കെ.എം. മാണിയുടെ കേരള കോണ്ഗ്രസ് യു.ഡി.എഫ് വിട്ടു, എല്.ഡി.എഫിലേക്കില്ല, എന്.ഡി.എയിലേക്കില്ല, ബി.ജെ.പിയിലേക്കില്ല, മാണി ഗ്രൂപ്പ് പ്രത്യേക ബ്ലോക്കാകും
കെ.എം. മാണിയുടെ കേരള കോണ്ഗ്രസ് യു.ഡി.എഫ് വിട്ടു. രണ്ടുദിവസത്തെ ചരല്ക്കുന്ന് ക്യാമ്പിന്റെ ഒടുവില് വാര്ത്താ സമ്മേളനത്തിലാണ് അദ്ദേഹം ഇങ്ങനെ പ്രഖ്യാപിച്ചത്. സഹിച്ച് സഹിച്ച് ക്ഷമയുടെ നെല്ലിപ്പലകയും കഴിഞ്ഞാണ് ഒടുവില് തീരുമാനമെടുത്തത്. എല്.ഡി.എഫിലേക്കില്ല, എന്.ഡി.എയിലേക്കില്ല, ബി.ജെ.പിയിലേക്കില്ല.
ഉത്തരവാദിത്വമുള്ള പ്രതിപക്ഷമായി നിയമസഭയില് തുടരുമെന്ന് അദ്ദേഹം വ്യക്തമാക്കി. നിയമസഭയില് പ്രത്യേകമായിരിക്കുമെങ്കിലും പ്രാദേശിക സ്വയംഭരണസ്ഥാപനങ്ങളിലും സഹകരണ സ്ഥാപനങ്ങളിലുമുള്ള നിലവിലെ സ്ഥിതിയില് മാറ്റം വരുത്താന് ഉദ്ദേശിക്കുന്നില്ലെന്നും മാണി പറഞ്ഞു. കോണ്ഗ്രസ് രാഷ്ട്രീയ മര്യാദ കാട്ടിയില്ല. കേരള കോണ്ഗ്രസ്സഹിച്ചും ക്ഷമിച്ചുമൊക്കെ ഇത്ര നാളും കഴിഞ്ഞു. കോണ്ഗ്രസിലെ എല്ലാവരുമല്ല, ചിലര് മാത്രമാണ് കേരള കോണ്ഗ്രസിനെ ആക്രമിച്ചത്. അത് ആരുടെതെന്ന് പേര് പറയുന്നില്ല. ചില വ്യക്തികളുടെ പേര് പറയുന്നില്ല. അറിയാവുന്നവര്ക്ക് അറിയാം. കൊള്ളേണ്ടിടത്ത് കൊള്ളുമെന്ന് മാണി പറഞ്ഞു. യു.ഡി.എഫിലേക്ക് തിരിച്ചുവരവിനുള്ള ചിന്തയേയില്ല എന്ന് ഒരു ചോദ്യത്തിന് അദ്ദേഹം മറുപടി നല്കി.
രാഷ്ട്രീയ മര്യാദയില്ലായ്മയും നീതിബോധത്തിന് വിരുദ്ധമായ സമീപനവും മൂലം മുന്നണി ദുര്ബലപ്പെട്ടിരിക്കുന്ന സമയത്ത് മറ്റ് ഘടകകക്ഷികള്ക്ക് സ്വയം വിമര്ശനത്തിനും ആത്മപരിശോധനയ്ക്ക് കൂടി തങ്ങളുടെ ഈ നടപടി സഹായിക്കുമെന്ന് മാണി പറഞ്ഞു. പാര്ട്ടിയില് ഭിന്നാഭിപ്രായമില്ലെന്ന് മാണി പറഞ്ഞു. പാര്ലമെന്റിലെ നിലപാടും പ്രശ്നാധിഷ്ഠീതമായിരിക്കും. യു.ഡി.എഫ് വിട്ടുപോയിക്കഴിഞ്ഞാല് ഇനിയും ചിലര് തങ്ങളുടെ നേര്ക്ക് കല്ലെറിഞ്ഞേക്കുമെന്ന് മാണി ചോദ്യത്തിന് മറുപടി നല്കി.
ഒരുവീട്ടില് സ്നേഹം വേണ്ടേ, ശത്രുതാ മനോഭാവത്തോടെ പെരുമാറിയാല് എങ്ങനെ സഹിക്കും. നമ്പര് വണ് ശത്രുവായി കേരള കോണ്ഗ്രസിനെ കാണുകയാണ്. ചില മണ്ഡലങ്ങളില് പാര്ട്ടി സ്ഥാനാര്ത്ഥികളെ തോല്പ്പിക്കാന് ചില കോണ്ഗ്രസ് നേതാക്കള് പ്രത്യേക റിക്രൂട്ട്മെന്റ് നടത്തി ആളുകളെ നിയോഗിച്ചിരുന്നു. ചിലര് ഫണ്ട് വരെ സംഘടിപ്പിച്ച് തോല്പ്പിക്കാന് ചെലവിട്ടു.
14ന് കോട്ടയത്ത് ചേരുന്ന സംസ്ഥാന കമ്മിറ്റി കാര്ഷിക കാര്യങ്ങള് ചര്ച്ച ചെയ്യും. ആരെയും ശപിച്ചുകൊണ്ടല്ല കേരള കോണ്ഗ്രസ് പോകുന്നത്. യുഡി.എഫിന് നന്മ വരട്ടെ എന്ന് പ്രാര്ത്ഥിക്കുന്നു.
https://www.facebook.com/Malayalivartha