പ്രതീക്ഷയോടെ ബിജെപി... ജനരക്ഷായാത്രയ്ക്ക് ഇന്ന് തുടക്കം, വന്സുരക്ഷയില് അമിത് ഷാ യാത്ര ഉദ്ഘാടനം ചെയ്യും
ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിക്കുന്ന ജനരക്ഷായാത്രയ്ക്ക് ഇന്ന് തുടക്കമാകും. രാവിലെ 10ന് പയ്യന്നൂര് പുതിയ ബസ് സ്റ്റാന്ഡില് ബിജെപി ദേശീയ അധ്യക്ഷന് അമിത്ഷാ ഉദ്ഘാടനം ചെയ്യും. ആദ്യദിവസം പയ്യന്നൂര് മുതല് പിലാത്തറവരെയാണ് യാത്ര.
ഈ പദയാത്രയില് അമിത്ഷാ പങ്കെടുക്കും. കേന്ദ്ര മന്ത്രി അല്ഫോന്സ് കണ്ണന്താനം, എം.പി.മാരായ സുരേഷ് ഗോപി, റിച്ചാര്ഡ് ഹേ, നളിന്കുമാര് കട്ടീല്, ബിജെപി അഖിലേന്ത്യാ സെക്രട്ടറി എച്ച്.രാജ, വി.മുരളീധരന്, വിവിധ സംസ്ഥാനങ്ങളില് നിന്നുള്ള നേതാക്കന്മാര് തുടങ്ങിയവര് ഉദ്ഘാടന ചടങ്ങില് പങ്കെടുക്കും.
തിങ്കളാഴ്ച രാത്രിയാണ് അമിത് ഷാ കേരളത്തിലെത്തിയത്. ബേക്കലില് എത്തി അവിടെ തങ്ങുന്ന അമിത് ഷാ ഇന്ന് രാവിലെ ഒന്പതുമണിയോടെ റോഡ് മാര്ഗം പയ്യന്നൂരിലെത്തും. ഇതിനുമുന്പ് തളിപ്പറമ്പ് രാജരാജേശ്വര ക്ഷേത്രത്തില് ദര്ശനം നടത്തും. രാവിലെ 10ന് നടക്കുന്ന ഉദ്ഘാടന സമ്മേളനം 12 മണിയോടെ അവസാനിക്കും. ഉച്ചഭക്ഷണത്തിനുശേഷം വൈകീട്ട് മൂന്നിന് ഗാന്ധി പാര്ക്കിലെ ഗാന്ധി പ്രതിമയില് പുഷ്പാര്ച്ചന നടത്തിക്കൊണ്ടാണ് അമിത്ഷാ ജനരക്ഷായാത്ര ഉദ്ഘാടനം ചെയ്യുക. അമിത്ഷായുടെ വരവ് പ്രമാണിച്ച് വന് സുരക്ഷാ സന്നാഹത്തിനു നടുവിലാണ് തിങ്കളാഴ്ച മുതല് പയ്യന്നൂര്.
ഹരിയാനയില് നിന്നുള്ള എം.പി.മാരും എം.എല്.എമാരും നേതാക്കളും അടങ്ങുന്ന നൂറ്് പേര് ആദ്യ ദിവസത്തെ പദയാത്രയില് പങ്കെടുക്കുന്നുണ്ട്. ഓരോ ദിവസവും വിവിധ സംസ്ഥാനങ്ങളില്നിന്നുള്ള സംഘം പദയാത്രയില് അണിചേരും. 300 സ്ഥിരാംഗങ്ങള് ജാഥയില് ഉണ്ടാകും.
സംസ്ഥാന ജനറല് സെക്രട്ടറിമാരായ കെ.സുരേന്ദ്രന്, ശോഭ സുരേന്ദ്രന്, എ.എന്.രാധാകൃഷ്ണന്, എം.ടി.രമേശ് എന്നിവര് യാത്രയിലുണ്ട്. യാത്ര നയിക്കുന്ന കുമ്മനം രാജശേഖരന് ഇന്നലെ രാവിലെ മുതല് തന്നെ പയ്യന്നൂരിലുണ്ട്. കാസര്ഗോഡ് ജില്ലയില് നിന്നുള്ളവര് ആദ്യദിവസം പയ്യന്നൂര് മുതല് പിലാത്തറ വരെയുള്ള യാത്രയില് പങ്കെടുക്കും. പയ്യന്നൂര് ശ്രീപ്രഭാ ഓഡിറ്റോറിയത്തില് 10,000 പേര്ക്ക് ഉച്ചഭക്ഷണമൊരുക്കും. ദൂരെനിന്ന് എത്തുന്ന പ്രവര്ത്തകര്ക്കുവേണ്ടിയാണിത്. 20 കൗണ്ടറുകളിലായി വെജിറ്റബിള് ബിരിയാണിയാണ് വിതരണം ചെയ്യുക.
പയ്യന്നൂര് ടൗണിലെ മൂന്ന് കേന്ദ്രങ്ങളില്നിന്ന് തുടങ്ങി സെന്ട്രല് ബസാറില് സംഗമിച്ചാണ് ജാഥ പ്രയാണം തുടങ്ങുക. പയ്യന്നൂരില്നിന്ന് ആരംഭിക്കുന്ന യാത്ര ഏഴിലോട്ട് അരമണിക്കൂര് വിശ്രമിക്കും. ആറുമണിക്ക് പിലാത്തറയിലെത്തുകയും തുടര്ന്ന് പൊതുയോഗം നടക്കും.
https://www.facebook.com/Malayalivartha
