വാടാനപ്പള്ളിയിലെ ബിജെപി കിറ്റ് ആരോപണത്തില് പ്രതികരിച്ച് സുരേഷ് ഗോപി
തൃശ്ശൂര് വാടാനപ്പള്ളിയില് ബിജെപിക്കെതിരായ കിറ്റ് വിവാദത്തില് പ്രതികരിച്ച് കേന്ദ്രമന്ത്രി സുരേഷ് ഗോപി. കിറ്റ് ആരോപണത്തില് സത്യമില്ലെന്നും സത്യം ഇല്ലാത്തതുകൊണ്ടാണ് പൊലീസ് കേസെടുക്കാത്തതെന്നും സുരേഷ് ഗോപി പ്രതികരിച്ചു. നിങ്ങള് കുറേ പേരെ ലക്ഷ്യം വയ്ക്കുന്നുവെന്ന് ആരോപിച്ച സുരോഷ് ഗോപി, എന്നെ കുറെനാള് കേസിന്റെ പേരില് നടത്തിയതല്ലേ എന്നും ചോദിച്ചു. തെരഞ്ഞെടുപ്പിന് മൂന്ന് ദിവസം മാത്രം ശേഷിക്കെ തൃശ്ശൂരില് കത്തിക്കയറി ബിജെപിക്കെതിരായ കിറ്റ് വിവാദം. വാടാനപ്പള്ളിയിലെ ഹോള്സെയില് വിതരണ സ്ഥാപനത്തില് കിറ്റുകള് ഓര്ഡര് ചെയ്യാനായി ബിജെപി നേതാവും ചലച്ചിത്ര താരവുമായ ദേവന് എത്തിയെന്ന് ആരോപിച്ചാണ് കോണ്ഗ്രസ് പ്രവര്ത്തകര് പ്രതിഷേധം ഉയര്ത്തിയത്.
ദേവനും, ബിജെപിയുടെ മുന് ബ്ലോക്ക് പഞ്ചായത്ത് അംഗം ബഗീഷ് പൂരാടനുമാണ് കിറ്റുകള് ഓര്ഡര് ചെയ്തതെന്നും ഇരുവരും സ്ഥാപനത്തിന് മുകളിലെ വീട്ടില് ഒളിച്ചിരിക്കുന്നുവെന്നും കോണ്ഗ്രസും സിപിഎമ്മും ആരോപിച്ചു. സ്ഥലത്ത് ബിജെപി പ്രവര്ത്തകര് കൂടി തടിച്ചു കൂടിയതോടെ സംഘര്ഷം മണിക്കൂറോളം നീണ്ടു. സംഭവത്തില് വാടാനപ്പള്ളിയിലെ ഹോള്സെയില് വിതരണ സ്ഥാപനം ചാമ്പ്യന്സ് ട്രേഡേഴ്സ് ഉടമ പ്രവീണിനെ പൊലീസ് കസ്റ്റഡിയില് എടുത്തിട്ടുണ്ട്. പ്രവീണിന്റെ മൊഴിയനുസരിച്ച് കിറ്റ് ഓര്ഡര് ചെയ്ത വാടാനപ്പള്ളി സ്വദേശിയായ സതീഷ് എന്ന ബിജെപി പ്രവര്ത്തകനെ പൊലീസ് കസ്റ്റഡിയില് എടുത്തിട്ടുണ്ട്. വിഷുവിന് വിതരണം ചെയ്യാനായി തയ്യാറാക്കിയ കിറ്റ് എന്നാണ് സതീഷ് പൊലീസിന് നല്കിയ മൊഴി.
ഗോഡൗണില് പ്രവേശിക്കുന്നതായി സിസിടിവി ദൃശ്യങ്ങളില് ഇല്ലാത്തതുകൊണ്ട് ദേവനെ കസ്റ്റഡിയിലെടുക്കാന് ആവില്ലെന്ന് പോലീസ് അറിയിച്ചതോടെ ടി എന് പ്രതാപനടക്കമുള്ള കോണ്ഗ്രസ് പ്രവര്ത്തകര് റോഡില് കുത്തിയിരുന്ന് പ്രതിഷേധിച്ചു. ഒടുവില് പൊലീസുമായി ബലപ്രയോഗം, പിന്നാലെ പ്രതിഷേധക്കാരെ അറസ്റ്റ് ചെയ്ത് നീക്കി. ടി എന് പ്രതാപന് തയ്യാറാക്കിയ നാടകം എന്നായിരുന്നു വിഷയത്തില് ദേവന്റെ പ്രതികരണം. പരാജയഭീതി മൂലം ടി എന് പ്രതാപന് തയ്യാറാക്കിയ നാടകമെന്ന് ദേവന് തിരിച്ചടിച്ചു.
https://www.facebook.com/Malayalivartha
