ക്യാമറക്കണ്ണുകള്‍ക്ക് നടുവില്‍ നടുറോഡില്‍ പൊരിവെയിലത്ത് ഒരു പാവം അമ്മയുടെ അടിവയറ്റിലേക്ക് ബൂട്ടിട്ട ഷൂസ് കൊണ്ട് ആഞ്ഞ്‌തൊഴിച്ച് കേരള പോലീസ് ശക്തി തെളിയിച്ചു. ഇത് കേരള സമൂഹത്തിന് അപമാനം. ആ അമ്മയുടെ കണ്ണീര്‍ ചോരയില്‍ ചാലിച്ച നിലവിളി ചെന്നെത്തുന്നത് കേരള സമൂഹത്തിന്റെ മാറില്‍. ആര്‍ക്കും ഉണ്ടാകരുത് ഇത്തരമൊരവസ്ഥ. സിനിമാ സ്‌റ്റൈലില്‍ റോഡിലൂടെ വലിച്ചിഴക്കാന്‍ മാത്രം എന്തുപാതകമാണവര്‍ ചെയ്തത്. സര്‍ക്കാരും പോലീസും മറുപടി പറഞ്ഞേ പറ്റൂ. സംസ്ഥാനത്ത് പോലീസ് രാജെങ്കില്‍ എന്തിനാണൊരു സര്‍ക്കാര്‍. എല്ലാം ശരിയാക്കാനെത്തിയവരെക്കൊണ്ട് പൊറുതിമുട്ടിയ അവസ്ഥ. 
ഡിജിപി ഓഫീസിനു മുന്നിലെ റോഡില്‍ കിടന്ന് പ്രതിഷേധിച്ച മഹിജയെ പോലീസ് വലിച്ചിഴച്ച് പോലീസ് വാനിലേക്ക് നീക്കുകയായിരുന്നു. 
രാവിലെ 10 മണിയോടെയാണ് തലസ്ഥാനത്ത് പോലീസ് അതിക്രമം അരങ്ങേറിയത് 
ജിഷ്ണു പ്രണോയിയുടെ മരണത്തില്‍ ഉത്തരവാദികളായവരെ അറസ്റ്റ് ചെയ്യണമെന്നാവശ്യപ്പെട്ട് ഡിജിപി ഓഫീസിന് മുന്നില്‍ സമരം ചെയ്യാനെത്തിയ ജിഷ്ണുവിന്റെ മാതാപിതാക്കളെയും ബന്ധുക്കളെയും പോലീസ് തടഞ്ഞു. ഇവരെ ബലം പ്രയോഗിച്ച് നീക്കാനുള്ള പോലീസിന്റെ ശ്രമം സംഘര്‍ഷത്തില്‍ കലാശിച്ചു. ഇതിനിടെ ജിഷ്ണുവിന്റെ കുടുംബവുമായി സംസാരിക്കാമെന്ന് ഡിജിപി ലോക്‌നാഥ് ബെഹ്‌റ അറിയിച്ചു.
ഡിജിപി ഓഫീസിന് മുന്നിലെ പൊതുജനങ്ങള്‍ക്ക് അനുവദിച്ച കസേരയില്‍ ഇരുന്ന് സമരം ചെയ്ത് ശാന്തമായി തിരിച്ചുപോകുമെന്ന് ബന്ധുക്കള്‍ അറിയിച്ചുവെങ്കിലും പോലീസ് വഴങ്ങിയില്ല. ജിഷ്ണുവിന്റെ മാതാപിതാക്കളും കുടുംബക്കാരുമടക്കം 14 പേരാണ് സമരത്തിനെത്തിയത്.സംഘര്‍ഷത്തെത്തുടര്‍ന്ന് ബന്ധുക്കളെ പോലീസ് ബലംപ്രയോഗിച്ച് അറസ്റ്റ് ചെയ്ത് വാനിലേക്ക് നീക്കി. ഏറെനേരം റോഡില്‍ കിടന്ന് പ്രതിഷേധിച്ച ജിഷ്ണുവിന്റെ അമ്മ മഹിജയെ റോഡിലൂടെ വലിച്ചിഴച്ചാണ് പോലീസ് വാനിലേക്ക് കയറ്റിയത്. 
മഹിജയെ ചവിട്ടിയെന്നാണ് ആരോപണം. വയറ്റില്‍ മര്‍ദനമേറ്റതിന്റെ പാടുണ്ടെന്നാണ് ആശുപത്രിയില്‍ നിന്നുള്ള വിവരം. ഇവര്‍ക്ക് വിശദമായ പരിശോധന വേണമെന്നാണ് ആശുപത്രി അധികൃതര്‍ പറയുന്നത്. സമാധാന പരമായി സമരം നടത്താനെത്തിയ തങ്ങള്‍ക്ക് നേരെ പോലീസ് പ്രകോപനം അഴിച്ചുവിടുകയായിരുന്നുവെന്നും ആരോപണം ഉണ്ട്. ബുധനാഴ്ച രാവിലെയാണ് ജിഷ്ണുവിന്റെ കുടുംബം ഡിജിപി ഓഫീസിനു മുന്നില്‍ സമരത്തിനെത്തിയത്. ഏറെ നാടകീയ രംഗങ്ങള്‍ക്കൊടുവില്‍ സമരത്തിനെത്തിയവരെ അറസ്റ്റ് ചെയ്ത് നീക്കുകയായിരുന്നു. ജിഷ്ണുവിന്റെ അമ്മ, അച്ഛന്‍, അമ്മാവന്‍ ഉള്‍പ്പെടെയുള്ള കുടുംബാംഗങ്ങളും ജിഷ്ണുവിന്റെ സഹപാഠികളുമാണ് സമരത്തിനെത്തിയത്. സമരത്തിനെത്തിയ എല്ലാവരെയും പോലീസ് അറസ്റ്റ് ചെയ്ത് നീക്കുകയായിരുന്നു
പാമ്പാടി നെഹ്രു കോളേജ് വിദ്യാര്‍ഥി ജിഷ്ണു പ്രണോയിയുടെ മരണത്തിന് ഉത്തരവാദിയായവരെ അറസ്റ്റ് ചെയ്യാത്തതില്‍ പ്രതിഷേധിച്ച് ഡിജിപി ഓഫീസിനു മുന്നില്‍ സമരം ചെയ്യാനെത്തിയ ജിഷ്ണുവിന്റെ കുടുംബത്തിനു നേരെ ഉണ്ടായ പോലീസ് ബലപ്രയോഗത്തില്‍ ജിഷ്ണുവിന്റെ അമ്മ മഹിജയ്ക്ക് പരുക്ക്. മഹിജയുടെ കൈക്കും മറ്റ് ശരീര ഭാഗങ്ങളിലും പരുക്കേറ്റതായാണ് വിവരം. പോലീസ് അറസ്റ്റ് ചെയ്ത് നീക്കിയ മഹിജയെ പേരൂര്‍ക്കട സര്‍ക്കാര്‍ ആശുപത്രിയില്‍ പ്രവേശിപ്പിച്ചു. 
പോലീസുമായുള്ള ബലപ്രയോഗത്തിനിടെ ദേഹാസ്വാസ്ഥ്യം അനുഭവപ്പെട്ടതിനെ തുടര്‍ന്നാണ് മഹിജയെ ആശുപത്രിയില്‍ പ്രവേശിപ്പിച്ചത്. പോലീസ് മഹിജയെ മര്‍ദിച്ചതായി ആരോപണം ഉയര്‍ന്നിട്ടുണ്ട്. മഹിജയ്ക്ക് രക്ത സമമര്‍ദം കുറഞ്ഞതായാണ് വിവരം. സമരത്തിന് വരുമ്പോള്‍ തന്നെ മഹിജയ്ക്ക് ആരോഗ്യ പ്രശ്‌നങ്ങള്‍ ഉണ്ടായിരുന്നതായി ബന്ധുക്കള്‍ പറയുന്നു. ഇക്കാര്യം പോലീസിനോട് പറഞ്ഞിട്ടും ബലംപ്രയോഗിക്കുകയായിരുന്നുവെന്നാണ് ബന്ധുക്കള്‍ പറയുന്നു. 
സംഭവത്തില്‍ സര്‍ക്കാര്‍ വ്യക്തത വരുത്തി ശക്തമായ അന്വേഷണം നടത്തണം. തുടര്‍ന്നും സമരം നടത്താനാണ് ജിഷ്ണുവിന്റെ വീട്ടുകാരുടെ പരിപാടി. സംഭവത്തില്‍ പ്രതിഷേധിച്ച് നാളെ തലസ്ഥാനത്തും കോഴിക്കോടും കോണ്‍ഗ്രസ് ഹര്‍ത്താലിന് ആഹ്വാനം ചെയ്തു. 

കൊല്ലപ്പെട്ട മകന്റെ ആത്മാവിന് നീതിതേടിയെത്തിയ ഒരു പാവം അമ്മക്ക് കേരള മുഖ്യന്റേയും ഡിജിപിയുടേയും മൂക്കിന് താഴെ ഇതാണ് അവസ്ഥയെങ്കില്‍ മറ്റൊന്നും പറയാനില്ല. പോലീസ് ഇരക്കൊപ്പമോ വേട്ടക്കാരനൊപ്പമോ എന്ന സത്യം ഈ സംഭവത്തലൂടെ പുറത്തായി.