തിരുവനന്തപുരം കാഞ്ഞിരംകുളത്ത് മൂന്ന് ദിവസം മുൻപ് കാണാതായ 21 വയസ്സുകാരൻ സനോജിന്റെ മൃതദേഹം ആളൊഴിഞ്ഞ പുരയിടത്തിലെ പൊട്ടക്കിണറ്റിൽ കണ്ടെത്തിയ സംഭവത്തിൽ ഞെട്ടിക്കുന്ന വെളിപ്പെടുത്തലുകളുമായി കുടുംബവും നാട്ടുകാരും രംഗത്ത്. പ്രണയിനിക്ക് ഭക്ഷണം വാങ്ങി നൽകാൻ പോയ സനോജിനെ വിളിച്ചുവരുത്തി ആസൂത്രിതമായി കൊലപ്പെടുത്തിയതാണെന്നാണ് സഹോദരിയും സുഹൃത്തുക്കളും ആരോപിക്കുന്നത്. മൃതദേഹത്തിൽ കഴുത്ത് ഞെരിച്ച പാടുകളും പരിക്കുകളും കണ്ടെത്തിയതായും, സംഭവത്തിന് ശേഷം പെൺസുഹൃത്തും കുടുംബവും വീടുപൂട്ടി മുങ്ങിയതായും കുടുംബാംഗങ്ങൾ പറയുന്നു. നാട്ടുകാർ കണ്ടെത്തിയ മൃതദേഹം ഫയർഫോഴ്സ് എത്തിയാണ് പുറത്തെടുത്തത്. സംഭവത്തിൽ കാഞ്ഞിരംകുളം പോലീസ് അന്വേഷണം ഊർജ്ജിതമാക്കിയിട്ടുണ്ട്.