അനസ്‌തേഷ്യ നല്‍കിയതിന് പിന്നാലെ ഒന്നര വയസുകാരന്‍ ദേവാന്‍ഷ് ശൗര്യ മരിച്ച സംഭവത്തില്‍ പയ്യന്നൂര്‍ ബേബി മെമ്മോറിയല്‍ ആശുപത്രിയിലെ ഡോക്ടര്‍മാര്‍ക്ക് ഗുരുതര വീഴ്ചയുണ്ടായതായി വിദഗ്ദ്ധ സമിതി വിലയിരുത്തല്‍. ജനറല്‍ അനസ്‌തേഷ്യ നല്‍കിയുള്ള ശസ്ത്രക്രിയയുടെ ആവശ്യം ഇല്ലായിരുന്നുവെന്നും കുട്ടിയുടെ ചുണ്ടിലും താടിയിലുമുള്ളത് ആഴത്തിലുള്ള മുറിവുകള്‍ അല്ലായിരുന്നുവെന്നും റിപ്പോര്‍ട്ടില്‍ പറഞ്ഞിട്ടുണ്ട്. ആശുപത്രിയിലെത്തി ആദ്യ ആറ് മണിക്കൂറോളം സമയം കുഞ്ഞിന് ചികിത്സയൊന്നും നല്‍കിയിരുന്നില്ല. അതിനാല്‍, മുറിവില്‍ വലിയ രീതിയിലുള്ള രക്തസ്രാവം ഉണ്ടായിട്ടില്ലെന്ന് വ്യക്തമാണ്. ഇത്രയും ചെറിയ പരിക്കിന് ജനറല്‍ അനസ്‌തേഷ്യ വേണ്ടെന്നാണ് സമിതിയുടെ വിലയിരുത്തല്‍. ആനാവശ്യ ചികിത്സയ്ക്കാണ് ഡോക്ടര്‍മാര്‍ ശുപാര്‍ശ ചെയ്തത്.

ജനറല്‍ അനസ്‌തേഷ്യ കാരണം അപകടമുണ്ടായാല്‍ അതിനെ മറികടക്കാനുള്ള സൗകര്യം ആശുപത്രിയില്‍ വേണമായിരുന്നു. ആ സൗകര്യം ഇല്ലെങ്കില്‍ അനസ്‌തേഷ്യ കൊടുക്കേണ്ട കാര്യമുണ്ടായിരുന്നോ എന്നും ജില്ലാ ഗവണ്‍മെന്റ് പ്ലീഡര്‍ അഡ്വ. കെ അജിത് കുമാര്‍ ചോദിച്ചു. ആശുപത്രിയില്‍ ഇതിനുള്ള സൗകര്യമില്ലെന്ന് കണ്ടെത്തിയതായും അദ്ദേഹം പറഞ്ഞു.

ആറ് മണിക്കൂറാകുമ്പോള്‍ മുറിവ് സുഖപ്പെട്ട് തുടങ്ങുമെന്ന് വ്യക്തമായിരിക്കെ ചെറിയ മുറിവിന് പ്ലാസ്റ്റിക് സര്‍ജറി ചെയ്യേണ്ടതില്ല. അനസ്‌തേഷ്യ നല്‍കി ചികിത്സിക്കാന്‍ മറ്റുചില താല്‍പ്പര്യങ്ങള്‍ ഉണ്ടോയെന്ന് സംശയിച്ചാല്‍ തെറ്റ് പറയാന്‍ കഴിയില്ല. ഇങ്ങനെ ഒരു ചികിത്സാ പ്രോട്ടോക്കോള്‍ ഡോക്ടര്‍മാര്‍ക്ക് കൊടുത്തത് ആരാണെന്ന് കൂടി കണ്ടെത്തണം. രണ്ട് ദിവസത്തിനകം റിപ്പോര്‍ട്ട് പൊലീസിന് കൈമാറുമെന്നും അജിത് കുമാര്‍ വ്യക്തമാക്കി. ജനറല്‍ അനസ്‌തേഷ്യ നല്‍കിയതിനെത്തുടര്‍ന്ന് തലച്ചോറില്‍ ആവശ്യത്തിന് ഓക്‌സിജന്‍ കിട്ടാത്തതാണ് മരണകാരണമെന്നാണ് കുട്ടിയുടെ പോസ്റ്റ്‌മോര്‍ട്ടം റിപ്പോര്‍ട്ടിലും പരാമര്‍ശിച്ചിരിക്കുന്നത്.