കുറച്ച് ലൈക്കും ഷെയർ ഉം കിട്ടാൻ എന്തും ചെയ്യാൻ മടിയില്ലാത്ത കുറെ ഇൻഫ്ലുവൻസർമാർ ഉണ്ട്. പലരും അപകട നിറഞ്ഞ വീഡിയോകൾ ഇടുന്നതും കണ്ടിട്ടുണ്ട്. ഇപ്പോഴിതാ അത്തരത്തിലൊരു സംഭവമാണ് ഒരു ചെറുപ്പക്കാരന്റെ ജീവൻ എടുത്തിരിക്കുന്നത് . ലാഹോർ സമൂഹമാധ്യമങ്ങളിൽ വൈറലാകാൻ നടത്തിയ വീഡിയോ ചിത്രീകരണം യുവാവിന്റെ ജീവനെടുത്തു. പാകിസ്ഥാനിലെ ലാഹോറിന് സമീപം സ്വകാര്യ ഫാംഹൗസിൽ ടിക് ടോക്ക് വീഡിയോ ചിത്രീകരിക്കുന്നതിനിടെ കടുവയുടെ ആക്രമണത്തിൽ 19കാരൻ കൊല്ലപ്പെട്ടു.

സംഭവത്തിൽ ഫാംഹൗസ് ഉടമയെയും ടിക് ടോക്ക് കണ്ടന്റ് ക്രിയേറ്ററെയും പോലീസ് അറസ്റ്റ് ചെയ്തു.ലാഹോറിലെ കഹ്ന മേഖലയിലുള്ള സ്വകാര്യ ഫാംഹൗസിലാണ് സംഭവം. ഫാംഹൗസിൽ ജോലി ചെയ്തിരുന്ന തൽഹ എന്ന യുവാവാണ് കൊല്ലപ്പെട്ടത്. ടിക് ടോക്ക് കണ്ടന്റ് ക്രിയേറ്ററായ നൗമാൻ ഹസന്റെ ആവശ്യപ്രകാരം കൂട്ടിൽനിന്ന് പുറത്തുകൊണ്ടുവന്ന പെൺകടുവയാണ് യുവാവിനെ ആക്രമിച്ചത്. ഗുരുതരമായി പരിക്കേറ്റ തൽഹയെ ഉടൻ ആശുപത്രിയിൽ എത്തിച്ചെങ്കിലും ചികിത്സയ്‌ക്കിടെ മരണം സംഭവിക്കുകയായിരുന്നു.

സംഭവവുമായി ബന്ധപ്പെട്ട് ഫാംഹൗസ് ഉടമ ഫയാസ്, ടിക് ടോക്ക് ക്രിയേറ്റർ നൗമാൻ ഹസൻ എന്നിവരെയാണ് പോലീസ് അറസ്റ്റ് ചെയ്തത്. ഫാംഹൗസിലെ ബ്രീഡിങ് കേന്ദ്രത്തിലാണ് കടുവയെ പാർപ്പിച്ചിരുന്നത്. ഫാംഹൗസിൽ കടുവയെ വളർത്തുന്നതിന് ആവശ്യമായ നിയമാനുമതി ഉണ്ടായിരുന്നോയെന്നും സുരക്ഷാ ക്രമീകരണങ്ങൾ പാലിച്ചിരുന്നോയെന്നും പോലീസ് പരിശോധിക്കുന്നുണ്ട്.അപകടകരമായ രീതിയിൽ കടുവകളോടും പുലികളോടും ഇടപഴകുന്ന വീഡിയോകൾ പങ്കുവയ്‌ക്കുന്നതിലൂടെ ശ്രദ്ധ നേടിയ വ്യക്തിയാണ് നൗമാൻ ഹസൻ.

ചങ്ങലയിൽ ബന്ധിച്ച കടുവയെ ചുംബിക്കാൻ ശ്രമിക്കുന്ന ദൃശ്യങ്ങൾ ഇയാൾ നേരത്തെ ഇൻസ്റ്റഗ്രാമിൽ പങ്കുവച്ചിരുന്നു. മറ്റൊരു വീഡിയോയിൽ തലോടുന്നതിനിടെ പുലി ഇയാൾക്കുനേരെ ചാടുകയും നഖംകൊണ്ട് പരിക്കേൽപ്പിക്കുകയും ചെയ്തിരുന്നു.സംഭവത്തിൽ ആദ്യം പൊലീസിന് നൽകിയ വിശദീകരണത്തിൽ തൽഹയെ ആക്രമിച്ചത് നായയാണെന്നാണ് നൗമാൻ ഹസൻ അവകാശപ്പെട്ടത്. എന്നാൽ അന്വേഷണത്തിൽ കടുവയുടെ ആക്രമണത്തിലാണ് യുവാവ് കൊല്ലപ്പെട്ടതെന്ന് വ്യക്തമായി. ഇതോടെയാണ് ഇൻഫ്ലുവൻസറെയും ഫാം ഉടമയെയും പൊലീസ് അറസ്റ്റ് ചെയ്തത്.

“ടിക് ടോക് ഭ്രമം മനുഷ്യജീവനേക്കാൾ വലുതല്ല. വിനോദത്തിന്റെ പേരിൽ മനുഷ്യജീവൻ അപകടത്തിലാക്കാൻ ആരെയും അനുവദിക്കില്ല. സത്യാവസ്ഥ മറച്ചുവെക്കാൻ ശ്രമിച്ചതും സുരക്ഷാ വീഴ്ചകളും ഉൾപ്പെടെ എല്ലാ വശങ്ങളും അന്വേഷിക്കും,” ലാഹോർ പൊലീസ് വ്യക്തമാക്കി.