ഡിഎച്ച്എസ് ആയി തുടരാമെന്ന ട്രൈബ്യൂണല്‍ ഉത്തരവുമായി കഴിഞ്ഞ രണ്ടു ദിവസങ്ങളിലും ഡോ. കെജെ റീന തിരുവനന്തപുരത്തെ ഡയറക്ടറേറ്റ് ഓഫീസില്‍ എത്തിയെങ്കിലും അവര്‍ക്ക് ഔദ്യോഗിക ചുമതല നിര്‍വ്വഹിക്കാന്‍ കഴിഞ്ഞിരുന്നില്ല. ഡോക്ടര്‍ റീന ഓഫീസില്‍ എത്തുന്നതിനും മുന്‍പ് തന്നെ, സര്‍ക്കാര്‍ താല്ക്കാലിക ചുമതല നല്‍കിയ ഡോ. വി. മീനാക്ഷി ഡയറക്ടറുടെ കസേരയില്‍ സ്ഥാനം പിടിക്കുന്നതായിരുന്നു ഇതിന് പ്രധാന കാരണം.

തന്റെ സീനിയോറിറ്റി പൂര്‍ണ്ണമായി മറികടന്ന് എറണാകുളം പബ്ലിക് ഹെല്‍ത്ത് ലബോറട്ടറി ഡയറക്ടറായി തരംതാഴ്ത്തി ചട്ടവിരുദ്ധമായി സ്ഥലംമാറ്റിയ സര്‍ക്കാരിന്റെ കടുംവെട്ടിനെതിരെയാണ് ഡോ റീന അഡ്മിനിസ്‌ട്രേറ്റീവ് ട്രൈബ്യൂണലിനെ സമീപിച്ചത്. കേസില്‍ രണ്ടാഴ്ച കൂടി ഡിഎച്ച്എസ് സ്ഥാനത്ത് തുടരാന്‍ ട്രൈബ്യൂണല്‍ ഇവര്‍ക്ക് അനുമതി നല്‍കുകയായിരുന്നു. പകര്‍ച്ചവ്യാധി പടരുന്ന ഗുരുതരമായ സാഹചര്യത്തില്‍ ഡിഎച്ച്എസ് പതിനഞ്ച് ദിവസം അവധിയെടുത്തു എന്ന വ്യാജ ആരോപണം ഉന്നയിച്ച് തന്നെ പരസ്യമായി അപമാനിക്കാന്‍ ആരോഗ്യവകുപ്പ് ശ്രമിച്ചുവെന്നത് ഉള്‍പ്പെടെയുള്ള ഗുരുതരമായ വാദങ്ങളാണ് ഡോ. റീന ട്രൈബ്യൂണലില്‍ ഉന്നയിച്ചത്.

ഇതോടൊപ്പം സ്‌പെഷ്യല്‍ റൂള്‍ അനുസരിച്ച് ഡിഎച്ച്എസ് നിയമനത്തിന് യാതൊരുവിധ സമയപരിധിയും നിശ്ചയിച്ചിട്ടില്ലെന്നും, വകുപ്പ് തലത്തില്‍ അഡീഷണല്‍ ചീഫ് സെക്രട്ടറി ഒപ്പിടേണ്ട അതീവ നിര്‍ണ്ണായകമായ ഒരു സ്ഥലംമാറ്റ ഉത്തരവ് തയാറാക്കിയിരിക്കുന്നത് ചട്ടങ്ങള്‍ ലംഘിച്ച് ജോയിന്റ് സെക്രട്ടറിയാണെന്നുമുള്ള ഡോ. റീനയുടെ വാദങ്ങള്‍ പൂര്‍ണ്ണമായി അംഗീകരിച്ചാണ് ട്രൈബ്യൂണല്‍ സര്‍ക്കാരിന്റെ സ്ഥലംമാറ്റ ഉത്തരവ് സ്‌റ്റേ ചെയ്തത്.