ഭാര്യയെ കൊല്ലാന്‍ ക്വട്ടേഷന്‍ നല്‍കിയ സംഭവത്തില്‍ ഭര്‍ത്താവും സുഹൃത്തായ പത്തൊമ്പതുകാരനും അറസ്റ്റില്‍. ചേര്‍പ്പ് തണ്ടാശ്ശേരി ഷിബു ജോര്‍ജ് (50), വിഷ്ണു (19) എന്നിവരാണ് അറസ്റ്റിലായത്. ഷിബു ഭാര്യയെ കൊല്ലാന്‍ അഗതിമന്ദിരത്തിലായിരുന്ന ഭര്‍ത്താവ് തന്റെ സഹവാസിയായ വിഷ്ണുവിന് ക്വട്ടേഷന്‍ നല്‍കുകയായിരുന്നു.

വര്‍ഷങ്ങള്‍ക്ക് മുന്‍പ് കെട്ടിടത്തില്‍നിന്ന് വീണ് അരയ്ക്ക് താഴെ തളര്‍ന്ന ഷിബു ഭാര്യയുമായുള്ള തര്‍ക്കത്തെ തുടര്‍ന്നാണ് അഗതിമന്ദിരത്തില്‍ എത്തിയത്. ഭാര്യ ഇപ്പോഴും ഷിബുവിന്റെ വീട്ടിലാണ് താമസം. ഭാര്യ ഇയാള്‍ക്കെതിരെ സ്ത്രീപീഡന പരാതി നല്‍കിയിരുന്നു. ഇതാണ് ഷിബുവിനെ പ്രകോപിപ്പിച്ചത്. ഷിബുവിനെ പരിചരിച്ചാണ് വിഷ്ണു സൗഹൃദത്തിലാകുന്നത്.

ഷിബുവിന്റെ നിര്‍ദേശപ്രകാരം വടിവാളുമായി ചേര്‍പ്പ് പള്ളിക്ക് സമീപം കാത്തുനിന്ന വിഷ്ണുവിനെ കണ്ട് സംശയം തോന്നിയ നാട്ടുകാര്‍ പൊലീസിനെ വിവരം അറിയിക്കുകയായിരുന്നു. തുടര്‍ന്ന് സ്ഥലത്തെത്തിയ പൊലീസ് വിഷ്ണുവിനെ പിടികൂടി. ചോദ്യംചെയ്യലില്‍ ഷിബു ജോര്‍ജിന്റെ ഭാര്യയെ കൊല്ലാന്‍ പദ്ധതിയിട്ടാണ് എത്തിയതെന്ന് ഇയാള്‍ സമ്മതിച്ചു.

ഷിബുവിന്റെ പേരില്‍ ഭാര്യ പരാതി നല്‍കിയതിലുള്ള വൈരാഗ്യമാണ് ക്വട്ടേഷന്‍ നല്‍കാന്‍ പ്രേരിപ്പിച്ചതെന്ന് പൊലീസ് പറയുന്നു. സംഭവത്തില്‍ അറസ്റ്റിലായ രണ്ടുപേരെയും കോടതി റിമാന്‍ഡ് ചെയ്തു.