എറണാകുളത്ത് പ്രമുഖ യൂട്യൂബർ ഉബൈദിന്റെ ക്യാമറാമാനായി പ്രവർത്തിച്ചിരുന്ന പെരുമ്പാവൂർ സ്വദേശി ഫർഹാനെ (22) പാർക്കിൽ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയത് വലിയ വാർത്തയായിരുന്നു. പാർക്കിലെ ഊഞ്ഞാലിന്റെ ചങ്ങലയിൽ കഴുത്ത് കുരുങ്ങിയ നിലയിലായിരുന്നു മൃതദേഹം കണ്ടെത്തിയത്. പെട്ടെന്നുണ്ടായ ദുരന്തത്തിന്റെ ആഘാതത്തിൽ നിന്നും ഫർഹാന്റെ കുടുംബവും സുഹൃത്തുക്കളും ഇതുവരെ മുക്തരായിട്ടില്ല. 

സംഭവം പ്രദേശത്ത് വലിയ നടുക്കമാണ് സൃഷ്ടിച്ചിരിക്കുന്നത്. ഇപ്പോഴിതാ, ഒരു ഫേസ്ബുക്ക് കുറിപ്പിലൂടെ തന്റെ പ്രിയ സുഹൃത്തിനെ വീണ്ടും ഓർത്തെടുക്കുകയാണ് ഉബൈദ്.ഇൻസ്റ്റാഗ്രാമിലൂടെ പരിചയപ്പെട്ട് കഴിഞ്ഞ ഒന്നര വർഷത്തോളമായി ഉബൈദിനൊപ്പം നിഴൽ പോലെ ഒപ്പമുണ്ടായിരുന്ന വിശ്വസ്തനായ സഹപ്രവർത്തകനും അടുത്ത സുഹൃത്തുമായിരുന്നു ഫർഹാൻ. വെറുമൊരു ക്യാമറാമാൻ എന്നതിലുപരി തനിക്ക് സൗഹൃദത്തിന്റെ ശരിയായ അർത്ഥം മനസ്സിലാക്കിത്തന്ന പ്രിയപ്പെട്ട സഹോദരനായിരുന്നു ഫർഹാനെന്ന് ഉബൈദ് കണ്ണീരോടെ ഓർത്തെടുക്കുന്നു.

എവിടെപ്പോയാലും കൂടെയുണ്ടാകുന്ന, ഒരു പരാതിയും പറയാതെ എപ്പോഴും 'മച്ചാ എവിടെയാ' എന്ന് വിളിച്ച് അന്വേഷിക്കുന്ന ഫർഹാന്റെ വേർപാട് വിശ്വസിക്കാൻ പോലുമാകാത്ത അവസ്ഥയിലാണ് ഉബൈദ്.സ്വന്തമായി ഒരു ബിസിനസ്സ് ആരംഭിക്കണമെന്ന വലിയ സ്വപ്നവുമായി കഴിഞ്ഞ കുറച്ച് നാളുകളായി ഓട്ടത്തിലായിരുന്നു ഫർഹാൻ.കഴിഞ്ഞ രണ്ടു മാസമായി രണ്ടുപേരും സ്വന്തം തിരക്കുകളിലായിരുന്നെങ്കിലും എവിടെപ്പോയാലും വിളിക്കുന്ന ഫർഹാൻ അവസാനമായി മാത്രം വിളിച്ചില്ലെന്ന് ഉബൈദ് സങ്കടത്തോടെ പറയുന്നു.

മൂന്ന് വർഷത്തിലധികം നീണ്ട പ്രണയബന്ധവും ഭാവി ജീവിതത്തെക്കുറിച്ചുള്ള വലിയ ആഗ്രഹങ്ങളും ബാക്കിവെച്ചാണ് ഈ ചെറുപ്പക്കാരൻ പെട്ടെന്ന് വിടവാങ്ങിയത്