പിന്‍സീറ്റിലെ സീറ്റ് ബെല്റ്റ്; സര്‍ക്കുലര്‍ പിന്‍വലിക്കുമെന്ന്‌ തിരുവഞ്ചൂര്‍
വാഹനത്തിന്റെ പിന്‍സീറ്റിലിരിക്കുന്നവര്‍ക്ക്‌ സീറ്റ്ബെല്റ്റ് നിര്‍ബന്ധമാക്കിയ ഗതാഗതവകുപ്പിന്റെ സര്‍ക്കുലര്‍ പിന്‍വലിക്കുമെന്ന്‌ ഗതാഗതമന്ത്രി തിരുവഞ്ചൂര്‍ രാധാകൃഷ്‌ണന്‍. ഗതാഗത കമ്മീഷണറുടെ ഉത്തരവ്‌ അപ്രായോഗികമാണെന്നും അദ്ദേഹം നിയമസഭയെ അറിയിച്ചു.
പിന്‍സീറ്റിലിരിക്കുന്നവര്‍ക്ക്‌ സീറ്റ്ബെല്റ്റ് നിര്‍ബന്ധമാക്കുന്നത്‌ പ്രായോഗികമല്ലെന്നു കാണിച്ച്‌ കെ. ശിവദാസന്‍ നായര്‍ നിയമസഭയില്‍ നടത്തിയ സബ്‌മിഷനു മറുപടി പറയുകയായിരുന്നു മന്ത്രി. ഇത്തരത്തില്‍ കേസെടുക്കാന്‍ പോയാല്‍ എല്ലാവര്‍ക്കുമെതിരേ കേസെടുക്കേണ്ടി വരും. ജനങ്ങളുടെ ബുദ്ധിമുട്ട്‌ മനസിലാക്കിയാണ്‌ സര്‍ക്കുലര്‍ പിന്‍വലിക്കാന്‍ തീരുമാനിച്ചതെന്നും തിരുവഞ്ചൂര്‍ അറിയിച്ചു.
കഴിഞ്ഞ ആഴ്ചയാണ് സീറ്റ് ബെല്റ്റ് ഘടിപ്പിച്ച വാഹനങ്ങളില്‍ യാത്ര ചെയ്യുന്നവര്‍ക്കും സീറ്റ്ബെല്റ്റ് നിര്‍ബന്ധമാക്കി ട്രാന്‍സ്‌പോര്‍ട്ട് കമീഷണര്‍ ഋഷിരാജ്‌സിങ് ഉത്തരവിട്ടത്. കേന്ദ്രമോട്ടോര്‍ വാഹനചട്ടം 138 (3) പ്രകാരമാണിത്. യാത്രക്കാര്‍ സീറ്റ് ബെല്റ്റ് ധരിച്ചാണോ യാത്ര ചെയ്യുന്നതെന്ന് പരിശോധിക്കാന്‍ എല്ലാ റീജിയണല്‍ ട്രാന്‍സ്‌പോര്‍ട്ട് ഓഫിസര്‍മാര്‍ക്കും കമ്മീഷണര്‍ നിര്‍ദേശം നല്‍കിയിരുന്നു.സീറ്റ് ബെല്റ്റ് ധരിക്കുകയാണെങ്കില്‍ അപകടത്തിലുണ്ടാകുന്ന ആഘാതം 95 ശതമാനത്തോളം കുറക്കാന്‍ കഴിയുമെന്ന വിദഗ്ധരുടെ അഭിപ്രായത്തെ തുടര്‍ന്നായിരുന്നു തീരുമാനം.
കേന്ദ്രമന്ത്രി ഗോപിനാഥ്‌ മുണ്ടെ വാഹനാപകടത്തില്‍ മരിച്ച സാഹചര്യത്തിലാണ്‌ പിന്‍സീറ്റിലിരിക്കുന്നവര്‍ക്കും സീറ്റ്ബെല്റ്റ് നിര്‍ബന്ധമാക്കാന്‍ തീരുമാനിച്ചത്‌.
https://www.facebook.com/Malayalivartha
