത്തിന്റെ വസതി സന്ദര്ശിച്ചു. രമിത്തിന്റെ അമ്മയെ നേരില് കണ്ട് ആശ്വസിപ്പിച്ച ശേഷമാണ് അദ്ദേഹം മടങ്ങിയത്. കണ്ണൂര് വിമാനത്താവളം വഴി റോഡ് മാര്ഗ്ഗമാണ് അദ്ദേഹം പിണറായിയിലെത്തിയത്.
തലശ്ശേരിയിലും ഇരമ്പിക്കയറി ജനക്കൂട്ടം
പിണറായിയിലെ പരിപാടികള്ക്ക് ശേഷം വൈകിട്ട് മൂന്ന് മണിയോടെ തലശ്ശേരി മണ്ഡലം സ്ഥാനാര്ത്ഥി ഒ. നിധീഷിന്റെ പ്രചാരണത്തിനായി സുരേഷ് ഗോപി തലശ്ശേരി നഗരത്തിലെത്തി. വാടിക്കല് രാമകൃഷ്ണ മന്ദിരം പരിസരം മുതല് പുതിയ ബസ് സ്റ്റാന്ഡ് വരെ നടന്ന റോഡ് ഷോയിലും വന് ജനപങ്കാളിത്തമാണ് ദൃശ്യമായത്. സ്ഥാനാര്ത്ഥി ഒ. നിധീഷിനൊപ്പം നൂറുകണക്കിന് പ്രവര്ത്തകരും റോഡ് ഷോയെ അനുഗമിച്ചു.
കഴിഞ്ഞ ദിവസം ബിജെപി ദേശീയ അധ്യക്ഷന് നിധിന് നബീന് മട്ടന്നൂരില് നടത്തിയ റോഡ് ഷോയ്ക്ക് പിന്നാലെ സുരേഷ് ഗോപി കൂടി എത്തിയത് കണ്ണൂര് ജില്ലയില് എന്ഡിഎ ക്യാമ്പുകളില് വലിയ ആവേശം സൃഷ്ടിച്ചിട്ടുണ്ട്. മുഖ്യമന്ത്രിയുടെ സ്വന്തം മണ്ഡലമായ ധര്മ്മടത്തും തൊട്ടടുത്ത മണ്ഡലങ്ങളിലും ശക്തമായ സാന്നിധ്യമറിയിക്കാനാണ് ഇതിലൂടെ എന്ഡിഎ ലക്ഷ്യമിടുന്നത്.
https://www.facebook.com/Malayalivartha
