പകരക്കാരെവിട്ട്‌ ചുമതലക്കാര്‍ ഉറങ്ങും! കേരളം തോല്‍ക്കും ഇതു നമ്മുടെ മാത്രം വിധി!
കേന്ദ്രസര്‍ക്കാര്‍ വിളിച്ചുചേര്‍ക്കുന്ന പ്രധാനയോഗങ്ങളില്‍ പകരക്കാരെ അയക്കുന്ന കേരളത്തിന്റെ തനതു ശൈലിയാണ്‌ അണക്കെട്ടുകളടെ ഉടമസ്ഥാവകാശ തര്‍ക്കത്തില്‍ കേരളത്തിന്‌ വിനയായത്‌. മുഖ്യമന്ത്രി പങ്കെടുക്കേണ്ട യോഗങ്ങളില്‍ സാധാരണ മന്ത്രിമാരാണ്‌ പങ്കെടുക്കാറുളളത്‌. ചീഫ്‌സെക്രട്ടറി പങ്കെടുക്കാനുളള യോഗങ്ങളില്‍ അഡീഷണല്‍ സെക്രട്ടറി പങ്കെടുക്കും. അഡീഷണല്‍ സെക്രട്ടറിമാര്‍ക്ക്‌ കേന്ദ്രമന്ത്രിമാരുടെ മുന്നില്‍ വിഷയം അവതരിപ്പിക്കാന്‍ സാധാരണ കഴിയാറില്ല. അവതരിപ്പിക്കാന്‍ ശ്രമിച്ചാല്‍തന്നെ പങ്കെടുക്കാന്‍ നിര്‍ദേശിച്ചവര്‍ പങ്കെടുക്കാതിരിക്കുന്നതിനു കാരണം അവര്‍ കേള്‍ക്കാന്‍ തയ്യാറാവുകയുമില്ല. ഇംഗ്ലീഷ്‌ ഭാഷ നന്നായി കൈകാര്യം ചെയ്യാന്‍ കഴിയാത്തതും വിനയാകും.
കഴിഞ്ഞവര്‍ഷം ഡല്‍ഹിയില്‍ നടന്ന ദേശീയഡാം സുരക്ഷാസമിതിയുടെ യോഗത്തില്‍ പങ്കെടുക്കേണ്ടിയിരുന്നത്‌ കെ.ആര്‍ .ഡി.ബി ചീഫ്‌ എഞ്ചിനിയര്‍ മഹാദേവനായിരുന്നു. 2013 ഡിസംബര്‍ 27 നാണ്‌ യോഗം നടന്നത്‌. യോഗത്തില്‍ അണക്കെട്ടുകള്‍ സംബന്ധിച്ച്‌ വിശദമായ ചര്‍ച്ച നടന്നില്ലെന്നാണ്‌ മഹാദേവന് പകരം പങ്കെടുത്ത ചീഫ്‌ എഞ്ചിനിയര്‍ ലതികയുടെ പക്ഷം. യോഗത്തിന്റെ മിനിറ്റ്‌സ്‌ കിട്ടിയപ്പോഴാണ്‌ താന്‍ ഇക്കാര്യം അറിഞ്ഞതെന്ന്‌ ലതിക പറയുന്നു. യോഗത്തിന്റെ മിനിറ്റ്‌സ്‌ കിട്ടുമ്പോഴാണ്‌ വിവരം അറിഞ്ഞതെങ്കില്‍ യോഗത്തില്‍ ലതിക പങ്കെടുത്തില്ലെന്ന്‌ കരുതേണ്ടിവരും. മിനിറ്റ്‌സ്‌ തിരുത്തണമെന്നാവശ്യപ്പെട്ട്‌ കേരളം കത്തയച്ചിട്ടും നടപടിയുണ്ടായില്ലെന്നും ലതിക കുറ്റപ്പെടുത്തുന്നു. മിനിറ്റ്‌സിലൊന്നും കഥയില്ലെന്ന്‌ പറയാനും ലതിക മറന്നില്ല. അബദ്ധം പറ്റുമ്പോള്‍ അങ്ങനെയാണ്‌. സ്വന്തം കുറ്റം മറച്ചുപിടിക്കും. എന്നാല്‍ ഉദ്യോഗസ്ഥയുടെ വാക്കുകള്‍ വിശ്വാസത്തിലെടുക്കാമോ എന്ന ചോദ്യമാണ്‌ പ്രതിപക്ഷം ഉന്നയിക്കുന്നത്‌.
തമിഴ്‌നാട്‌ നാലു മണിക്കൂര്‍ കൊണ്ട്‌ തങ്ങളുടെ ലക്ഷ്യം നേടിയിട്ടും കേരളം അനങ്ങിയതേയില്ല. ലതിക മഹാദേവനേയും മഹാദേവന് ലതികയേയും കുറ്റം പറഞ്ഞുകൊണ്ടിരിക്കുന്നു. പാലം കുലുങ്ങിയാലും കേളന്‍ കുലുങ്ങില്ല എന്ന പഴഞ്ചൊല്ലിനെ അന്വര്‍ത്ഥമാക്കി മുഖ്യമന്ത്രി മിണ്ടാതിരുന്നു. ഇപ്പോഴും മിണ്ടാതിരിക്കുന്നു.
അണക്കെട്ടിന്റെ ഉടമസ്ഥാവകാശം തമിഴ്‌നാട്‌ നേടിയെടുത്തെങ്കിലും അത്‌ സ്ഥിരമായി നിലനിര്‍ത്താന്‍ സാധ്യതയില്ല. എന്നാല്‍ കേരളത്തെ പ്രതിസന്ധിയിലാക്കാന്‍ ഇതുമതി. ഇനി ഡാം സുരക്ഷാസമിതി മറ്റൊരു തീരുമാനമെടുത്താല്‍ തമിഴ്‌നാട്‌ അക്കാര്യം കോടതിയില്‍ ചോദ്യം ചെയ്യും. കോടതി ദേശീയ സുരക്ഷാസമിതിയുടെ അഭിപ്രായം ശരിവച്ചാല്‍ കേരളം വീണ്ടും പ്രതിസന്ധിയിലാകും. ചെയ്യേണ്ടത്‌ ചെയ്യേണ്ട സമയത്ത്‌ ചെയ്യണമെന്ന ഗുണപാഠമാണ്‌ ഇതിലൂടെ കേരളത്തിനു ലഭിക്കുന്നത്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
