നടി എതിര്ത്താല് എന്ത് ചെയ്യണമെന്ന് ദിലീപ് നിര്ദേശം നല്കി- പോലീസ്
നടിയെ ആക്രമിക്കാനും അത് പിഴവില്ലാതെ നടപ്പാക്കാനും കരുനീക്കിയത് ദിലീപാണെന്ന് അന്വേഷണസംഘം. ആക്രമിച്ച് ദൃശ്യങ്ങള് പകര്ത്തുന്നത് നടി എതിര്ത്താല് തുടര്ന്ന് എന്ത് ചെയ്യണമെന്നും സുനില്കുമാറിന് (പള്സര് സുനി) കൃത്യമായ നിര്ദേശം നല്കിയത് ദിലീപാണെന്നും പൊലീസ് വ്യക്തമാക്കി. അങ്കമാലി മജിസ്ട്രേട്ട് കോടതിയില് ദിലീപിന്റെ ജാമ്യാപേക്ഷയുടെ അന്തിമവാദത്തിനിടെയാണ് പ്രോസിക്യൂഷന് തെളിവുകള് നിരത്തിയത്. വാദം പൂര്ത്തിയായി. 18ന് വിധി പറയും. അടച്ചിട്ട മുറിയിലായിരുന്നു കോടതിനടപടികള്. നടിയെ ആക്രമിച്ച കേസിലെ ഗൂഢാലോചന കുറ്റത്തിന് ജയിലില് കഴിയുന്ന ദിലീപിന്റെ റിമാന്ഡ് 28 വരെ നീട്ടി. ശനിയാഴ്ചയായിരുന്നു റിമാന്ഡ് കാലാവധി തീരുന്ന ദിവസം.
നടിയെ ആക്രമിക്കുന്ന ദൃശ്യങ്ങള് പകര്ത്താനും അത് ഏത് ദിശയില് പിടിക്കണമെന്നും ദിലീപ് സുനില്കുമാറിന് നിര്ദേശം നല്കി. വിവാഹമോതിരത്തിന്റെയും നടിയുടെ കഴുത്തിന്റെയും ദൃശ്യങ്ങള് പകര്ത്താനും ആവശ്യപ്പെട്ടു. ദൃശ്യങ്ങള് പകര്ത്തുന്നത് തടഞ്ഞാല് തുടര്ന്ന് എന്ത് ചെയ്യണമെന്നും പറഞ്ഞുകൊടുത്തു. പിഴവില്ലാതെ നടിയെ ആക്രമിക്കുന്നതും ദൃശ്യങ്ങള്”പകര്ത്തുന്നതുമടക്കം എല്ലാ കാര്യങ്ങളും സുനിയെ ബോധ്യപ്പെടുത്തിയ ദിലീപ്, സംഭവത്തിനുശേഷം സുനിയുമായി നേരിട്ട് ബന്ധപ്പെടാതിരിക്കാനും ശ്രദ്ധിച്ചിരുന്നുവെന്ന് പൊലീസ് കണ്ടെത്തി.
ആരോഗ്യനില തൃപ്തികരമല്ലാത്തതിനാല് സംവിധായകന് നാദിര്ഷയെ വീണ്ടും ചോദ്യം ചെയ്യാനായില്ല. ഹൈക്കോടതി നിര്ദേശപ്രകാരം വെള്ളിയാഴ്ച ചോദ്യംചെയ്യലിന് പൊലീസ് ക്ളബ്ബില് എത്തിയ നാദിര്ഷയ്ക്ക് ദേഹാസ്വാസ്ഥ്യം അനുഭവപ്പെട്ടതിനാല് ചോദ്യം ചെയ്യല് മാറ്റിവയ്ക്കുകയായിരുന്നു. ഞായറാഴ്ച ചോദ്യം ചെയ്തേക്കും.
https://www.facebook.com/Malayalivartha
