ബിജെപി ഭരണസമിതിയെ പ്രതിസന്ധിയിലാക്കി പാർട്ടി കൗൺസിലർ ആർ.ശ്രീലേഖയുടെ രാജി..ശ്രീലേഖ രാജിവച്ചാല്‍ 49 ആയി അംഗ ബലം മാറും..ഭരണസഭയ്ക്കെതിരെ നീക്കങ്ങള്‍ ശക്തമാക്കാനുള്ള സാധ്യത..
ബി.ജെ.പി ഭരണനേതൃത്വത്തെയും പാര്‍ട്ടി അണികളെയും ഒരുപോലെ ഞെട്ടിച്ചുകൊണ്ട് ശാസ്തമംഗലം വാര്‍ഡ് കൗണ്‍സിലറും മുന്‍ എ.ഡി.ജി.പിയുമായ ആര്‍. ശ്രീലേഖ കൗണ്‍സിലര്‍ സ്ഥാനം രാജിവച്ചുവെന്ന് സൂചന. ശാസ്തമംഗലം വാര്‍ഡിലെ വാട്ട്സ്ആപ്പ് ഗ്രൂപ്പിലൂടെ ശ്രീലേഖ തന്നെ നിര്‍ണ്ണായകമായ രാജിക്കാര്യം പരസ്യമാക്കിയെന്നാണ് റിപ്പോര്‍ട്ട്. വ്യക്തിപരമായ കാരണങ്ങളാല്‍ രാജിവെക്കുന്നുവെന്നാണ് വിശദീകരണമെങ്കിലും, രാജിക്കനുവദിച്ച സാഹചര്യം ബി.ജെ.പി നേതൃത്വത്തെ കടുത്ത പ്രതിസന്ധിയിലാക്കിയിരിക്കുകയാണ്. ഈ കുറിപ്പ് ഏറെ ചര്‍ച്ചയാകുന്നുണ്ട്. എന്നാല്‍ ബിജെപി നേതൃത്വം ഇക്കാര്യം സ്ഥിരീകരിച്ചിട്ടില്ല.
കഴിഞ്ഞ സെപ്റ്റംബര്‍ 30-നാണ് താന്‍ കൗണ്‍സിലര്‍ സ്ഥാനത്തുനിന്ന് രാജിവെക്കുന്നതായി കാണിച്ച് മേയര്‍ വി.വി. രാജേഷിന് രാജിക്കത്ത് നല്‍കിയതെന്ന ഗ്രൂപ്പില്‍ അയച്ച കുറിപ്പില്‍ വ്യക്തമാക്കി. 'പ്രിയപ്പെട്ടവരെ, ഞാന്‍ 30.09.2026-ല്‍ മേയര്‍ ശ്രീ വി.വി. രാജേഷിന് കൗണ്‍സിലര്‍ സ്ഥാനത്തുനിന്ന് സ്വകാര്യ കാരണങ്ങള്‍ കൊണ്ട് രാജിവെക്കുന്നതായി അറിയിച്ച് കത്ത് നല്‍കിയിട്ടുണ്ട്. ഇതിന്റെ കോപ്പി തിങ്കളാഴ്ച ജില്ലാ കളക്ടര്‍ക്ക് നല്‍കും. നിങ്ങള്‍ എനിക്ക് നല്‍കിയ എല്ലാ സ്‌നേഹത്തിനും സഹകരണത്തിനും അഗാധമായ നന്ദി അറിയിക്കുന്നു' എന്നായിരുന്നു ശ്രീലേഖയുടെതായി വന്ന കുറിപ്പ്.
സെപ്റ്റംബര്‍ 30-ന് തന്നെ മേയര്‍ വി.വി. രാജേഷിന് രാജിക്കത്ത് കൈമാറിയിരുന്നെങ്കിലും വിഷയം പുറത്തറിയാതെ അടിയന്തരമായി പരിഹരിക്കാന്‍ പാര്‍ട്ടി നേതൃത്വം ശ്രമിച്ചിരുന്നു. എന്നാല്‍, ഇന്ന് രാവിലെ 11.53-ന് ശ്രീലേഖ തന്നെ വാര്‍ഡ് ഗ്രൂപ്പില്‍ പരസ്യമായി പോസ്റ്റിട്ടതോടെ പാര്‍ട്ടി തലത്തില്‍ നടന്ന അനുരഞ്ജന നീക്കങ്ങള്‍ പൂര്‍ണ്ണമായും പൊളിയുകയായിരുന്നു. തീരുമാനം തിരുത്തില്ലെന്ന വ്യക്തമായ സന്ദേശമാണ് രാവിലെ വന്ന പോസ്റ്റിലൂടെ ശ്രീലേഖ നല്‍കിയിരിക്കുന്നത്. കുറച്ചു കാലമായി ബിജെപി നേതൃത്വവുമായി അകലത്തിലായിരുന്നു ശ്രീലേഖ.
ഉന്നത പോലീസ് ഉദ്യോഗസ്ഥയായിരുന്ന ശ്രീലേഖയുടെ ഈ പടികളിറങ്ങല്‍ തിരുവനന്തപുരം കോര്‍പ്പറേഷനിലെ ബി.ജെ.പിയുടെ അംഗബലത്തെയാണ് നേരിട്ട് ബാധിക്കുന്നത്.
കോര്‍പ്പറേഷനില്‍ നിര്‍ണ്ണായക സ്വാധീനമുള്ള ബി.ജെ.പിക്ക് ഒരു കൗണ്‍സിലറുടെ കുറവുണ്ടാകുന്നത് കേവലം വാര്‍ഡ് തലത്തിലെ നഷ്ടമല്ല. ഭരണസഭയിലെ വോട്ടിംഗിലും സുപ്രധാന തീരുമാനങ്ങളിലും അംഗബലം കുറയുന്നത് പ്രതിപക്ഷമായ എല്‍.ഡി.എഫിനും യു.ഡി.എഫിനും രാഷ്ട്രീയമായി വലിയ ആയുധമായി മാറും. ശ്രീലേഖ പരസ്യ പ്രതികരണം നടത്തുമോ എന്നതും നിര്‍ണ്ണായകമാണ്.നിലവില്‍ തിരുവനന്തപുരം കോര്‍പ്പറേഷനില്‍ ബിജെപിക്ക് 50 പേരുടെ പിന്തുണയാണുള്ളത്. ഇതില്‍ ശ്രീലേഖ രാജിവച്ചാല്‍ 49 ആയി അംഗ ബലം മാറും.
.
രണ്ടു സ്വതന്ത്രന്മാരുടെ പിന്തുണയുള്ളതിനാല്‍ ഭരണം മുമ്പോട്ട് പോകും. ഒരു കൗണ്‍സിലറായ സുഗതന്‍ കാപ്പാ കേസില്‍ അഴിക്കുള്ളിലാണ്. സുഗതനെ ആയോഗ്യനാക്കാനും സിപിഎമ്മും കോണ്‍ഗ്രസും നിയമ പോരാട്ടത്തിലാണ്. അതുകൊണ്ട് തന്നെ 101 അംഗ കൗണ്‍സിലില്‍ ശ്രീലേഖയുടെ കൗണ്‍സിലര്‍ സ്ഥാനം ബിജെപിക്ക് ഏറെ പ്രധാനപ്പെട്ടതാണ്. ശ്രീലേഖ രാജിവച്ചാല്‍ അത് ബിജെപിക്ക് ഭാവിയില്‍ വലിയ തലവേദനയായി മാറും.
https://www.facebook.com/Malayalivartha
