സഹകരണ ഓര്ഡിനന്സ് ഇറങ്ങി : ജില്ലാ സഹകരണ ബാങ്ക് ഭരണസമിതികള് ഇനി ഇല്ല
ജില്ലാ സഹകരണ ബാങ്കുകളുടെ അംഗത്വം പ്രാഥമിക കാര്ഷിക സഹകരണ സംഘങ്ങള്ക്കും അര്ബന് സഹകരണ ബാങ്കുകള്ക്കുമായി പരിമിതപ്പെടുത്തി സര്ക്കാര് ഓര്ഡിനന്സ്. ഇതോടെ സംസ്ഥാനത്തെ ജില്ലാ സഹകരണ ബാങ്ക് ഭരണസമിതികള്ക്കു ദയാവധം.
ഓര്ഡിനന്സിലൂടെ വോട്ടവകാശം പ്രാഥമിക കാര്ഷിക സഹകരണ സംഘങ്ങള്ക്കും അര്ബന് സഹകരണ ബാങ്കുകള്ക്കും മാത്രമായി നിജപ്പെടുത്തിയതോടെ നിലവിലെ സമിതിയംഗങ്ങളായ മറ്റു സഹകരണ സ്ഥാപനങ്ങളുടെ പ്രതിനിധികള്ക്ക് ജില്ലാ ഭരണസമിതിയില് അയോഗ്യത കല്പ്പിക്കപ്പെട്ടു. ഓര്ഡിനന്സ് പ്രകാരം മറ്റു സഹകരണ സംഘങ്ങള്ക്കും ജില്ലാ ബാങ്കില് അംഗത്വമുണ്ടാകില്ല. നിലവില് യു.ഡി.എഫ്. നയിക്കുന്നതാണ് സംസ്ഥാനത്തെ 14 ജില്ലാ സഹകരണബാങ്ക് ഭരണസമിതികളും. ഇന്നലത്തെ മന്ത്രിസഭായോഗശേഷമാണ് ഓര്ഡിനന്സ് നിലവില്വന്ന തീരുമാനം പുറത്തുവന്നത്.
സഹകരണ സംഘങ്ങളുടെ പ്രവര്ത്തനം സംബന്ധിച്ച് സഹകരണ രജിസ്ട്രാറുടെ നേതൃത്വത്തിലുള്ള സമിതി പഠനം നടത്തിയിരുന്നു. ഈ സമിതിയുടെ ശിപാര്ശകളുടെ അടിസ്ഥാനത്തിലാണ് നിയമഭേദഗതി കൊണ്ടുവന്നത്. ഓര്ഡിനന്സ് പ്രാബല്യത്തില് വന്നതോടെ ജില്ലാ സഹകരണ ബാങ്കുകളിലെ ഭരണസമിതികള് ഇല്ലാതായി.
ബാങ്കുകളിലെ ഭരണസ്തംഭനം ഒഴിവാക്കാന് അഡ്മിനിസ്ട്രേറ്റീവ് കമ്മിറ്റിയെയോ അഡ്മിനിട്രേറ്ററെയോ നിയമിക്കാന് സഹകരണ രജിസ്ട്രാര്ക്ക് ഓര്ഡിനന്സ് അധികാരം നല്കുന്നു. അഡ്മിനിട്രേറ്റിവ് കമ്മിറ്റിയുടെ കാലാവധി പരമാവധി ഒരു വര്ഷമായിരിക്കും. അതിനുമുമ്പ് നിയമാനുസരണം പുതിയ ഭരണസമിതിയെ തെരഞ്ഞെടുക്കണം.
കാര്ഷിക സഹകരണ സംഘങ്ങള് ഒഴികെയുള്ള മറ്റു സൊസൈറ്റികള്ക്ക് ജില്ലാ ബാങ്കില് നോമിനല് അംഗത്വം നല്കും. അവര്ക്ക് വായ്പ ലഭിക്കുന്നതിന് അവകാശമുണ്ടായിരിക്കും. വാര്ഷിക പൊതുയോഗത്തില് തുടര്ച്ചയായി മൂന്നുതവണ പങ്കെടുക്കാതിരുന്നാലോ സംഘം നല്കുന്ന സേവനങ്ങള് തുടര്ച്ചയായി രണ്ടു വര്ഷം പ്രയോജനപ്പെടുത്താതിരുന്നാലോ ബന്ധപ്പെട്ട സംഘത്തിന് അംഗത്വം നഷ്ടപ്പെടുന്ന വ്യവസ്ഥ നിലവിലെ നിയമത്തിലുണ്ടായിരുന്നു. പരാതികളും കേസുകളും ഉയര്ന്ന സാഹചര്യത്തില് മേല്പ്പറഞ്ഞ വ്യവസ്ഥകള് പുതിയ നിയമത്തില് ഒഴിവാക്കി.
ജില്ലാ സഹകരണ ബാങ്കുകളുടെ നിക്ഷേപത്തില് 70 ശതമാനവും പ്രാഥമിക കാര്ഷിക സഹകരണ സംഘങ്ങളുടെതാണ്. വായ്പയില് സിംഹഭാഗവും നല്കുന്നതും പ്രാഥമിക കാര്ഷിക സഹകരണ സംഘങ്ങള്ക്കാണ്. കാര്ഷിക മേഖല പ്രതിസന്ധി നേരിടുമ്പോള് കൂടുതല് ഫലപ്രദമായി ഇടപെടല് നടത്താന് പുതിയ ഭേദഗതി പ്രയോജനപ്പെടുമെന്നാണു ചൂണ്ടിക്കാണിക്കപ്പെടുന്നത്.
https://www.facebook.com/Malayalivartha
