സലിം കുമാറിന്റെ നിര്യാണത്തിൽ അനുശോചനം രേഖപ്പെടുത്തി കെപിസിസി പ്രസിഡന്റ് സണ്ണി ജോസഫ് . തനത് ശൈലിയിലുള്ള അഭിനയം കൊണ്ട് മലയാള സിനിമയില്‍ തന്റേതായ ഒരിടം നേടിയെടുത്ത പ്രതിഭാധനനായ കലാകാരനായിരുന്നു സലിം കുമാറെന്ന് സണ്ണി ജോസഫ് പറഞ്ഞു .

കലാകാരന്‍ എന്നതിലുപരി, ഇന്ത്യന്‍ നാഷണല്‍ കോണ്‍ഗ്രസിന്റെ ആശയ ആദര്‍ശങ്ങളെ ചേര്‍ത്തുപിടിച്ച് പ്രതിസന്ധി ഘട്ടങ്ങളില്‍ പാര്‍ട്ടിയോടൊപ്പം നിന്ന വ്യക്തി. രാഷ്ട്രീയം പറയാന്‍ മടിക്കുന്ന സിനിമാ ലോകത്ത് നിന്ന് താന്‍ ഒരു കോണ്‍ഗ്രസുകാരനാണെന്ന് തുറന്ന് പറഞ്ഞ് ആര്‍ജവത്തോടെ മുന്നോട്ട് വന്ന കലാകാരന്‍. മലയാളികളുടെ ഹൃദയം കീഴടക്കിയ ആ ശബ്ദം നിശബ്ദമായാലും, അദ്ദേഹം സമ്മാനിച്ച കഥാപാത്രങ്ങള്‍ക്കും അതിന്റെ ഓര്‍മ്മകള്‍ക്കും മരണമുണ്ടാകില്ല.

പച്ചയായ ജീവിതാനുഭവങ്ങളെ അഭിനയിച്ച് പ്രതിഫലിപ്പിക്കാന്‍ അദ്ദേഹത്തിന് കഴിഞ്ഞിരുന്നത് കഥാപാത്രത്തെ പക്വതയോടെ ഉള്‍ക്കൊള്ളാനുള്ള കഴിവാണ്. അഭിനയം കൊണ്ട് വിസ്മയം തീര്‍ത്ത ശേഷമാണ് അദ്ദേഹത്തിന്റെ മടക്കം. സലിം കുമാറിന്റെ വേര്‍പാട് ചലച്ചിത്ര മേഖലയ്ക്കും വലിയ നഷ്ടമാണ്. അദ്ദേഹത്തിന്റെ വേര്‍പാടില്‍ വേദനിക്കുന്ന കുടുംബത്തിന്റെയും സഹപ്രവര്‍ത്തകരുടെയും കലാസ്നേഹികളുടെയും ദുഃഖത്തില്‍ പങ്കുചേരുന്നുവെന്നും സണ്ണി ജോസഫ് പറഞ്ഞു.