കുണ്ടറ പീഡനക്കേസ് പ്രതിയുടെ ഭാര്യയെ പോലീസ് പ്രതി ചേര്‍ത്തു. കേസില്‍ രണ്ടാം പ്രതിയാണ് കുട്ടിയുടെ മുത്തശ്ശിയായ ലതാമേരി. മറ്റൊരു പെണ്‍കുട്ടി ജീവനൊടുക്കിയ സംഭവത്തിലും ലതാമേരിയെ പ്രതി ചേര്‍ത്തിട്ടുണ്ട്. മുത്തച്ഛന്‍ വിക്ടറിന് കൊച്ചുമകളെ പീഡിപ്പിക്കാന്‍ ഒത്താശ ചെയ്തത് ലതാകുമാരിയാണെന്ന് കണ്ടെത്തിയിരുന്നു. മരിച്ച പെണ്‍കുട്ടിയുടെ അമ്മയെയും മൂത്ത സഹോദരിയെയും കേസില്‍ സാക്ഷിയാക്കാന്‍ പോലീസ് തീരുമാനിച്ചു. മരിച്ച പെണ്‍കുട്ടിയുടെ അമ്മയ്ക്കും സഹോദരിക്കും മുത്തശ്ശിക്കും പീഡനത്തെക്കുറിച്ച് അറിയാമായിരുന്നു.

ലതാമേരിയുടെ അറസ്റ്റ് നാളെ രേഖപ്പെടുത്തും. സംഭവത്തില്‍ അന്വേഷണ സംഘം കോടതിയില്‍ റിപ്പോര്‍ട്ട് നല്‍കി. ഇവരുടെ അറിവോടെയായിരുന്നു പീഡനം നടന്നതെന്ന് പോലീസിന് അന്വേഷണത്തില്‍ ബോധ്യപ്പെട്ടതിന്റെ അടിസ്ഥാനത്തിലാണ് നടപടി. നേരത്തേ ഇവരുടെ മൊഴിയുടെ അടിസ്ഥാനത്തിലാണ് പ്രതിയായ മുത്തച്ഛനെ അറസ്റ്റ് ചെയ്തത്. എന്നാല്‍ പെണ്‍കുട്ടിയെ കൂടുതല്‍ കൗണ്‍സിലിങ്ങിന് വിധേയമാക്കിയപ്പോഴാണ് ഭാര്യയുടെ പങ്ക് വ്യക്തമായത്.

കുണ്ടറയില്‍ മരിച്ച പെണ്‍കുട്ടിയുടെ ബന്ധുവാണ് 13കാരി. പ്രതി മൂന്ന് വര്‍ഷമായി തന്നെ ക്രൂരമായ ലൈംഗിക പീഡനത്തിന് ഇരയാക്കുകയാണെന്ന് ഇവര്‍ കഴിഞ്ഞദിവസം കോടതിയില്‍ മൊഴി നല്‍കിയിരുന്നു.

ആത്മഹത്യ ചെയ്ത പത്ത് വയസുകാരി ലൈംഗികമായി പീഡിപ്പിക്കപ്പെട്ടിട്ടുണ്ടെന്ന പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ചിട്ടും പൊലീസ് നടപടിയെടുത്തിരുന്നില്ല. മാധ്യമവാര്‍ത്തകളെ തുടര്‍ന്ന് സംഭവം വിവാദമായതോടെയാണ് കേസില്‍ പെണ്‍കുട്ടിയുടെ അമ്മയുടെ അഛനെ അറസ്റ്റ് ചെയ്യുന്നത്. മരിച്ച പെണ്‍കുട്ടിയുടെ അമ്മയെയും ബന്ധുവായ പെണ്‍കുട്ടിയയെും കൗണ്‍സിലിന് വിധേയമാക്കിയാണ് പൊലീസ് നിര്‍ണായക വിവരങ്ങള്‍ ശേഖരിച്ചത്. ഭയന്നിട്ടാണ് പീഡനവിവരം തുറന്നു പറയാതിരുന്നതെന്നും പെണ്‍കുട്ടി വ്യക്തമാക്കിയിരുന്നു.

ഇക്കഴിഞ്ഞ ജനുവരി 15നാണു പത്തു വയസുകാരിയെ വീട്ടിലെ ജനല്‍ കമ്ബിയില്‍ തൂങ്ങിമരിച്ച നിലയില്‍ കണ്ടെത്തിയത്. കാലുകള്‍ തറയില്‍ മുട്ടിനില്‍ക്കുന്ന രീതിയിലായിരുന്നു മൃതദേഹം. മരിക്കുന്നതിന് മൂന്ന് ദിവസം മുന്‍പ് വരെ പെണ്‍കുട്ടി ലൈംഗിക പീഡനത്തിന് ഇരയായെന്ന് പോസ്റ്റ്‌മോര്‍ട്ടം ചെയ്ത ഡോക്ടര്‍ റിപ്പോര്‍ട്ട് നല്‍കിയിരുന്നു.