ശമ്പളവും പെന്‍ഷനും നല്‍കാത്ത നടപടിയില്‍ പ്രതിഷേധിച്ച് 14ന് ഐഎന്‍ടിയുസി കെഎസ്ആര്‍ടിസിയില്‍ പണിമുടക്കുന്നു. ജൂണ്‍ 14 അര്‍ദ്ധ രാത്രി മുതല്‍ ജൂണ്‍ 15 രാത്രിവരെയാണ് ഐഎന്‍ടിയുസിയുടെ നേതൃത്വത്തിലുള്ള ടിഡിഎഫ് പണിമുടക്കുന്നതെന്ന് ഫെഡറേഷന്‍ സംസ്ഥാന പ്രസിഡന്റ് തമ്പാനൂര്‍ രവി അറിയിച്ചു. ചരിത്രത്തിലെ ഏറ്റവും വലിയ തൊഴിലാളി പീഡനമാണ് കഴിഞ്ഞ ഒരു വര്‍ഷത്തെ എല്‍ഡിഎഫ് ഭരണത്തില്‍ കെഎസ്ആര്‍ടിസിയില്‍ നടക്കുന്നതെന്നും അദ്ദേഹം പറഞ്ഞു.

സ്‌കൂള്‍ തുറക്കുന്ന മാസമായിട്ടു പോലും മേയ് മാസത്തെ ശമ്പളം ജൂണ്‍ 10 കഴിഞ്ഞിട്ടും നല്‍കിയിട്ടില്ല. 40,000 തൊഴിലാളികള്‍ക്ക് ശമ്പളവും 38,000 പേര്‍ക്ക് പെന്‍ഷനും മുടങ്ങിയിരിക്കുന്നു.

എംപാനല്‍ ജീവനക്കാരെ സ്ഥിരപ്പെടുത്തല്‍ ഉറപ്പു പറഞ്ഞ സര്‍ക്കാര്‍ ഇപ്പോള്‍ കൂട്ടത്തോടെ പിരിച്ചു വിടുകയാണ്. സമരം ചെയ്യുന്നവര്‍ക്കെതിരെ നടപടിയെടുക്കുമെന്ന സര്‍ക്കാര്‍ ഭീഷണി ജനങ്ങള്‍ തള്ളിക്കളയുമെന്നും അദ്ദേഹം പ്രസ്താവനയില്‍ പറഞ്ഞു.

സര്‍ക്കാരിന്റെ തൊഴിലാളി പീഡനത്തിനെതിരെ ടിഡിഎഫ് നേതൃത്വത്തില്‍ ജൂണ്‍14 ന് അര്‍ദ്ധരാത്രി മുതല്‍ 15 തീയതി അര്‍ദ്ധ രാത്രി വരെ കെ എസ്ആര്‍ടിസി ജീവനക്കാര്‍ പണിമുടക്കാന്‍ തീരുമാനിച്ചിട്ടുണ്ട്.