മുട്ടില്‍ മരംമുറി കേസില്‍ റവന്യൂ പ്രിന്‍സിപ്പല്‍ സെക്രട്ടറിയായിരുന്ന എ. ജയതിലകിന്റെ ദുരൂഹമായ ഇടപെടലുകള്‍ ശരിവെക്കുന്ന നിര്‍ണായക തെളിവുകള്‍ പുറത്തുവന്നു.മുട്ടില്‍ വില്ലേജിലെ ഭൂമിയില്‍ നിന്ന് മുറിച്ച ഈട്ടിത്തടികള്‍ കൊണ്ടുപോകുന്നതിനുള്ള പാസ് അനുവദിക്കണമെന്നാവശ്യപ്പെട്ട് റിപ്പോര്‍ട്ടര്‍ ടി.വി. ഉടമ ആന്റോ അഗസ്റ്റിന്‍ നല്‍കിയ കത്തില്‍ ജയതിലക് ഇടപെട്ടതിന്റെ രേഖയാണ് പുറത്തുവന്നത്.

മുറിച്ച മരങ്ങള്‍ കൊണ്ടുപോകുന്നതിനുള്ള പാസ് അനുവദിക്കുന്നതില്‍ ജില്ലാ ഭരണകൂടം നടപടി സ്വീകരിക്കുന്നില്ലെന്ന് ചൂണ്ടിക്കാട്ടിയാണ് ആന്റോ അഗസ്റ്റിന്‍ റവന്യൂ പ്രിന്‍സിപ്പല്‍ സെക്രട്ടറിക്ക് കത്ത് നല്‍കിയത്. വിഷയത്തില്‍ ആവശ്യമായ നടപടി സ്വീകരിക്കണമെന്നും മുറിച്ച മരങ്ങളുടെ സാഹചര്യം പരിശോധിക്കണമെന്നും നിര്‍ദേശിച്ച് ജയതിലക് കത്ത് അന്നത്തെ വയനാട് ജില്ലാ കളക്ടര്‍ അദീല അബ്ദുള്ളയ്ക്ക് കൈമാറി. ഈ കത്തിന്റെ പകര്‍പ്പാണ് ഇപ്പോള്‍ പുറത്തുവന്നത്.

2020 ഒക്ടോബര്‍ 24നാണ് പട്ടയഭൂമികളിലെ തേക്ക്, ഈട്ടി, ചന്ദനം തുടങ്ങിയ രാജകീയ മരങ്ങള്‍ മുറിക്കാന്‍ അനുമതി നല്‍കിക്കൊണ്ട് റവന്യൂ വകുപ്പ് ഉത്തരവിറക്കുന്നത്. ഇതിന്റെ മറവില്‍ സംസ്ഥാനത്തുടനീളം വലിയ തോതില്‍ ഈട്ടിത്തടികള്‍ ഉള്‍പ്പെടെ മുറിച്ചുകടത്തുകയുണ്ടായി. എന്നാല്‍ ഈ ഉത്തരവ് നിലവിലുള്ള വനനിയമങ്ങള്‍ക്ക് വിരുദ്ധമാണെന്ന് വ്യക്തമാക്കി 2020 നവംബര്‍ 19ന് എ. ജയതിലക് തന്നെ ഉത്തരവ് റദ്ദാക്കണമെന്നാവശ്യപ്പെട്ട് കുറിപ്പ് നല്‍കി.

എന്നാല്‍, ഇതിനുശേഷമാണ് മുട്ടില്‍ വില്ലേജില്‍ താന്‍ മുറിച്ചിട്ട ഈട്ടിത്തടികള്‍ കൊണ്ടുപോകാന്‍ ജില്ലാ ഭരണകൂടം പാസ് നല്‍കുന്നില്ലെന്നും വിഷയത്തില്‍ ഇടപെടണമെന്നും കാട്ടി ആന്റോ അഗസ്റ്റിന്‍ ജയതിലകിന് കത്ത് അയക്കുന്നത്. ഈ കത്തിന്റെ അടിസ്ഥാനത്തില്‍ ആവശ്യമായ നടപടിയെടുക്കാനും മുറിച്ച മരങ്ങളുടെ സാഹചര്യം പരിശോധിക്കാനും നിര്‍ദേശിച്ച് ജയതിലക് അന്നത്തെ വയനാട് ജില്ലാ കളക്ടര്‍ അദീല അബ്ദുള്ളയ്ക്ക് കത്ത് കൈമാറുകയായിരുന്നു. റദ്ദാക്കണമെന്ന് താന്‍ തന്നെ ആവശ്യപ്പെട്ട ഉത്തരവിന്റെ അടിസ്ഥാനത്തില്‍ മുറിച്ച മരങ്ങള്‍ കടത്താന്‍ ഒരു വ്യക്തി നല്‍കിയ അപേക്ഷയില്‍ പ്രിന്‍സിപ്പല്‍ സെക്രട്ടറി തലത്തിലുള്ള ഉദ്യോഗസ്ഥന്‍ കീഴുദ്യോഗസ്ഥയായ കളക്ടര്‍ക്ക് ഇത്തരത്തില്‍ നിര്‍ദേശം നല്‍കിയതാണ് ദുരൂഹമായത്.

കേസില്‍ ആന്റോ അഗസ്റ്റിന്‍ ഉള്‍പ്പെടെയുള്ളവരുടെ ഇടപെടലിനപ്പുറം സര്‍ക്കാര്‍ തലത്തില്‍ വലിയ ഗൂഢാലോചന നടന്നിട്ടുണ്ടെന്ന സംശയങ്ങള്‍ക്ക് പുതിയ വെളിപ്പെടുത്തലുകള്‍ ആക്കം കൂട്ടുന്നു. ഇതിന്റെ പശ്ചാത്തലത്തില്‍, കഴിഞ്ഞ സര്‍ക്കാര്‍ അന്വേഷിക്കാതെ ഒഴിവാക്കിയ 'ഗൂഢാലോചന' യെ കുറിച്ച് തുടരന്വേഷണം നടത്താന്‍ സര്‍ക്കാര്‍ തീരുമാനിച്ചിട്ടുണ്ട്. ഡിജിപി എസ്. ശ്രീജിത്തിന്റെ നേതൃത്വത്തിലുള്ള പ്രത്യേക അന്വേഷണ സംഘത്തെ (SIT) തന്നെ ഇതിനായി ചുമതലയേല്‍പ്പിച്ചേക്കും. ഡയറക്ടര്‍ ജനറല്‍ ഓഫ് പ്രോസിക്യൂഷന്‍ ടി. ആസഫലിയുമായി വനംമന്ത്രി ഇത് സംബന്ധിച്ച് ചര്‍ച്ച നടത്തുകയും ജുഡീഷ്യല്‍ അന്വേഷണ സാധ്യതകള്‍ ആരായുകയും ചെയ്തിരുന്നുവെങ്കിലും, നിലവിലെ എസ്‌ഐടിയെക്കൊണ്ട് അന്വേഷിപ്പിക്കുന്നതാവും ഉചിതമെന്നാണ് നിഗമനം.