തൊഴിലാളികളുടെ പണിമുടക്കിനെ തുടര്‍ന്ന് കണ്ണൂര്‍ വിമാനത്താവള നിര്‍മാണം പ്രതിസന്ധിയില്‍
കണ്ണൂര്‍ വിമാനത്താവള നിര്‍മാണ പ്രവൃത്തിയില്‍ ഏര്‍പ്പെട്ടിരിക്കുന്ന എല്‍ആന്‍ഡ്ടി കമ്പനിയിലെ ഒരു വിഭാഗം തൊഴിലാളികള്‍ പണിമുടക്ക് നടത്തുന്നതിനാല്‍ വിമാനത്താവള നിര്‍മാണം പ്രതിസന്ധിയില്‍. തുടര്‍ച്ചയായി പണിയിലേര്‍പ്പെട്ടിരിക്കുന്ന തൊഴിലാളികളെ പിരിച്ചു വിടുന്നതാണ് പണിമുടക്കിന്‌ചെആഹ്വാനം ചെയ്യാന്‍ തൊഴിലാളികളെ പ്രേരിപ്പിച്ചത്.
മെക്കാനിക്കല്‍ വിഭാഗത്തില്‍ പെട്ട 67 തൊഴിലാളികളാണ് ഇപ്പോള്‍ പണി മുടക്കുന്നത്. മലയാളികളായ തൊഴിലാളികളെ സ്ഥിരപ്പെടുത്തുക, ആനുകൂല്യങ്ങള്‍ നല്‍കുക തുടങ്ങിയ ആവശ്യങ്ങള്‍ ഉന്നയിച്ചാണ് പണിമുടക്ക് നടത്തുന്നത്.
എല്‍ ആന്‍ഡ് ടിയില്‍ കരാര്‍ അടിസ്ഥാനത്തില്‍ ഡ്രൈവറായി ജോലി ചെയ്തു വരികയായിരുന്ന കോട്ടയം സ്വദേശി മനൂപിനെ പിരിച്ചു വിട്ട സാഹചര്യത്തിലാണ് തൊഴിലാളികള്‍ പണിമുടക്കിന് തീരുമാനിച്ചത്. പിരിച്ചു വിട്ടതിനെ തുടര്‍ന്ന് കണ്ണൂര്‍ നഗരമധ്യത്തില്‍ ഉള്ള മരത്തില്‍ കയറി മനൂപ് ആത്മഹത്യ ഭീഷണി മുഴക്കിയിരുന്നു.
നിര്‍മാണ പ്രദേശത്തെ കോണ്‍ക്രീറ്റ് മിക്സിങ് പ്ലാന്റുകള്‍ ഉള്‍പ്പെടെ കമ്പനി തിരിച്ചു കൊണ്ടുപോയെന്നും ഇവിടത്തെ നിര്‍മാണ പ്രവര്‍ത്തനങ്ങള്‍ അവസാനിപ്പിക്കാന്‍ കമ്പനി ശ്രമിക്കുന്നതാണോ എന്ന് സംശയിക്കേണ്ടതുണ്ടെന്നും തൊഴിലാളികള്‍ ആരോപിച്ചു. വിമാനത്താവള പദ്ധതി പ്രദേശത്ത് നിര്‍മാണ ജോലിയില്‍ ഏര്‍പ്പെട്ടിരിക്കുന്ന തൊഴിലാളികള്‍ കടുത്ത ചൂഷണം നേരിടുന്നതായും റിപ്പോര്‍ട്ട് ചെയ്തിരുന്നു.
https://www.facebook.com/Malayalivartha
