രാഷ്ട്രീയ വൈര്യം മറന്ന് അവരെത്തി; ഒരു വേദിയില്‍
പി ജയരാജന്‍ ക്യാമറയ്ക്ക് പിന്നില്‍ നിന്നപ്പോള്‍ ക്ലാപ്പടിച്ചത് കെ സുധാകന്‍. നടന്‍ സലിംകുമാര്‍ സംവിധാനം ചെയ്യുന്ന പുതിയ ചിത്രം കറുത്ത ജൂതന്റെ സ്വിച്ച് ഓണ്‍ ചടങ്ങിലാണ് രണ്ട് നേതാക്കളും ഒന്നിച്ചത്. പയ്യന്നൂര്‍ രാമന്തളി സ്‌കൂളിലെ ആദ്യരംഗത്തില്‍ നടനായി എത്തിയതാകട്ടെ മുന്‍ എം എല്‍ എ ടി എന്‍ പ്രതാപനും. ഈ സംഗമം നടക്കുമോ..?. കറുത്ത ജൂതന്റെ സംവിധായകനുണ്ടായ സംശയം എല്ലാവര്‍ക്കുമുണ്ടായിരുന്നു.
കണ്ണൂര്‍ രാഷ്ട്രീയത്തിലെ ബദ്ധവൈരികളായ രണ്ട് നേതാക്കള്‍,കെ സുധാകരനും പി ജയരാജനും ഒരുമിച്ച് ഒരു വേദിയിലെത്തുമോ..? ആകാംക്ഷയ്ക്ക് രാമന്തളിയില്‍ അവസാനമായി. പ്രിയ സുഹൃത്തിന്റെ ചിത്രത്തിന് തുടക്കമിടാന്‍ രണ്ടുപേരുമെത്തി. ഇരുവരെയും ക്ഷണിച്ചതിന് സലിംകുമാറിന് കാരണവുമുണ്ട്.
സംസാരിക്കാന്‍ ക്ഷണിക്കും മുമ്പ് അധ്യക്ഷന്‍ ടി വി രാജേഷ് എം എല്‍ എയ്ക്ക് ഒരു സംശയം. ആരെ ആദ്യം ക്ഷണിക്കും, അതിന് സലീംകുമാര്‍ തന്നെ മറുപടി നല്‍കി. തമ്മില്‍ കണ്ടാല്‍ മിണ്ടാത്ത അത്ര ശത്രുതയൊന്നും തങ്ങള്‍ക്കില്ലെന്ന് സുധാകരനും ജയരാജനും വ്യക്തമാക്കി.
പിന്നെയായിരുന്നു സ്വിച്ച് ഓണ്‍ കര്‍മ്മം. തന്റെ അഞ്ചാമത്തെ ചിത്രത്തില്‍ മാള എം എല്‍ എ ആയി ടി എന്‍ പ്രതാപന്‍ ക്യാമറയ്ക്ക്മുന്നില്‍. ക്ലാപ്പടിക്കാന്‍ കെ സുധാകരന്‍. ക്യാമറയ്ക്കി പിന്നില്‍ പി ജയരാജനും. പിരിമുറുക്കമില്ലാതെ പുതിയ റോളില്‍ ചിരിച്ച് നേതാക്കന്‍മാരുടെ മടക്കം. മലബാറിലെ ജൂതന്‍മാരുടെ കഥയാണ് കമ്പാര്‍ട്ട്‌മെന്റിന് ശേഷം സലിംകുമാര്‍ ഒരുക്കുന്ന കറുത്ത ജൂതന്‍ പറയുന്നത്.
https://www.facebook.com/Malayalivartha
