ബൈക്കും ഓട്ടോയും കൂട്ടിയിടിച്ചുണ്ടായ അപകടത്തില്‍ വിദ്യാര്‍ഥിനിക്ക് ദാരുണാന്ത്യം
കുറുപ്പംപടിയില്‍ സുഹൃത്തിനൊപ്പം ബൈക്കില്‍ സഞ്ചരിച്ച കോളജ് വിദ്യാര്‍ഥിനി ഓട്ടോറിക്ഷയിടിച്ചുണ്ടായ അപകടത്തില്‍ മരിച്ചു. വേങ്ങൂര്‍ രാജഗിരി വിശ്വജ്യോതി കോളജ് ഓഫ് ആര്‍ട്‌സ് ആന്‍ഡ് അപ്ലൈഡ് സയന്‍സസിലെ ഒന്നാം വര്‍ഷം സോഷ്യോളജി വിദ്യാര്‍ഥിനി റിയ റോയ്(18) ആണ് മരിച്ചത്. വൈക്കം പാറയ്ക്കല്‍ ആനിക്കാട് റോയിയുടെ മകളാണ്. കോളജില്‍ ഗായികയായി അറിയപ്പെടുന്ന ആളാണ് റിയ.
ബൈക്ക് ഓടിച്ചിരുന്ന ഒന്നാം വര്‍ഷ ബികോം വിദ്യാര്‍ഥി രായമംഗലം പ്ലാപ്പറമ്പില്‍ അലന്‍ ജോര്‍ജ് റോയിയെ (18) പരുക്കുകളോടെ കോലഞ്ചേരി മെഡിക്കല്‍ മിഷന്‍ ആശുപത്രിയില്‍ പ്രവേശിപ്പിച്ചു. കുറുപ്പംപടി കുറിച്ചിലക്കോട് റോഡില്‍ കുറുപ്പംപടി ടൗണിനു സമീപമാണ് അപകടമുണ്ടായത്. കോടനാട് ഭാഗത്തുനിന്ന് വരികയായിരുന്നു ബൈക്കും ഓട്ടോറിക്ഷയും.
മുന്‍പില്‍ പോയ ഓട്ടോറിക്ഷ വലതുവശത്തുള്ള ഇടറോഡിലേക്കു തിരിഞ്ഞപ്പോള്‍ പിന്നാലെ വന്ന ബൈക്ക് ഓട്ടോറിക്ഷയില്‍ ഇടിക്കുകയായിരുന്നു. ഇരുവരും റോഡില്‍ തലയിടിച്ചു വീണു. റിയയെ ആശുപത്രിയിലെത്തിച്ചെങ്കിലും രക്ഷിക്കാനായില്ല.
https://www.facebook.com/Malayalivartha
