അനാഥാലയങ്ങളുടെ പേരില്‍ ചെന്നിത്തലയെ സിദ്ധിഖ്‌ വളച്ചുപിടിച്ചു
അനാഥാലയങ്ങളുടെ പേരില്‍ ആദ്യമായി എ ഐ ഗ്രൂപ്പ്‌ കോണ്‍ഗ്രസുകാര്‍ കൊമ്പുകോര്‍ത്തു. ഉമ്മന്‍ചാണ്ടിയുടെ വിശ്വസ്‌തനായ കെ.പി.സി.സി ജനറല്‍ സെക്രട്ടറി ടി. സിദ്ധിഖാണ്‌ രമേശ്‌ ചെന്നിത്തലയെ പരസ്യമായി വിമര്‍ശിച്ച്‌ രംഗത്തെത്തിയത്‌. കോഴിക്കോട് എസ്.കെ.എസ്.എസ്.എഫ് സംഘടിപ്പിച്ച സെമിനാറിലായിരുന്നു സിദ്ധിഖിന്റെ വിമര്‍ശനം. അനാഥാലയങ്ങളിലെ കുട്ടിളെ കടത്തല്‍ വിഷയത്തില്‍ മനുഷ്യകടത്തിന്റെ വകുപ്പ്‌കൂടി ചേര്‍ത്തത്‌ അജണ്ടയാണെന്ന്‌ സിദ്ധിഖ്‌ തുറന്നടിച്ചു. ഐ പി സി 370 (3) വകുപ്പ്‌ പ്രകാരം കേസെടുത്ത നടപടി പിന്‍വലിക്കണമെന്നും ഇത്തരത്തില്‍ കേസെടുക്കാന്‍ തീരുമാനിച്ച സാഹചര്യം പരിശോധിക്കണമെന്നും സിദ്ധിഖ്‌ ആവശ്യപ്പെട്ടു. സിദ്ധിഖിന്റെ സാന്നിധ്യത്തില്‍ മുസ്ലീം പണ്‌ഡിതരുടെ സംഘടനയായ സമസ്‌ത രമേശ്‌ ചെന്നത്തലക്കെതിരെ ആഞ്ഞടിച്ചു.
ജാമ്യം ലഭിക്കാത്ത വകുപ്പുകള്‍ ചേര്‍ത്തത്‌ ഗൗരവപരമാണെന്നും സിദ്ധിഖ്‌ ആവര്‍ത്തിച്ചു. ഉത്തരവാദപ്പെട്ട ജനപ്രതിനിധികള്‍ ആരുടെയും മെഗാഫോണാകരുതെന്നും ചടങ്ങില്‍ സംസാരിച്ച മുസ്ലീം നേതാക്കള്‍ ആവര്‍ത്തിച്ചു. പോലീസ് നല്‍കിയ എഫ്. ഐ. ആര്‍ നോക്കി മന്ത്രി സംസാരിക്കുകയായിരുന്നുവെന്ന്‌ കേരള ഹജ്‌ കമ്മറ്റിയുടെ ചെയര്‍മാന്‍ കോട്ടുമലടി ബാപ്പു മുസലിയാര്‍ ആവര്‍ത്തിച്ചു. കുട്ടികളെ കൊണ്ടുവരുന്നതിനെ ദുര്‍വ്യാഖ്യാനിച്ചതാണെന്നും അദ്ദേഹം പറഞ്ഞു.
ഇതിനിടെ അനാഥാലയത്തിന്റെ വിഷയത്തില്‍ രമേശിന്റെ ആവേശം അസ്‌തമിച്ചു. അനാഥാലയങ്ങളെക്കുറിച്ച്‌ താനൊന്നും സംസാരിക്കില്ലെന്നും ഇതുവരെ സംസാരിച്ചുതുതന്നെ അധികമാണെന്നും അദ്ദേഹം പറഞ്ഞു. സമസ്‌ത രമേശിനെതിരെ തിരിഞ്ഞ പശ്ചാത്തലത്തിലായിരുന്നു അദ്ദേഹം മാറി ചിന്തിച്ചത്‌. സമസ്‌തയെ പിണക്കിയാല്‍ അത്‌ ഒരു സമുദായത്തെ മുഴുവന്‍ പിണക്കുന്നതിന്‌ തുല്യമാണെന്ന്‌ അഭ്യുദയകാംക്ഷികള്‍ രമേശിനെ ഉപദേശിച്ചു.
അനാഥാലയ വിഷയത്തിലുളള തന്റെ ഇടപെടലുകള്‍ ലീഗും ഉമ്മന്‍ചാണ്ടിയും തമ്മിലുളള ബന്ധം ഊട്ടിയുറപ്പിക്കാന്‍ സഹായിച്ചു എന്നും രമേശിന്‌ മനസിലായി. ഭാവിയില്‍ മുഖ്യമന്ത്രയാകാനുളള അവസരമാണ്‌ താന്‍ കളഞ്ഞതെന്നും രമേശ്‌ മനസിലാക്കി. ഇമേജ്‌ നേടാനുളള തന്ത്രപാടിലാണ്‌ ഇത്തരം അബദ്ധങ്ങള്‍ സംഭവിച്ചതെന്നും രമേശ്‌ മനസിലാക്കി. ഓപ്പറേഷന്‍ കുബേര നടത്തുന്നതുപോലെയല്ല അനാഥാലയങ്ങളെ ക്കുറിച്ച്‌ അന്വേഷിക്കുന്നതെന്ന്‌ രമേശ്‌ മനസിലാക്കിയപ്പോള്‍ വൈകിപോയി. ഇത്തരം വിവാദങ്ങള്‍ പ്രത്യേകിച്ച്‌ ഒരു നേതാവിന്‌ യോചിച്ചതല്ലെന്നും അടുത്തസുഹൃത്തുക്കള്‍ രമേശിനെ ഉപദേശിച്ചു. സമസ്‌തയെ അവഗണിച്ച്‌ ലീഗിന്‌ തീരുമാനമെടുക്കാനാവില്ല. ഇക്കാര്യം ലീഗ്‌ വൃത്തങ്ങള്‍ രമേശിനെ അറിയിച്ചിട്ടുമുണ്ട്‌. അതേസമയം രമേശിനെതിരെ ലീഗിനെ എതിരാക്കാന്‍ എ ഗ്രൂപ്പ്‌ ശ്രമങ്ങള്‍ ആരംഭിച്ചു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
