വെള്ളാപ്പള്ളി നടേശനെതിരെ എന്‍എസ്‌എസ്‌ ജനറല്‍ സെക്രട്ടറി ജി. സുകുമാരന്‍ നായര്‍ രംഗത്തെത്തി. വെള്ളാപ്പള്ളി നടേശന്‍ തലപ്പത്ത്‌ ഇരിക്കുന്നിടത്തോളം കാലം എസ്‌എന്‍ഡിപി, എന്‍എസ്‌എസ്‌ ഐക്യം ഉണ്ടാകില്ല. നായര്‍ , ഈഴവ ഐക്യം തകര്‍ത്തത്‌ ആരെന്ന്‌ ജനങ്ങള്‍ തീരുമാനിക്കട്ടെയെന്നും സുകുമാരന്‍ നായര്‍ പറഞ്ഞു.

ദേവസ്വം റിക്രൂട്ട്‌മെന്റ്‌ ബോര്‍ഡ്‌ ഉള്‍പ്പെടെയുള്ള വിഷയങ്ങളില്‍ എന്‍എസ്‌എസിനെ അംഗീകരിക്കാത്തവര്‍ക്ക്‌ ലോകസഭാ തെരഞ്ഞെടുപ്പില്‍ വോട്ടില്ലെന്നും സുകുമാരന്‍ നായര്‍ വ്യക്‌തമാക്കി.

അതിനുശേഷം എന്തെന്ന് പിന്നീട് തീരുമാനിക്കും. വിശാല ഹിന്ദു സമുദായത്തിന്റെ കുത്തകാവകാശം ആരും ഒറ്റയ്ക്ക് ഏറ്റെടുക്കേണ്ടെന്നും സുകുമാരന്‍നായര്‍ പറഞ്ഞു. എസ്എന്‍ഡിപിയുമായുള്ള ഐക്യം തുടരേണ്ടതില്ലെന്ന് എന്‍എസ്എസ് നേരത്തെ തീരുമാനിച്ചിരുന്നു.

സമുദായ സൗഹാര്‍ദ്ദത്തിനും മതേതരത്വത്തിനും എതിരായ ചില സംഭവങ്ങള്‍ അടുത്തകാലത്ത് ഉണ്ടായതു കൊണ്ടാണ് ഐക്യം അവസാനിപ്പിച്ചതെന്ന് ഔദ്യോഗിക വിശദീകരണത്തില്‍ എന്‍എസ്എസ് വ്യക്തമാക്കി. അതേസമയം സുകുമാരന്‍ നായരുടേത് തമ്പ്രാന്‍ സ്വഭാവമാണെന്ന് വെള്ളാപ്പള്ളിയും ആരോപിച്ചിരുന്നു. ഭൂരിപക്ഷ ഐക്യം തകര്‍ത്തത് എന്‍എസ്എസ് ജനറല്‍ സെക്രട്ടറി സുകുമാരന്‍ നായരാണ്. നായാടി മുതല്‍ നമ്പൂതിരി വരെയുള്ളവരുടെ ഐക്യത്തിനായിരുന്നു എസ്എന്‍ഡിപിയുടെ ശ്രമം. എന്നാല്‍ സ്വന്തം കാര്യം കഴിഞ്ഞപ്പോള്‍ സുകുമാരന്‍ നായര്‍ കാലുമാറി. രമേശ് ചെന്നിത്തലയെ കുറ്റപ്പെടുത്തിയതും സുകുമാരന്‍ നായരുടെ വാക്കുകേട്ടാണ്. സുകുമാരന്‍ നായര്‍ തള്ളിപ്പറഞ്ഞെന്നു കരുതി ഭൂരിപക്ഷ ഐക്യം തകരില്ലെന്നും വെള്ളാപ്പള്ളി വിമര്‍ശിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha