ഗുരുഗ്രാമില്‍ അമിതവേഗത്തിലെത്തിയ കാറിടിച്ച് അപകടം
ഗുരുഗ്രാമിലെ അമിതവേഗത്തിലെത്തിയ എസ്‌യുവി കാര്‍ രണ്ടു കാറുകളിലിടിച്ച് അപകടം. ഗുരുഗ്രാമിലെ ഡിഎല്‍എഫ് ഫേസ് രണ്ടില്‍ ഗോള്‍ഡ് കോഴ്‌സ് കണക്റ്റിംഗ് റോഡില്‍ റാപ്പിഡ് മെട്രോ ലൈനില്‍ ഇന്ന് പുലര്‍ച്ചെ 1.30 ഓടെയായിരുന്നു സംഭവം. അപകടത്തിന്റെ സിസിടിവി ദൃശ്യങ്ങള്‍ സോഷ്യല്‍ മീഡിയയില്‍ വ്യാപകമായി പ്രചരിക്കുകയാണ്. പുറത്തുവന്ന അപകടത്തിന്റെ ദൃശ്യങ്ങളുടെ അടിസ്ഥാനത്തില്‍ പൊലീസ് അന്വേഷണം ആരംഭിച്ചിട്ടുണ്ട്.
അമിത വേഗത്തിലെത്തിയ കറുത്ത എസ്‌യുവി ആദ്യം മുന്നിലുണ്ടായിരുന്ന ഒരു കാറിനെ ഇടിച്ചു തെറിപ്പിക്കുകയായിരുന്നു. തുടര്‍ന്ന് നിയന്ത്രണം വിട്ട എസ്‌യുവി മറ്റൊരു ടാക്‌സി കാറിലിടിച്ച ശേഷം റോഡരികിലെ ചുവരിലിടിച്ച് നില്‍ക്കുകയായിരുന്നു. ഇടിയുടെ ആഘാതത്തില്‍ ടാക്‌സി കാര്‍ റോഡിലേയ്ക്ക് മറിയുകയും കുറച്ചു ദൂരത്തോളം തെന്നി നീങ്ങുകയുമായിരുന്നു.
ടാക്‌സിക്കുള്ളില്‍ കുടുങ്ങിപ്പോയ ഡ്രൈവറെ സമീപത്തുണ്ടായിരുന്ന കാല്‍നടയാത്രക്കാരും മറ്റ് വാഹനയാത്രക്കാരും ചേര്‍ന്നാണ് പുറത്തെടുത്തത്. ഗുരുതരമായി പരിക്കേറ്റ ഇയാളെ ഉടന്‍ തന്നെ അടുത്തുള്ള ആശുപത്രിയില്‍ പ്രവേശിപ്പിച്ചു. അപകടത്തിന് പിന്നാലെ പൊലീസും ഡിഎല്‍എഫ് പെട്രോളിംഗ് സംഘവും സ്ഥലത്തെത്തി ക്രെയിന്‍ ഉപയോഗിച്ച് വാഹനങ്ങള്‍ നീക്കം ചെയ്ത് ഗതാഗതം പുനഃസ്ഥാപിച്ചു.
https://www.facebook.com/Malayalivartha
