രണ്ടു ലക്ഷം രൂപയുടെ കുഴല്‍പ്പണം പിടികൂടിയ കാര്‍ വിട്ടയ്ക്കുന്നതിനു മുന്‍പു വന്ന അജ്ഞാത ടെലിഫോണ്‍ സന്ദേശത്തെ തുടര്‍ന്ന് പൊലീസ് വീണ്ടും പരിശോധിച്ചപ്പോള്‍ രഹസ്യ അറയില്‍നിന്നും പിടികൂടിയത് 48 ലക്ഷം രൂപ. കോഴിക്കോട് കുന്ദമംഗലം പൊലീസാണ് കാറില്‍നിന്ന് അരക്കോടി രൂപയുടെ കുഴല്‍പ്പണം കണ്ടെത്തിയത്.

കോഴിക്കോട് കുന്ദമംഗലം എസ്.ഐ: വി.വി.വിമലും സംഘവും വാഹന പരിശോധനയ്ക്കിടെ കാറില്‍നിന്ന് രണ്ടു ലക്ഷം രൂപയുടെ കുഴല്‍പ്പണം പിടികൂടിയത് നാലു ദിവസം മുമ്പായിരുന്നു. കാറിലുണ്ടായിരുന്ന കൊടുവള്ളി സ്വദേശികളായ ജംഷീറിനേയും യൂനിസിനേയും അന്നുതന്നെ ജാമ്യത്തില്‍വിട്ടു. കോടതിയില്‍ ഹാജരാക്കിയ കാര്‍ വിട്ടുകൊടുക്കാന്‍ നടപടിക്രമങ്ങളും തുടങ്ങിയിരുന്നു.

ഇതിനിടെ, നോര്‍ത്ത് അസിസ്റ്റന്റ് കമ്മിഷണര്‍ ഇ.പി. പൃഥ്വിരാജിന് ലഭിച്ച അജ്ഞാത ഫോണ്‍ കോളായിരുന്നു വഴിത്തിരിവായത്. കാറിന്റെ രഹസ്യഅറയില്‍ വന്‍കുഴല്‍പ്പണം ഉണ്ടെന്നായിരുന്നു വിവരം. കോടതിയുടെ അനുമതിയോടെ കാര്‍ പരിശോധിച്ചപ്പോള്‍ പൊലീസ് ഞെട്ടി. മുന്‍വശത്തെ രഹസ്യഅറയില്‍ 48 ലക്ഷം രൂപ. രണ്ടു ബാഗുകളിലായാണ് പണം ഒളിപ്പിച്ചത്.

പ്രതികളുടെ ജാമ്യം റദ്ദാക്കാന്‍ പൊലീസ് കോടതിയെ സമീപിച്ചിട്ടുണ്ട്. പണത്തിന്റെ ഉറവിടം കണ്ടെത്താന്‍ പൊലീസ് അന്വേഷണം തുടരും. കാര്‍ വീണ്ടും പരിശോധിക്കാതെ വിട്ടിരുന്നെങ്കില്‍ 48 ലക്ഷം രൂപ കുഴല്‍പ്പണ സംഘത്തിന് ലഭിക്കുമായിരുന്നു. ഈ കണക്കുകൂട്ടലാണ് അജ്ഞാത ഫോണ്‍ കോള്‍ പൊളിച്ചത്.