കോട്ടയം-എറണാകുളം റെയില്‍പാതയില്‍ പിറവം റോഡിനും കുറുപ്പന്തറയ്ക്കുമിടയില്‍ ഇരട്ടപാതയുടെ കമ്മീഷനിംഗുമായി ബന്ധപ്പെട്ട് ഇന്ന് ഇതുവഴിയുള്ള ട്രെയിന്‍ ഗതാഗതത്തിനു നിരോധനമേര്‍പ്പെടുത്തി. കൊല്ലത്തുനിന്നു തുടങ്ങുന്നതും ഇവിടെ അവസാനിക്കുന്നതുമായ നാലു പാസഞ്ചര്‍ ട്രെയിനുകള്‍ റദ്ദാക്കി.
പുനലൂര്‍-ഗുരുവായൂര്‍ ഭാഗികമായും റദ്ദാക്കി. എട്ട് എക്‌സ്പ്രസ് ട്രെയിനുകള്‍ ആലപ്പുഴ വഴി തിരിച്ചു വിട്ടു. എറണാകുളം ജംഗ്ഷനില്‍നിന്നു പുലര്‍ച്ചെ 5.25ന് പുറപെടുന്ന കൊല്ലം മെമു (66307), 11.10ന്റെ കൊല്ലം-എറണാകുളം മെമു(66308), എന്നിവയും റദ്ദാക്കി. കൊല്ലത്തുനിന്നു രാവിലെ 8.50ന് പുറപെട്ട് ആലപ്പുഴ വഴി എറണാകുളത്തെത്തുന്ന മെമു (66302), 2.40ന്റെ എറണാകുളം-കൊല്ലം മെമു (66301) എന്നിവയും റദ്ദാക്കിയിട്ടുണ്ട്.
ഗുരുവായൂര്‍-പുനലൂര്‍ പാസഞ്ചര്‍ (56365), പുനലൂര്‍-ഗുരുവായൂര്‍ പാസഞ്ചര്‍ (56366), എന്നീ ട്രെയിനുകള്‍ ഇടപ്പള്ളിക്കും ഗുരുവായൂരിനുമിടെയില്‍ മാത്രമെ സര്‍വീസ് നടത്തൂ. നാഗര്‍കോവില്‍-മംഗളൂരു പരശുറാം (16650), കൊച്ചുവേളി-ഹൈദരാബാദ് ശബരി (17229), കന്യാകുമാരി-മുംബൈ സിഎസ്ടി (16382), തിരുവനന്തപുരം-ന്യൂഡല്‍ഹി കേരളാ (12625) എന്നിവ ആലപ്പുഴ വഴി തിരിച്ചുവിടും.
കണ്ണൂര്‍-തിരുവനന്തപുരം ജനശതാബ്ദി (12081), ന്യൂഡല്‍ഹി-തിരുവനന്തപുരം കേരള (12626), ഹൈദരാബാദ-കൊച്ചുവേളി ശബരി (17230), മംഗളൂരു-നാഗര്‍കോവില്‍ പരശുറാം (16649) എന്നിവയും ആലപ്പുഴ വഴി തിരിച്ചുവിടും. ഈ ട്രെയിനുകള്‍ക്കെല്ലാം ഇന്നു ഹരിപ്പാട്, അമ്പലപ്പഴ, ആലപ്പുഴ, ചേര്‍ത്തല സ്‌റ്റേഷനുകളില്‍ ഒരു മിനിറ്റ് സ്‌റ്റോപ്പുണ്ടാകുമെന്നും അറിയിച്ചിട്ടുണ്ട്.
12.40ന് തിരുവനന്തപുരത്തുനിന്നു പുറപ്പെടുന്ന കന്യാകുമാരി-ബംഗളൂരൂ ഐലന്‍ഡ്(16525) കോട്ടയം വഴി സര്‍വീസ് നടത്തുമെങ്കിലും കോട്ടയത്ത് 30 മിനിറ്റ് പിടിച്ചിടും. 8.35നുള്ള കൊല്ലം-കോട്ടയം പാസഞ്ചര്‍ (56394) പതിവുപോലെ സര്‍വീസ് നടത്തുമെന്നും റെയില്‍വേ അറിയിച്ചു.