കൊച്ചിക്ക് ഇന്ന് സ്വപ്നസാഫല്യം; കൊച്ചി മെട്രോ പ്രധാനമന്ത്രി നരേന്ദ്രമോഡി ഇന്നു നാടിനു സമര്പ്പിക്കും, ഇന്ന് ഉദ്ഘാടന സര്വ്വീസ് മാത്രം, സാധാരണ സര്വ്വീസ് തിങ്കളാഴ്ച മുതല്
കൊച്ചി മെട്രോ പ്രധാനമന്ത്രി നരേന്ദ്രമോഡി ഇന്നു രാജ്യത്തിനു സമര്പ്പിക്കുന്നു. രാവിലെ 11നു കലൂര് രാജ്യാന്തര സ്റ്റേഡിയത്തിനു മുന്നിലെ പന്തലില് പ്രധാനമന്ത്രി നരേന്ദ്ര മോദി കേരളത്തിലെ ഈ ആദ്യ മെട്രോ റെയില് സര്വീസ് ജനങ്ങള്ക്കു തുറന്നുകൊടുക്കും. രാവിലെ 10.35നു പ്രധാനമന്ത്രിയും വിശിഷ്ടാതിഥികളും പാലാരിവട്ടം സ്റ്റേഷനില്നിന്നു പത്തടിപ്പാലം വരെയും തിരിച്ചും മെട്രോയില് സഞ്ചരിച്ച ശേഷമായിരിക്കും ഉദ്ഘാടനം.
ഉദ്ഘാടന സമ്മേളനത്തില് കേന്ദ്ര നഗരവികസന മന്ത്രി വെങ്കയ്യ നായിഡു, ഗവര്ണര് ജസ്റ്റിസ് പി.സദാശിവം, മുഖ്യമന്ത്രി പിണറായി വിജയന്, മന്ത്രി തോമസ് ചാണ്ടി, കെ.വി.തോമസ് എംപി, മേയര് സൗമിനി ജയിന്, പ്രതിപക്ഷ നേതാവ് രമേശ് ചെന്നിത്തല, ഡിഎംആര്സി മുഖ്യ ഉപദേഷ്ടാവ് ഇ.ശ്രീധരന്, കെഎംആര്എല്! മാനേജിങ് ഡയറക്ടര് ഏലിയാസ് ജോര്ജ് എന്നിവരും പങ്കെടുക്കും.
കേരളത്തില് നിന്നുള്ള എല്ലാ എംപിമാര്ക്കും എംഎല്എമാര്ക്കും ചടങ്ങിലേക്കു ക്ഷണക്കത്തു നല്കിയിട്ടുണ്ട്. ഫ്രഞ്ച്, ജര്മന് കോണ്സുലേറ്റ് ജനറല്മാരും ഇന്ത്യയിലെ ഫ്രഞ്ച് അംബാസഡറും ചടങ്ങില് പങ്കെടുക്കും. കൊച്ചി മെട്രോയും ആക്സിസ് ബാങ്കുമായി ചേര്ന്നു പുറത്തിറക്കുന്ന 'കൊച്ചി വണ്' ടിക്കറ്റ് – ഡെബിറ്റ് കാര്ഡിന്റെ ഉദ്ഘാടനവും ചടങ്ങില് നിര്വഹിക്കും. ആക്സിസ് ബാങ്ക് എംഡി ശിഖ ശര്മ, മെട്രോയ്ക്കു വിദേശവായ്പ നല്കിയ ഫ്രഞ്ച് വികസന ഏജന്സി(എഎഫ്ഡി)യുടെ ഇന്ത്യയിലെ മേധാവി നിക്കോളാസ് ഫെര്ണേജ് എന്നിവരും ചടങ്ങിനെത്തും.
ആലുവ മുതല് തൃപ്പൂണിത്തുറ വരെയാണു മെട്രോയുടെ ഒന്നാം ഘട്ടമെങ്കിലും പാലാരിവട്ടം വരെയുള്ള ഭാഗമാണു പൂര്ത്തിയായത്. എംജി റോഡില് മഹാരാജാസ് കോളജ് വരെയുള്ള 18 കിലോമീറ്റര് ദൂരം രണ്ടു മാസത്തിനകം പൂര്ത്തിയാകും; തൃപ്പൂണിത്തുറയിലേക്ക് എത്താന് രണ്ടു വര്ഷവും. കാക്കനാട് ഇന്ഫോ പാര്ക്കിലേക്കുള്ള രണ്ടാംഘട്ട വികസനത്തിനു കേന്ദ്രാനുമതി കാത്തിരിക്കുകയാണ്.
മെട്രോയില് ഇന്ന് ഉദ്ഘാടന സര്വീസ് മാത്രം. നാളെ മെട്രോ റൂട്ടിന് ഇരുവശത്തുമുള്ള വൃദ്ധ സദനങ്ങളിലെയും അഗതി മന്ദിരങ്ങളിലെയും അന്തേവാസികള്ക്കും സ്പെഷന് സ്കൂള് വിദ്യാര്ഥികള്ക്കും സൗജന്യയാത്ര. തിങ്കളാഴ്ച രാവിലെ ആറിന് ആലുവയില്നിന്നും പാലാരിവട്ടത്തുനിന്നും ഒരേസമയം മെട്രോ പതിവു സര്വീസ് ആരംഭിക്കും. ഒന്പതു മിനിട്ട് ഇടവേളയില് ഇരു ഭാഗത്തുനിന്നും സര്വീസുണ്ടാവും. രാത്രി പത്തിന് അവസാന വണ്ടി. മിനിമം യാത്രാനിരക്കു 10 രൂപ. 20, 30, 40 എന്നിങ്ങനെയാണു മറ്റു നിരക്ക്. ഇടപ്പള്ളി, പാലാരിവട്ടം വരെ 40 രൂപ നിരക്ക്.
മെട്രോ യാത്രയ്ക്കുള്ള ടിക്കറ്റ് സ്റ്റേഷനില്നിന്നു ലഭിക്കും. കൊച്ചി വണ് കാര്ഡ് ഇന്നു പുറത്തിറക്കുന്നതോടെ ഈ കാര്ഡ് ഉപയോഗിച്ചും യാത്ര ചെയ്യാം. ടിക്കറ്റ് കാര്ഡും ക്രെഡിറ്റ് കാര്ഡും ചേര്ന്നതാണിത്.
https://www.facebook.com/Malayalivartha
