കെഎസ്ആര്‍ടിസിക്ക് സഹായ ഹസ്തവുമായി എന്‍സിപിയുടെ ദേശീയ അധ്യക്ഷന്‍ ശരദ് പവാര്‍. ശമ്പളം കൊടുക്കാന്‍പോലും പണമില്ലാതെ നഷ്ടക്കയത്തിലായ കെഎസ്ആര്‍ടിസിക്ക് 1600 കോടി രൂപ മഹാരാഷ്ട്രയിലെ ബാങ്കുകളില്‍നിന്നു കുറഞ്ഞ പലിശനിരക്കില്‍ ലഭ്യമാക്കാമെന്നാണു ഗതാഗത മന്ത്രി തോമസ് ചാണ്ടിയുടെ പാര്‍ട്ടിയായ എന്‍സിപിയുടെ ദേശീയ അധ്യക്ഷന്‍ ശരദ് പവാര്‍ പറഞ്ഞത്.

കേരളത്തിലെ ബാങ്കുകളില്‍നിന്നും വായ്പ ലഭിക്കുന്നതിലുള്ള സാങ്കേതിക പ്രശ്‌നങ്ങള്‍ തോമസ് ചാണ്ടി അദ്ദേഹത്തിന്റെ ശ്രദ്ധയില്‍ പ്പെടുത്തിയതിനെ തുടര്‍ന്നാണ് മുഖ്യമന്ത്രി പിണറായി വിജയന്‍, ധനമന്ത്രി ടി.എം.തോമസ് ഐസക് എന്നിവരുടെ അംഗീകാരത്തോടെ പവാറുമായി തോമസ് ചാണ്ടി ചര്‍ച്ച നടത്തിയത്.

കെഎസ്ആര്‍ടിസിയുടെ നിലവിലെ കടം 4000 കോടി രൂപയാണ്. ഇതില്‍ പല ധനകാര്യ സ്ഥാപനങ്ങളില്‍നിന്നായി എടുത്ത ഹ്രസ്വകാല വായ്പ 1600 കോടി വരുംഇതിന് പലിശയിനത്തില്‍ തന്നെ പ്രതിദിനം 2.61 കോടിയാണ് കെഎസ്ആര്‍ടിസി അടയ്ക്കുന്നത്. ശരാശരി അഞ്ചരക്കോടി രൂപ മാത്രമാണു പ്രതിദിന വരുമായി ലഭിക്കുന്നത്. ഈ വായ്പകള്‍ ദീര്‍ഘകാല വായ്പയെടുത്തു തിരിച്ചടച്ചാല്‍ ശമ്പളത്തിനുള്ള തുക കെഎസ്ആര്‍ടിസി വരുമാനത്തില്‍നിന്നു തന്നെ കണ്ടെത്താനാകുമെന്നും എല്ലാ മാസവും വായ്പയ്ക്കായി അലയേണ്ടി വരില്ലെന്നുമാണു വിലയിരുത്തല്‍. ദീര്‍ഘകാല വായ്പയ്ക്കായി കേരളത്തിലെ ബാങ്കുകളുടെ കണ്‍സോര്‍ഷ്യവുമായി ചര്‍ച്ച നടത്തിയെങ്കിലും 11%-13% പലിശ ആവശ്യപ്പെട്ടതോടെ സര്‍ക്കാര്‍ പിന്മാക്കുകയായിരുന്നു.

അതിനെ തുടര്‍ന്നാണു മന്ത്രി തോമസ് ചാണ്ടി പവാറുമായി ചര്‍ച്ച നടത്തിയത്. 10 ശതമാനത്തില്‍ താഴെ പലിശയ്ക്കു വായ്പ ലഭിക്കുമെന്നാണു പ്രതീക്ഷ. 10 വര്‍ഷമെങ്കിലും കാലാവധിയുള്ള വായ്പയാണു തേടുന്നത്. സര്‍ക്കാര്‍ ഈടുനില്‍ക്കും. നിലവില്‍ പ്രതിമാസം 270 കോടിയാണു കെഎസ്ആര്‍ടിസിയുടെ പ്രവര്‍ത്തനച്ചെലവ്. വരുമാനം 170 കോടിയും.

ഡിപ്പോകള്‍ പണയം വച്ചു ജില്ലാ സഹകരണബാങ്കുകളില്‍ നിന്ന് 70 കോടിയോളം രൂപ വായ്പയെടുത്താണു ശമ്പളം നല്‍കുന്നത്. പെന്‍ഷന്‍ സര്‍ക്കാരിന്റെ പ്രത്യേക സാമ്പത്തിക സഹായത്തോടെയും. രണ്ടുമാസത്തെ പെന്‍ഷന്‍ തുകയാണു നിലവില്‍ കുടിശികയുള്ളത്.