നടിയെ ആക്രമിച്ച കേസില്‍ ദിലീപിന് ജാമ്യം കിട്ടാത്തതോടെ ആകെ സങ്കടത്തിലാണ് കാവ്യയും കുടുംബവും. ശബരിമലയില്‍ പോകാനായി മാലയിട്ടിരിക്കുന്ന ദിലീപിന് കുറേനാള്‍ വ്രതം നോക്കേണ്ടി വരും. അങ്കമാലി മജിസ്‌ട്രേറ്റ് കോടതി രണ്ടാം തവണയാണ് ദിലീപിന് ജാമ്യം നിഷേധിച്ചത്. നേരത്തെ ഹൈക്കോടതി രണ്ട് തവണ ജാമ്യം നിഷേധിച്ചിരുന്നു. വീണ്ടും ഹൈക്കോടതിയിലേക്ക് ജാമ്യത്തിനായി പോകുകയാണ് ദിലീപ്. എന്നാല്‍ ജാമ്യം കിട്ടാന്‍ സാധ്യത വിരളമാണ്. 

ജാമ്യം കിട്ടുമെന്ന വളരെ പ്രതീക്ഷയിലായിരുന്നു കാവ്യയും ബന്ധുക്കളും. പക്ഷെ കോടതി വിധി എതിരായതോടെ കാവ്യയുടെ ഭാവിയാണിനി അറിയേണ്ടത്. കാവ്യമുന്‍കൂര്‍ ജാമ്യ ഹര്‍ജിയാണ് ഏറ്റവും പ്രധാനം. 

കേസ് അന്വേഷണം അന്തിമ ഘട്ടത്തിലാണെന്നും ദിലീപിന് ജാമ്യം നല്‍കിയാല്‍ സാക്ഷികളെ സ്വാധീനിക്കാന്‍ കാരണമാകുമെന്നുമുള്ള പ്രോസിക്യൂഷന്‍ നിലപാട് അങ്കമാലി മജിസ്‌ട്രേറ്റ് കോടതി അംഗീകരിക്കുകയായിരുന്നു.

ദിലീപിനെതിരെ കൂടുതല്‍ തെളിവുകള്‍ പ്രോസിക്യൂഷന്‍ കോടതിയില്‍ സമര്‍പ്പിച്ചു. രാത്രി 10 മണിയോട് കൂടി രമ്യാ നമ്പീശന്റെ വീട്ടിലേക്ക് ദിലീപ് വിളിച്ചത് സംശയാസ്പദം. സംഭവം നടന്ന ദിവസമാണ് ദിലീപ് ലാല്‍ഡ് ഫോണിലേക്ക് വിളിച്ചത്. സംഭവം നടന്ന ദിവസം രാത്രി 12.30 വരെ ദിലീപ് പലരുമായും സംസാരിച്ചിരുന്നതായി പ്രോസിക്യൂഷന്‍ കോടതിയെ അറിയിച്ചു.

ഇരുപത് വര്‍ഷം വരെ തടവുശിക്ഷ ലഭിക്കാവുന്ന കുറ്റമാണ് ദിലീപിനെതിരെ ചുമത്തിയത്. ദിലീപിനെതിരെ കൂട്ടമാനഭംഗം അടക്കമുള്ള കുറ്റങ്ങള്‍ നിലനില്‍ക്കും. അന്വേഷണം പൂര്‍ത്തിയാക്കാന്‍ 90 ദിവസം വരെ സമയമുണ്ട്. പള്‍സര്‍ സുനി ചെയ്ത കുറ്റങ്ങള്‍ക്കെല്ലാം ദിലീപും ഉത്തരവാദിയാണെന്ന് പ്രോസിക്യൂഷന്‍ പറഞ്ഞു.

അതേസമയം നാദിര്‍ഷ സമര്‍പ്പിച്ച മുന്‍കൂര്‍ ജാമ്യാപേക്ഷയുടെ വിധി പറയുന്നത് ഹൈക്കോടതി നാളത്തേക്ക് മാറ്റി. സാങ്കേതിക കാരണങ്ങളാലാണ് വിധി പറയുന്നത് മാറ്റിയത്. ദിലീപിന്റെ ഭാര്യയും നടിയുമായ കാവ്യാ മാധവന്‍ ഇതേ കേസില്‍ സമര്‍പ്പിച്ച മുന്‍കൂര്‍ ജാമ്യാപേക്ഷയില്‍ കോടതി വിധി ഇന്നുണ്ടാകും.

കേസില്‍ കാവ്യയെ പ്രതി ചേര്‍ക്കേണ്ട സാഹചര്യം നിലവിലില്ലെന്ന് പൊലീസ് വ്യക്തമാക്കിയിരുന്നു. പക്ഷേ കേസില്‍ നാദിര്‍ഷയ്ക്കും കാവ്യയ്ക്കുമെതിരായ അന്വേഷണം പൊലീസ് തുടരും. ഇരുവരെയും പൊലീസ് ചോദ്യം ചെയ്തിരുന്നു. നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിയെ അറിയില്ലെന്ന നിലപാടിലാണ് ഇരുവരും.

ദിലീപ് നാലാം തവണയാണ് ജാമ്യാപേക്ഷയുമായി കോടതിയെ സമീപിച്ചത്. കേസിലെ വാദം നേരത്തെ പൂര്‍ത്തിയായിരുന്നു.ശനിയാഴ്ചയാണ് ജാമ്യാപേക്ഷയില്‍ വാദം പൂര്‍ത്തിയായത്. നടിയെ ആക്രമിക്കാന്‍ മുഖ്യപ്രതി പള്‍സര്‍ സുനിയുമായി ദിലീപ് ഗൂഢാലോചന നടത്തിയതിന് വ്യക്തമായ തെളിവുകളുണ്ടെന്നാണ് പ്രോസിക്യൂഷന്‍ കോടതിയില്‍ ബോധിപ്പിച്ചത്. ജാമ്യം ലഭിച്ചാല്‍ പല പ്രധാന തെളിവുകളും നശിപ്പിക്കാന്‍ സാധ്യതയുണ്ടെന്നും ചൂണ്ടിക്കാട്ടിയിരുന്നു.

എന്നാല്‍, സി.ആര്‍.പി.സി 162 പ്രകാരം 60 ദിവസം കഴിഞ്ഞിട്ടും കുറ്റപത്രം നല്‍കാത്തതും ആദ്യ കുറ്റ പത്രത്തില്‍ നഗ്‌നദൃശ്യങ്ങള്‍ പകര്‍ത്താന്‍ മാത്രമാണ് ഗൂഢാലോചന നടത്തിയതായി ആരോപണമുള്ളതെന്നും അതിനാല്‍ ജാമ്യത്തിന് അര്‍ഹതയുണ്ടെന്നുമാണ് പ്രതിഭാഗത്തിന്റെ വാദം.