ഒന്നരവയസ്സുകാരനെ ക്രൂരമായി മർദ്ദിച്ചു കൊലപ്പെടുത്തിയ ഒന്നാം പ്രതി അഷ്കറിനെതിരെ സ്വന്തം കുടുംബം തന്നെ പരസ്യമായി രംഗത്തുവന്ന വിവരങ്ങൾ പോലീസ് കോടതിയെ ധരിപ്പിച്ചു. അഷ്കർ കുഞ്ഞിനെ നിരന്തരം ക്രൂരമായ ശാരീരിക ഉപദ്രവങ്ങൾക്ക് ഇരയാക്കാറുണ്ടായിരുന്നു എന്ന് ഇയാളുടെ അമ്മയും സഹോദരിയും പോലീസിന് മൊഴി നൽകിയിട്ടുണ്ട്. ഈ നിർണായക വിവരങ്ങൾ പോലീസ് കോടതിയിൽ സമർപ്പിച്ച കസ്റ്റഡി അപേക്ഷയിൽ പ്രത്യേകം ചൂണ്ടിക്കാണിച്ചിട്ടുണ്ട്. പ്രതികളെ രണ്ടുദിവസത്തേക്ക് പൊലീസ് കസ്റ്റഡിയിൽ വിട്ടു. കേസിലെ പ്രതികളായ വളർത്തച്ഛൻ അഷ്കർ, അമ്മ അഖില എന്നിവരെയാണ് കസ്റ്റഡിയിൽ വിട്ടത്. കൂടുതൽ ചോദ്യം ചെയ്യണമെന്ന പൊലീസിൻ്റെ പ്രത്യേക ആവശ്യം അം​ഗീകരിച്ചാണ് കോടതി പ്രതികളെ കസ്റ്റഡിയിൽ വിട്ടത്. കുഞ്ഞിനെ മർദ്ദിച്ച വസ്തുക്കൾ കണ്ടെത്തണമെന്നും കൂടുതൽ ചോദ്യം ചെയ്യൽ കേസിൽ അനിവാര്യമാണെന്നും പൊലീസ് കോടതിയെ ബോധിപ്പിച്ചിരുന്നു.