വിജയ് സര്‍ക്കാരിനെ തകര്‍ക്കാന്‍ 'പ്രോജക്ട് മേഘാലയ' എന്ന പേരിലുള്ള അട്ടിമറി ശ്രമത്തില്‍ അന്വേഷണം ഊര്‍ജിതമാക്കി ചെന്നൈ പൊലീസ്. തമിഴക വെട്രി കഴകം പാര്‍ട്ടിയുടെ എംഎല്‍എമാര്‍ക്ക് കോഴ നല്‍കി വിജയ് സര്‍ക്കാരിനെ താഴെയിറക്കാനുള്ള ഗൂഢാലേചന നടത്തിയെന്ന ആരോപണം നേരത്തേ ഉയര്‍ന്നിരുന്നു. സംഭവത്തില്‍ പ്രമുഖ മാദ്ധ്യമപ്രവര്‍ത്തകനായ വിജയനെ ചോദ്യംചെയ്യുകയും ഒമ്പതുപേരെ അറസ്റ്റ് ചെയ്യുകയും ചെയ്തിരുന്നു. വിജയ് സര്‍ക്കാരിനെ അട്ടിമറിക്കാന്‍ ഏകദേശം 15 ടിവികെ എംഎല്‍എമാര്‍ക്ക് പണം വാഗ്ദാനം ചെയ്‌യാന്‍ പദ്ധതിയിട്ടതായി പൊലീസ് അന്വേഷണത്തില്‍ വ്യക്തമായി. തിരുനാവുക്കരശാണ് ഗൂഢാലോചനയിലെ പ്രധാനി.

സര്‍ക്കാരിനെ അസ്ഥിരപ്പെടുത്താന്‍ നടത്തിയ ഗൂഢാലോചനയില്‍ പങ്കുണ്ടെന്ന് സംശയിക്കുന്ന ഡിഎംകെ നേതാക്കള്‍ക്കും പൊലീസ് നോട്ടീസ് അയച്ചിട്ടുണ്ട്. എന്നാല്‍, രാഷ്ട്രീയ നേട്ടത്തിനായി നടത്തുന്ന വ്യാജ ആരോപണങ്ങളാണെന്ന് ചൂണ്ടിക്കാട്ടി പ്രതിപക്ഷം ഇതിനെ തള്ളിയിരിക്കുകയാണ്.

നിയമസഭാ നടപടികള്‍ക്കിടെ പാര്‍ട്ടി നിലപാടിന് വിരുദ്ധമായി വോട്ട് ചെയ്യാന്‍ യൂട്യൂബര്‍ തിരുനാവുക്കരശും മറ്റുള്ളവരും തനിക്ക് 35 കോടി രൂപ വാഗ്ദാനം ചെയ്തുവെന്നാരോപിച്ച് ടിവികെ ഉത്തരംഗരൈ എംഎല്‍എ എന്‍ ഇളയരാജ നല്‍കിയ പരാതിയിലാണ് കേസിന്റെ തുടക്കം. ഈ വാഗ്ദാനം നിരസിച്ചതിനെത്തുടര്‍ന്ന് തനിക്കും കുടുംബത്തിനും നേരെ ഭീഷണിയുണ്ടായതായും അദ്ദേഹം ആരോപിച്ചു.