എമര്ജന്സി ലൈറ്റ് പൊട്ടിത്തെറിച്ച് വീടിന് തീപിടിച്ചു; വീട്ടുകാര് രക്ഷപ്പെട്ടത് തലനാരിഴയ്ക്ക്
എമര്ജന്സി ലൈറ്റ് ചാര്ജ് ചെയ്യുന്നതിനിടയില് പൊട്ടിത്തെറിച്ചു വീടിനു തീപിടിച്ചു. വീട്ടുകാര് രക്ഷപ്പെട്ടതു തലനാരിഴയ്ക്ക്. പള്ളിക്കല് ഷാജി മന്സിലില് അന്സാറിന്റെ വീട്ടില് കഴിഞ്ഞദിവസം രാത്രി 12.30നായിരുന്നു സംഭവം.
വീട്ടിലെ ഒരു മുറിയും ഡൈനിങ് ഹാളും മെയിന്ഹാളും തീയിലമര്ന്നു. ചുവരുകള് പൊട്ടി. സീലിങ് അടര്ന്നു വീണു. ജനലുകളും കതകും നശിച്ചു. ഇലക്ട്രോണിക് ഉപകരണങ്ങളും കുട്ടികളുടെ ഡ്രസുകളും സര്ട്ടിഫിക്കറ്റ്, പുസ്തകങ്ങള് ഉള്പ്പെടെ വിലപിടിപ്പുള്ള പലതും പൂര്ണമായും കത്തി ചാരമായി. രണ്ടു ദിവസം മുന്പു വാങ്ങിയ എമര്ജന്സി ലൈറ്റ് അടുത്ത മുറിയില് ചാര്ജ് ചെയ്തശേഷം ഉറങ്ങുമ്പോഴായിരുന്നു അപകടം.
ഉഗ്ര സ്ഫോടന ശബ്ദം കേട്ട് അന്സാര് ഉണര്ന്നു നോക്കുമ്പോള് അടുത്ത മുറിയില്നിന്നു തീയും പുകയും ഉയരുന്നതാണു കണ്ടത്. കിടപ്പുമുറിയിലേക്കും തീ പടരുന്നതിനു മുന്പ് അടുക്കള വാതില് ചവിട്ടിത്തുറന്നാണു കുട്ടികളെയും ഭാര്യയെയും പുറത്തിറക്കിയത്. ഉടന് തന്നെ പള്ളിക്കല് പൊലീസിനെ വിവരമറിയിച്ചു.
തുടര്ന്ന് ആറ്റിങ്ങല് ഫയര്ഫോഴ്സെത്തി തീ അണച്ചു. അഞ്ചു ലക്ഷം രൂപയുടെ നഷ്ടം കണക്കാക്കുന്നതായി അന്സാര് പറഞ്ഞു.
https://www.facebook.com/Malayalivartha
