സമയം രാത്രിയാണ് കോളജ് ഹോസ്റ്റലിലെ ഒരു മുറിയില്‍ ഉറങ്ങാതെ കിടക്കുന്ന പെണ്‍കുട്ടി. മൊബൈലില്‍ ചാറ്റ് ചെയ്തുകൊണ്ടിരിക്കുന്ന ഇവളുടെ മനസില്‍ മറ്റുള്ളവര്‍ ഉറങ്ങട്ടേയെന്നാണ്. മറ്റൊന്നിനുമല്ല,സഹപാഠികളുടെ ഫോട്ടോയെടുത്ത് രസിക്കാന്‍. ഉറങ്ങിക്കിടക്കുന്നത്, അല്‍പം ചെരിഞ്ഞുകിടന്നാല്‍ അത്, ഷാളൊന്നു തെറ്റുന്‌പോള്‍ അങ്ങനെ ഒരിക്കല്‍ പോലും സഹപാഠികളില്‍ നിന്നും ഇത് ആരും അത് പ്രതീക്ഷിക്കുന്നുണ്ടാവില്ല. എന്നാല്‍ അതിനെക്കാള്‍ അപ്പുറത്ത് ഏവരേയും ഞെട്ടിച്ചത് ഈ ചിത്രങ്ങള്‍ കണ്ട് രസിക്കുന്നവരുടെ കൂട്ടത്തില്‍ അവരുടെ അധ്യാപകനും ഉണ്ടെന്നതാണ്. മൊബൈലില്‍ എടുത്ത പെണ്‍കുട്ടികളുടെ ചിത്രങ്ങള്‍ എത്തുന്നത് വിദ്യാര്‍ഥികള്‍ക്ക് മാതൃകയാവേണ്ട അധ്യാപകന്റെ ഫോണിലെ വാട്ട്‌സ് ആപ്പിലേക്കും ഇതെല്ലാം നടന്നതാകട്ടെ കോഴിക്കോട് ഗവ.ഫിസിക്കല്‍ എഡ്യുക്കേഷന്‍ കോളജില്‍. 

ഇതുകൊണ്ട് മാനം കെടുന്നത് ആ സ്ഥാപനത്തിലെ മൊത്തം വിദ്യാര്‍ഥികളാണ്. പലരും ഇപ്പോഴേ ആ ഹോസ്റ്റലില്‍നിന്നും പടിയിറങ്ങുന്നതിനെക്കുറിച്ച് ആലോചിച്ചു തുടങ്ങി. രക്ഷിതാക്കളുടെ നിര്‍ബന്ധമാണ് കാരണം. സംഭവം അന്വേഷിക്കുന്ന നടക്കാവ് പോലീസ് പറയുന്നതിങ്ങനെ- മിക്ക ദിവസങ്ങളിലും രാത്രിയില്‍ പ്രിന്‍സിപ്പലിന്റെ ചാര്‍ജ് വഹിച്ചിരുന്ന അധ്യാപകനും വിദ്യാര്‍ഥിനിയും തമ്മില്‍ അശ്ലീല സന്ദേശങ്ങളും ചിത്രങ്ങളും കൈമാറാറുണ്ടായിരുന്നു. അര്‍ധരാത്രിയിലാണ് ഇതെല്ലാം. സഹപാഠികളുടെ ചിത്രങ്ങള്‍ എടുത്ത് വിദ്യാര്‍ഥിനി അധ്യാപകന് കൈമാറുന്നത് പതിവായിരുന്നു. സഹപാഠികള്‍ ഉറങ്ങുന്ന ഫോട്ടോയും മറ്റുമാണ് ഈ രീതിയില്‍ അയച്ചിരുന്നത്.

ഇവരുടെ ഫോണ്‍ സന്ദേശങ്ങള്‍ പരിശോധിച്ച അന്വേഷണ ഉദ്യോഗസ്ഥര്‍ പോലും ഞെട്ടിപ്പോയെന്നാണ് അറിയുന്നത്. ശരീര വര്‍ണനകളും ചിത്രങ്ങളും രാത്രിയില്‍ പരസ്പരം കൈമാറിയിരുന്നതായി വ്യക്തമായിട്ടുണ്ട്. അധ്യാപകനും വിദ്യാര്‍ഥിനിയുമായി ഉണ്ടാവേണ്ട ബന്ധമായിരുന്നില്ല ഇവര്‍ തമ്മിലുണ്ടായിരുന്നതെന്ന് സഹപാഠികളും പറയുന്നു. മിക്ക സന്ദേങ്ങളും അര്‍ധരാത്രിക്കു ശേഷമായിരുന്നു. തന്റെ ഫോട്ടോ ഈ രീതിയില്‍ എടുക്കപ്പെട്ടുവെന്ന് മനസിലാക്കിയ സഹപാഠിയായ വിദ്യാര്‍ഥിനിയാണ് സംഭവം പുറംലോകത്തെ അറിയിച്ചത്. പ്രിന്‍സിപ്പല്‍ ചാര്‍ജുള്ള എസ്. എസ്. അഭിലാഷിന് കോളജിലെ ഒരു വിദ്യാര്‍ഥിനി അയച്ചുകൊടുത്ത ഫോട്ടോയ്ക്ക് കീഴില്‍ അദ്ദേഹം എഴുതിയ സന്ദേശമാണ് പ്രശ്‌നങ്ങള്‍ക്കിടയാക്കിയത്. ഈ സന്ദേശം ശ്രദ്ധയില്‍പ്പെട്ട വിദ്യാര്‍ഥിനിയാണ് നടക്കാവ് പോലീസില്‍ പരാതി നല്‍കിയത്. 

പരാതി നല്‍കിയ വിദ്യാര്‍ഥിനിയുടെ ഭര്‍ത്താവും സംഘവും കോളജിലെത്തി അധ്യാപകനെ കയ്യേറ്റം ചെയ്തതോടെയാണ് സംഭവം വിവാദമായത്. സംസ്ഥാനത്ത് നല്ല രീതിയില്‍ പ്രവര്‍ത്തിക്കുന്ന ലേഡീസ് ഹോസ്റ്റലുകള്‍ക്കെല്ലാം പേരുദോഷമുണ്ടാക്കാന്‍ ഇത്തരത്തിലുള്ള ചില സംഭവങ്ങള്‍ മാത്രം മതി. മൊബൈല്‍ ഫോണുകള്‍ യഥേഷ്ടം ഉപയോഗിക്കാമെന്നത് പലപ്പോഴും ചതിക്കുഴികളുണ്ടാകാന്‍ കാരണമാകുന്നു. ചില ലേഡീസ് ഹോസ്റ്റലുകളില്‍ ആര്‍ക്കും എപ്പോഴും കയറിവരാവുന്ന സ്ഥിതിയാണ്. വാര്‍ഡനെ മണിയടിച്ചാല്‍ മാത്രം മതി. ഫേസ് ബുക്ക്, വാട്ട്‌സ് ആപ്പ്, മെസഞ്ചര്‍ എന്നിങ്ങനെ സമയം തള്ളിനീക്കാന്‍ ഏറെ വഴികളുണ്ടെങ്കിലും അവിടെ തന്നെയാണ് ചതിക്കുഴികള്‍ വരുന്നതും.

ഹോസ്റ്റലുകളില്‍ താമസിച്ച് പഠിക്കുന്ന വിദ്യാര്‍ഥിനികളെ പ്രത്യേകം നോട്ട്' ചെയ്യുന്ന സഹപാഠികളും അധ്യാപകരും ഉണ്ട്. പലയിടത്തും മൈാബൈലുകള്‍ തന്നെയാണ് വില്ലനാകുന്നതെന്ന് പോലീസ് പറയുന്നു. പലപ്പോഴും ചതിക്കുഴികളില്‍ പെട്ടുകഴിഞ്ഞതിനുശേഷമാണ് വിവരങ്ങള്‍ അറിയുന്നത്. അപ്പോഴേക്കും ആത്മഹത്യയായി, പൊല്ലാപ്പായി. അതുകൊണ്ടുതന്നെ ഇക്കാര്യത്തില്‍ പോലീസിന് ഇടപെടുന്നതിന് പരിധിയുണ്ട്. പരാതി കിട്ടിയാല്‍ മാത്രമേ നടപടി എന്തെങ്കിലും എടുക്കാന്‍ കഴിയൂ. പലപ്പോഴും ഇത്തരം കേസുകള്‍ പുറത്തുവച്ചുതന്നെ മാനഹാനിയുടെ പേരില്‍ ഒത്തുതീര്‍പ്പാക്കുകയാണ് ചെയ്യുന്നത്.