കോതമംഗലം താലൂക്ക് ആശുപത്രിയില്‍ഓണ്‍ലൈന്‍ പേയ്‌മെന്റ് സൗകര്യമില്ലെന്ന പേരില്‍ ഹൃദ്‌രോഗിക്ക് ചികിത്സ വൈകിപ്പിച്ചു. കോതമംഗലം താലൂക്ക് ആശുപത്രിയിലാണ് സംഭവം. യാത്രാമദ്ധ്യേ അസ്വസ്ഥത അനുഭവപ്പെട്ട് ചികിത്സയ്‌ക്കെത്തിയ ആളോടാണ് പണം തരാതെ ചീട്ട് നല്‍കാനാവില്ലെന്ന് ആശുപത്രി അധികൃതര്‍ പറഞ്ഞത്.

പെരുമ്പാവൂര്‍ സ്വദേശി കരീം എ കെ എന്നയാള്‍ക്കാണ് ദുരനുഭവമുണ്ടായത്. ഓണ്‍ലൈന്‍ പേയ്‌മെന്റ് സ്വീകരിക്കില്ലെന്ന് പറഞ്ഞ ആശുപത്രി അധികൃതര്‍, ചികിത്സ അത്യാവശ്യമെങ്കില്‍ സ്വകാര്യ ആശുപത്രിയില്‍ പോകണമെന്ന് ആവശ്യപ്പെടുകയും ചെയ്തു. 45 മിനിട്ടോളം ചികിത്സ നല്‍കാതെ രോഗിയെ ആശുപത്രിയിലിരുത്തി. ഒടുവില്‍ പണമടച്ച് ഡോക്ടര്‍ പരിശോധിക്കാന്‍ എത്തിയപ്പോഴേക്കും രോഗിയുടെ നില മോശമായി. ശേഷം, കളമശേരി മെഡിക്കല്‍ കോളേജിലേക്ക് റഫര്‍ ചെയ്ത രോഗിയുടെ നില ഇപ്പോള്‍ മെച്ചപ്പെട്ടിട്ടുണ്ട്.