കോഴിക്കോട് ഓടിക്കൊണ്ടിരുന്ന കാറിന് തീപിടിച്ചു. രണ്ട് കുട്ടികള്‍ ഉള്‍പ്പടെ കാറിലുണ്ടായിരുന്ന ആറു പേരും അത്ഭുതകരമായി രക്ഷപ്പെട്ടു. കള്ളിപ്പാറയ്ക്കും പീടികപ്പാറയ്ക്കും ഇടയില്‍ ഇന്ന് ഉച്ചയോടെയായിരുന്നു അപകടം.

തിരുവമ്പാടി കക്കാടംപൊയില്‍ റൂട്ടില്‍ ഓടിക്കൊണ്ടിരുന്ന കാറില്‍ നിന്ന് പുക ഉയരുന്നത് കണ്ട് മറ്റ് വാഹനങ്ങളില്‍ പോയവര്‍ സൂചന നല്‍കുകയായിരുന്നു. ഉടന്‍തന്നെ കാര്‍ നിര്‍ത്തി യാത്രക്കാര്‍ പുറത്തിറങ്ങിയത് രക്ഷയായി. വളരെപെട്ടെന്ന് കാറില്‍ പൂര്‍ണമായും തീപടരുകയായിരുന്നു. മുക്കത്ത് നിന്ന് രണ്ട് യൂണിറ്റ് ഫയര്‍ഫോഴ്‌സ് സംഘം എത്തിയാണ് തീ അണച്ചത്. തീപടര്‍ന്നതിനുപിന്നാലെ റോഡിലെ ഗതാഗതം തടസപ്പെട്ടു. തീയണച്ചഷശേഷം വാഹനം റോഡില്‍ നിന്ന് മാറ്റിയതോടെയാണ് ഗതാഗതം സാധാരണ നിലയിലായത്. തീപിടിത്തത്തിന്റെ കാരണം വ്യക്തമല്ലെന്നാണ് വിവരം.