പാമ്പുകളെ അകറ്റാന് മുന്കരുതല് സ്വീകരിക്കണമെന്ന് വാവ സുരേഷ്
പാമ്പുകടിയേറ്റ് കുട്ടികളുള്പ്പെടെ മരിക്കുന്ന പശ്ചാത്തലത്തില്, പൊതുജനങ്ങള് അതീവ ജാഗ്രത പുലര്ത്തണമെന്ന് സ്നേക്ക് മാസ്റ്റര് വാവ സുരേഷിന്റെ മുന്നറിയിപ്പ് . സന്ധ്യാസമയത്ത് മുന്വാതിലോ പിന്വാതിലോ തുറന്നിടുന്ന ശീലം പലര്ക്കുമുണ്ട്. ഈ സമയത്താണ് പാമ്പുകള് മിക്കപ്പോഴും അകത്ത് കയറുന്നത്. വാതിലുകള് അശ്രദ്ധമായി തുറന്നിടരുത്. സിങ്ക്, ബാത്റൂം, വാഷിംഗ് മെഷീന് എന്നിവയുടെ വേസ്റ്റ് പൈപ്പുകള് പോകുന്ന ഭാഗങ്ങളിലെ വിടവുകള് എംസീലോ മറ്റോ ഉപയോഗിച്ച് അടയ്ക്കണം.
താമരയോ ആമ്പലോ വളര്ത്തുന്ന വലിയ ചെടിച്ചട്ടികള് വീടിനോട് ചേര്ന്ന് തറയില് വയ്ക്കുന്നത് അപകടമാണ്. പാമ്പുകള് ഈ തണുപ്പുള്ള ഭാഗത്തേക്ക് എത്താന് സാദ്ധ്യതയുണ്ട്. ചെടിച്ചട്ടികള് വിടവുള്ള സിമന്റ് കട്ടകള്ക്കോ ഇഷ്ടികകള്ക്കോ മുകളില് വയ്ക്കാതെ സ്റ്റാന്ഡുകളില് ഉയര്ത്തി വയ്ക്കാന് ശ്രദ്ധിക്കണം. പക്ഷികള്ക്കും മൃഗങ്ങള്ക്കും മറ്റും വെള്ളം വയ്ക്കുന്നത് തറനിരപ്പില് ആകരുത്. ഉയരത്തില് വയ്ക്കുക.
തറയില് പായയോ ബെഡ്ഷീറ്റോ വിരിച്ച് കിടന്നുറങ്ങുന്നത് അപകടകരമാണ്. ഉറക്കത്തില് ചെറിയ പാമ്പുകള് കടിച്ചാല് പെട്ടെന്ന് വേദന അറിയില്ലെങ്കിലും മണിക്കൂറുകള് കഴിയുമ്പോള് ജീവന് ഭീഷണിയാകും. കട്ടില് ഭിത്തിയോടോ ജനലിനോടോ ചേര്ത്തിടരുത്. വിരികള് നിലത്ത് മുട്ടി കിടക്കരുത്. രാത്രിയില് പുറത്തിറങ്ങുമ്പോള് ദൂരേക്ക് വെളിച്ചം കിട്ടുന്ന ടോര്ച്ച് ഉപയോഗിക്കണം.
തെങ്ങിന് തോലുകള്, ചപ്പിലകള്, ഓടിന് കഷ്ണങ്ങള്, ഇഷ്ടികകള്, തെങ്ങിന് തൊണ്ട് എന്നിവ കൂട്ടിയിടുന്നത് ഒഴിവാക്കണം. തൊഴിലുറപ്പ് ജോലിക്കിടെ ചപ്പിലകള് കൈകൊണ്ട് വാരാതെ മുപ്പല്ലിയോ മറ്റോ ഉപയോഗിക്കണം. ഗംബൂട്ട് സുരക്ഷിതമായിരിക്കും.
പാമ്പുകടിയേറ്റ ആളിന് ധൈര്യം നല്കുകയും ഒരിടത്ത് ഇരുത്തുകയും വേണം. നടക്കാനോ ഓടാനോ പാടില്ല. ഇത് രക്തചംക്രമണം വര്ദ്ധിപ്പിക്കും. കടിയേറ്റ ഭാഗം മുറിക്കാനോ, വായ കൊണ്ട് വിഷം വലിച്ചെടുക്കാനോ ശ്രമിക്കരുത്. മുറിവിന് പത്ത് ഇഞ്ച് മുകളിലായി തുണി ഉപയോഗിച്ച് അധികം മുറുക്കാതെ കെട്ടണം (രണ്ട് വിരല് കടക്കാന് പാകത്തിന് വിടവ് വേണം). കടിയേറ്റ ആളെ തോളിലേറ്റിയോ കൈയില് പിടിച്ചോ കൊണ്ടുപോകണം, കുലുക്കം തട്ടുന്ന ടൂ വീലറുകള് ഒഴിവാക്കുക. വെന്റിലേറ്റര് സൗകര്യവുമുള്ള വലിയ ആശുപത്രികളില് വേഗം എത്തിക്കണം.
https://www.facebook.com/Malayalivartha
