പിണറായി സര്ക്കാരിനെതിരായ വിമര്ശനങ്ങള്ക്കിടെ സിപിഎം സംസ്ഥാന സമിതി യോഗം ഇന്ന്, പത്തുമാസത്തെ പ്രവര്ത്തനങ്ങള് വിലയിരുത്തിയുള്ള രേഖ സെക്രട്ടറി കോടിയേരി ബാലകൃഷ്ണന് അവതരിപ്പിക്കും
സര്ക്കാരിനെതിരായ സംസ്ഥാന സെക്രട്ടേറിയറ്റിന്റെ വിമര്ശനങ്ങള് സിപിഎം സംസ്ഥാന സമിതി ഇന്നും നാളെയും ചര്ച്ച ചെയ്യും. രാവിലെ പത്തിന് തിരുവനന്തപുരം എകെജി സെന്ററിലാണ് യോഗം. സര്ക്കാരിന്റെ പത്തുമാസത്തെ പ്രവര്ത്തനങ്ങള് വിലയിരുത്തിയുള്ള രേഖ സെക്രട്ടറി കോടിയേരി ബാലകൃഷ്ണന് അവതരിപ്പിക്കും.
കഴിഞ്ഞ ദിവസം ചേര്ന്ന സംസ്ഥാന സെക്രട്ടേറിയറ്റില് സംസ്ഥാന സര്ക്കാരിന്റെ പ്രവര്ത്തനങ്ങള് വിചാരണ ചെയ്തിരുന്നു. ഈ പശ്ചാത്തലത്തിലാണ് സംസ്ഥാന സമിതി ചേരുന്നത്. മുഖ്യമന്ത്രിയുടേയും മന്ത്രിമാരുടേയും പ്രവര്ത്തനം പ്രതീക്ഷയ്ക്കൊത്ത് ഉയരുന്നില്ല എന്നായിരുന്നു സെക്രട്ടേറിയറ്റിലെ മുഖ്യ വിമര്ശനം. ജനങ്ങള്ക്കു മാറ്റം അനുഭവപ്പെടുന്ന തരത്തിലേക്കു പിണറായി സര്ക്കാരിന്റെ പ്രവര്ത്തനം ഉയര്ന്നേ തീരൂവെന്നും സെക്രട്ടേറിയറ്റ് വ്യക്തമാക്കിയിരുന്നു.
വിമര്ശനങ്ങള് ഉള്ക്കൊണ്ടുള്ള തിരുത്തല് നടപടി വേണമെന്നു പൊളിറ്റ് ബ്യൂറോയ്ക്കു വേണ്ടി സിപിഎം ജനറല് സെക്രട്ടറി സീതാറാം യച്ചൂരിയും ആവശ്യപ്പെട്ടു. ഇതിനാവശ്യമായ നടപടികളെടുക്കുമെന്നു മുഖ്യമന്ത്രി പിണറായി വിജയന് പാര്ട്ടിക്ക് ഉറപ്പു നല്കുകയും ചെയ്തു. അതേസമയം വിമര്ശനങ്ങള് സദുദ്ദേശ്യപരമായിരുന്നുവെന്നു പാര്ട്ടി കേന്ദ്രങ്ങള് ചൂണ്ടിക്കാട്ടി.
വിഎസ് സര്ക്കാരിന്റെ കാലത്ത് എന്നതുപോലെ പാര്ട്ടിയും സര്ക്കാരും ഏറ്റുമുട്ടലില് അല്ല. സര്ക്കാരിനെ നന്നാക്കാന് പാര്ട്ടി ഇടപെടുന്നു എന്നാണ് ഔദ്യോഗികഭാഷ്യം. എല്ലാ വകുപ്പുകളുടെയും പ്രവര്ത്തനം സെക്രട്ടേറിയറ്റ് അവലോകനം ചെയ്തു. പലതും തൃപ്തികരമെന്ന കാഴ്ച്ചപ്പാടാണു സംസ്ഥാന സെക്രട്ടറി കോടിയേരി ബാലകൃഷ്ണന്റെ റിപ്പോര്ട്ടില്. എന്നാല് അതിന്മേല് നടന്ന ചര്ച്ചകളില് അതേ മതിപ്പ് സെക്രട്ടേറിയറ്റ് അംഗങ്ങള് പ്രകടിപ്പിക്കുന്നില്ല. പൊലീസിനും വിജിലന്സിനുമെതിരെ കടുത്ത വിമര്ശനമുയര്ന്നു. പൊലീസിലും വിജിലന്സിലും ഒരു നിയന്ത്രണവും ഇല്ലെന്ന വിമര്ശനം ഗൗരവമായി കണ്ടു മാറ്റം വേണമെന്ന നിര്ദേശമുണ്ടായി.
https://www.facebook.com/Malayalivartha
