യു.ഡി.എഫിന് കനത്ത പരാജയം സംഭവിക്കുകയാണെങ്കില്‍ അതിന് പിന്നില്‍ പ്രവര്‍ത്തിച്ചവര്‍ മറ്റാരുമല്ല; കോണ്‍ഗ്രസുകാര്‍ തന്നെയാണ്. യു.ഡി.എഫിലെ പ്രമുഖരടക്കം തോല്‍ക്കുമെന്ന എക്‌സിറ്റ്‌പോള്‍ ഫലങ്ങള്‍ പുറത്തുവരുമ്പോള്‍ കോണ്‍ഗ്രസ് പ്രവര്‍ത്തകരെ തന്നെയാണ് നേതാക്കള്‍ നോട്ടമിടുന്നത്.

അഴിമതിക്കെതിരെ ആയുധം എടുക്കുകയായിരുന്നു ജനം. ഭരണതുടര്‍ച്ച സുനിശ്ചിതമാണെന്ന് കോണ്‍ഗ്രസ് നേതാക്കള്‍ പറയുമ്പോള്‍ ജനങ്ങള്‍ തങ്ങളുടെ അവസരത്തിനായി നിശബ്ദം കാത്തിരിക്കുകയായിരുന്നു. വികസനവും കരുതലുമൊന്നും വേണ്ടെന്നും അഴിമതിയില്ലാത്ത ഭരണം ഉറപ്പാക്കിയാല്‍ മതിയെന്നും ജനം തീരുമാനിച്ചാലെന്ത് ചെയ്യും.

അഴിമതിക്കെതിരായ പ്രതികരണം കോണ്‍ഗ്രസ് അണികളിലും ഉണ്ടായിരുന്നു എന്നാണ് എക്‌സിറ്റ്‌പോള്‍ ഫലങ്ങളില്‍ നിന്നും മനസ്സിലാവുന്നത്. സര്‍വേ നടത്തിയ സകല ഏജന്‍സികളും ഇതുതന്നെയാണ് പറയുന്നത്.

അതേസമയം തിരുവനന്തപുരം ജില്ലയില്‍ നിന്നും മത്സരിച്ച കെ. മുരളീധരന്‍, ശബരീനാഥന്‍ എന്നിവരുടെ തോല്‍വിക്ക് പിന്നില്‍ സീറ്റ് ആഗ്രഹിക്കുന്ന കോണ്‍ഗ്രസുകാര്‍ തന്നെയാണെന്നാണ് സര്‍വേയില്‍ നിന്നും ലഭിച്ച സൂചനകള്‍. ചില പ്രമുഖ ഘടകകക്ഷി നേതാക്കള്‍ക്കെതിരെ കോണ്‍ഗ്രസ് പ്രവര്‍ത്തകര്‍ പ്രവര്‍ത്തിച്ചുവെന്നും സര്‍വേ ഫലത്തില്‍ നിന്നും മനസിലാവുന്നു.

ഇടതുതരംഗം സൃഷ്ടിച്ചത് ജനങ്ങള്‍ തന്നെയാണ്. സരിതയും ബിജുരമേശുമൊക്കെ ഇക്കാര്യത്തില്‍ നിര്‍ണായകമായ സ്വാധീനമാണ് ചെലുത്തിയത്. ഉമ്മന്‍ചാണ്ടി സര്‍ക്കാരിന്റെ അവസാന കാലത്തുണ്ടായ ഇടപെടലുകളും സര്‍ക്കാരിനെ ദോഷമായി ബാധിച്ചു.

വി.എം. സുധീരന്റെ ചില പ്രസ്താവനകളും സര്‍ക്കാരിനെ പ്രതിസന്ധിയിലാക്കി. രമേശ് ചെന്നിത്തലയും ഉമ്മന്‍ചാണ്ടിയും രണ്ട് ധ്രുവങ്ങളില്‍ നിന്ന് പോരാടിയതും യു.ഡി.എഫിന് വിനയായി തീര്‍ന്നെന്ന് സര്‍വേ ഫലങ്ങള്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha