വാണിയംകുളത്തില്‍നിന്നും 7 ദിവസം മുമ്പ് കാണാതായ കുടുംബം കര്‍ണാടകയിലുണ്ടെന്ന് കണ്ടെത്തി. വാണിയംകുളം കൃഷ്ണകൃപയില്‍ ബാബു ഭാസ്‌കര്‍ (68), ഭാര്യ രമാദേവി (65), മകന്‍ വിഷ്ണു (32) എന്നിവരെയാണ് കണ്ടെത്തിയത്. ബന്ധുക്കള്‍ പരാതിയുമായി എത്തിയതോടെയാണ് പൊലീസ് അന്വേഷണം ആരംഭിച്ചത്. എന്നാല്‍ നാടുവിടാനുള്ള കാരണം ഇനിയും വ്യക്തമല്ല. കര്‍ണാടകയിലെ ചാമരാജ് നഗറില്‍ നിന്നാണ് കണ്ടെത്തിയത്. സാമ്പത്തിക ബാധ്യതകാരണമാണ് നാട് വിട്ട് പോയതെന്നാണ് സൂചന.

ശര്‍ക്കര വ്യാപാരിയായ ബാബു ഭാസ്‌കറിനും മകനും മൈസൂരുവില്‍ ബന്ധങ്ങളുണ്ട്. തുടര്‍ന്ന് പൊലീസിന്റെ പ്രത്യേക അന്വേഷണസംഘം കര്‍ണാടകയിലും പഴുതടച്ച തിരച്ചിലാണ് നടത്തിയത്. അടിമുടി ദുരൂഹതകള്‍ നിറഞ്ഞ തിരോധാനം ഏറെ വാര്‍ത്താ പ്രാധാന്യം നേടിയിരുന്നു. പ്രധാനമായും സിസിടിവി ദൃശ്യങ്ങള്‍ കേന്ദ്രീകരിച്ചാണ് പൊലീസ് അന്വേഷണം നടത്തിയത്. ഇവര്‍ സഞ്ചരിച്ച വാഹനം വഴിക്കടവ് ചുരത്തില്‍ ഉപേക്ഷിച്ച നിലയില്‍ കണ്ടെത്തിയിരുന്നു.

ആസൂത്രിതമായി തീരുമാനമെടുത്താണ് കുടുംബം പോയതെന്ന് വ്യക്തമായിരുന്നു. പാലും പത്രവും ഉള്‍പ്പെടെ വിതരണം നിര്‍ത്താന്‍ ആവശ്യപ്പെട്ടിരുന്നു. മൂവരുടെയും ഫോണുകള്‍ സ്വിച്ച് ഓഫ് ആക്കിയതും അന്വേഷണത്തെ ബാധിച്ചു. തിരച്ചിലിനായി ബാബു ഭാസ്‌കറിന്റെ മൂത്തമകന്‍ വൈശാഖും കര്‍ണാടകയില്‍ എത്തിയിരുന്നു.