കെ.എസ്.ആര്‍.ടി.സിയിലെ സ്ഥിരം യാത്രക്കാരെ ലക്ഷ്യമിട്ട് ഗതാഗത വകുപ്പ് പുറത്തിറക്കിയ സ്മാര്‍ട്ട് കാര്‍ഡ് ഖജനാവിലെത്തിച്ചത് 1.53 കോടിരൂപ. കാര്‍ഡുകള്‍ പുറത്തിറക്കി നാലുമാസം പിന്നിടുമ്പോഴുള്ള കണക്കാണിത്. ഇക്കാലയളവില്‍ 10,901 കാര്‍ഡുകള്‍ മാത്രമാണ് സംസ്ഥാനത്താകെ വിതരണം ചെയ്തിട്ടുള്ളത്. ജനുവരി 24ന് പുതുവര്‍ഷ സമ്മാനമായാണ് ഗതാഗത വകുപ്പ് സ്മാര്‍ട്ട് കാര്‍ഡുകള്‍ അവതരിപ്പിച്ചത്.

വില്‍പ്പനയില്‍ ഒന്നാമത് തിരുവന്തപുരം ജില്ലയാണ്. ഇവിടെ 4,806 കാര്‍ഡുകള്‍ വിതരണം ചെയ്തു. 61ലക്ഷം രൂപയാണ് ജില്ലയുടെ വരുമാനം. 1,081 കാര്‍ഡുകള്‍ വിതരണം ചെയ്ത് കൊല്ലം ജില്ലയാണ് രണ്ടാം സ്ഥാനത്തുള്ളത്. 16.37 ലക്ഷമാണ് കൊല്ലം ജില്ലയില്‍ നിന്നുള്ള വരുമാനം. തൊട്ട് പിന്നില്‍ എറണാകുളം ജില്ലയാണ്. 1013 കാര്‍ഡുകള്‍ വിതരണം ചെയ്ത് 16.03 ലക്ഷംഎറണാകുളത്ത് നിന്ന് ഖജനാവിലെത്തി.

എറ്റവും കുറവ് കാര്‍ഡുകള്‍ വിതരണം ചെയ്തിട്ടുള്ളത് മലപ്പുറത്താണ്. കേവലം 160 കാര്‍ഡുകള്‍ മാത്രമാണ് ഇവിടെ വിതരണം ചെയ്തിട്ടുള്ളത്. 2.47ലക്ഷം രൂപയാണ് മലപ്പുറത്തിന്റെ ആകെ വരുമാനം. എന്നാല്‍, 175 കാര്‍ഡ് വിറ്റ കണ്ണൂരിനാണ് കുറഞ്ഞ വരുമാനം, 2.24 ലക്ഷം.

1,000 രൂപയുടെ ബ്രൗണ്‍സ് കാര്‍ഡില്‍ നിന്നാണ് കൂടുതല്‍ വരുമാനം സ്വന്താമാക്കിയിട്ടുള്ളത്. സില്‍വര്‍ കാര്‍ഡും ഗോള്‍ഡ് കാര്‍ഡും മികച്ച വരുമാനം കണ്ടെത്താന്‍ സഹായിച്ചപ്പോള്‍ പ്രീമിയം യാത്രാ കാര്‍ഡ് ഡിപ്പോയെ നിരാശപ്പെടുത്തി. സില്‍വര്‍ കാര്‍ഡിന് 1,500 രൂപയും ഗോള്‍ഡ് കാര്‍ഡിന് 3,000 രൂപയുമാണ് നിരക്ക്. 5,000രൂപയാണ് പ്രീമിയം കാര്‍ഡിനുള്ളത്. പ്രീമിയം കാര്‍ഡിന് ജനപ്രീതി കുറവാണെന്നാണെന്ന് കോര്‍പ്പറേഷന്റെ വിലയിരുത്തല്‍.

നിശ്ചിത തുകയ്ക്കുള്ള ഈ പാസുകള്‍ എടുക്കുന്നവര്‍ക്ക് സ്മാര്‍ട്ട് കാര്‍ഡ് വഴി ബസുകളില്‍ ഒരുമാസം യഥേഷ്ടം യാത്ര ചെയ്യാമെന്നുള്ളതാണ് പദ്ധതി. ജില്ലയ്ക്കുള്ളിലെ സിറ്റി, സിറ്റി ഫാസ്റ്റ്, ഓര്‍ഡിനറി, ലിമിറ്റഡ് സ്‌റ്റോപ്പ് ഓര്‍ഡിനറി എന്നീ സര്‍വീസുകളില്‍ ബ്രോണ്‍സ് കാര്‍ഡുകള്‍ ഉപയോഗിക്കാം.

സില്‍വര്‍ കാര്‍ഡുകള്‍ ഉപയോഗിച്ച് സിറ്റി, സിറ്റി ഫാസ്റ്റ്, ഓര്‍ഡിനറി, ലിമിറ്റഡ് സ്‌റ്റോപ്പ്, ടൗണ്‍ ടു ടൗണ്‍ ഓര്‍ഡിനറി, ജന്റം നോണ്‍ എ.സി സര്‍വീസുകളില്‍ യാത്ര ചെയ്യാന്‍ സാധിക്കും.

ഗോള്‍ഡ് കാര്‍ഡ് സൂപ്പര്‍ഫാസ്റ്റ്, ഫാസ്റ്റ്, ഓര്‍ഡിനറി, ലിമിറ്റഡ്, ടി.ടി, സിറ്റി, സിറ്റി ഫാസ്റ്റ്, ജന്റം നോണ്‍ എ.സി എന്നീ സര്‍വീസുകളിലും പ്രീമിയം കാര്‍ഡുകള്‍ ജന്റം എ.സി, ജന്റം നോണ്‍ എ.സി, സൂപ്പര്‍ ഫാസ്റ്റ്, ഫാസ്റ്റ്, ഓര്‍ഡിനറി, ലിമിറ്റഡ് സ്‌റ്റോപ്പ്, ടി.ടി, സിറ്റി, സിറ്റി ഫാസ്റ്റ് എന്നീ ബസുകളിലും ഉപയോഗിക്കാം.

ഡിപ്പോകളിലും സ്‌റ്റേഷന്‍ മാസ്റ്റര്‍ ഓഫീസുകളിലുമാണ് കാര്‍ഡുകള്‍ ലഭിക്കുക. ഓഫീസില്‍ നിന്നും ലഭിക്കുന്ന അപേക്ഷ പൂരിപ്പിച്ച് നല്‍കുന്നതിനോടൊപ്പം ഫോട്ടോ പതിച്ച തിരിച്ചറിയല്‍ കാര്‍ഡിന്റെ പകര്‍പ്പും അസലും ഹാജരാക്കണം. റെയില്‍ വേ സീസണ്‍ ടിക്കറ്റ് മാതൃകയില്‍ നടപ്പാക്കുന്ന ട്രാവല്‍ കാര്‍ഡുകള്‍ ഉപയോഗിച്ച് പരിധിയില്ലാതെ ഒരു മാസക്കാലം യാത്രചെയ്യാം.

കണ്ടക്ടര്‍ യാത്രാ കാര്‍ഡിന്റെ നമ്പറും ഇറങ്ങേണ്ട സ്‌റ്റോപ്പിന്റെ ഫെയര്‍ സ്‌റ്റേജും ഇലക്ട്രോണിക് ടിക്കറ്റിംഗ് മെഷീനില്‍ രേഖപ്പെടുത്തും. സാമ്പത്തിക പ്രതിസന്ധിയില്‍ നിന്ന് കരകേറാനുള്ള പദ്ധതികളുടെ ഭാഗമായി സ്ഥിരം യാത്രാക്കാരുടെ സൗകര്യാര്‍ത്ഥമാണ് ട്രാവല്‍ കാര്‍ഡുകള്‍ പുറത്തിറക്കിയിരിക്കുന്നത്. കാലാവധി കഴിഞ്ഞാല്‍ ഇവ പണമടച്ച് പുതുക്കാം.