കെപിസിസിയുടെ പുതിയ പട്ടികയില്‍ ഇടംനേടിയത് 145 പുതുമുഖങ്ങള്‍. 45 വയസ്സില്‍ താഴെയുള്ള 48 പേരും ദലിത് പ്രതിനിധികളായി 20 പേരുമാണ് പട്ടികയില്‍ ഇടംനേടിയിരിക്കുന്നത്. ആദ്യം നല്‍കിയ പട്ടികയില്‍നിന്ന് 25 പേരെയാണ് ഒഴിവാക്കിയത്. രാജ്‌മോഹന്‍ ഉണ്ണിത്താന് കൊല്ലം കുണ്ടറ ബ്ലോക്കില്‍ നിന്ന് അംഗത്വം നല്‍കി.

വനിതാ, പട്ടികജാതി – വര്‍ഗ പ്രാതിനിധ്യം മെച്ചപ്പെടുത്തിയാണു കെപിസിസി പുതിയപട്ടിക സമര്‍പ്പിച്ചത്. വനിതകളുടെ പ്രാതിനിധ്യം 17ല്‍നിന്ന് 28 ആയി ഉയര്‍ന്നു. പത്തുശതമാനമാണ് ദലിത് വിഭാഗങ്ങള്‍ക്കു നല്‍കിയിരിക്കുന്ന പ്രാതിനിധ്യം. അതേസമയം, മുന്‍ സ്പീക്കര്‍ വക്കം പുരുഷോത്തമന്‍ പട്ടികയില്‍ ഇടംനേടിയിട്ടില്ല.

രാജ്‌മോഹന്‍ ഉണ്ണിത്താനെ കോട്ടയം ജില്ലയില്‍നിന്ന് ഉള്‍പ്പെടുത്താനായിരുന്നു ആലോചനയെങ്കിലും സ്വന്തം ബ്ലോക്കായ കൊല്ലത്തെ വടക്കേവിള നിന്നല്ലെങ്കില്‍ സ്ഥാനം വേണ്ടെന്ന നിലപാടിലായിരുന്നു അദ്ദേഹം. എന്നാല്‍ ഉണ്ണിത്താന് കൊല്ലം ജില്ലയില്‍ അംഗത്വം ഇല്ലെന്നാണ് ഗ്രൂപ്പ് നേതൃത്വങ്ങളുടെ മറുവാദം. തൃശൂര്‍ ഡിസിസി പ്രസിഡന്റ് ടി.എന്‍. പ്രതാപന്‍ കെപിസിസി അംഗങ്ങളുടെ പട്ടികയില്‍ ഇടംപിടിച്ചതിനാല്‍ ഡിസിസി ഭാരവാഹികള്‍ കെപിസിസി അംഗങ്ങളാകണ്ടായെന്ന കടുംപിടുത്തവും ഉപേക്ഷിച്ചേക്കുമെന്നാണു പ്രതീക്ഷ.

അതേസമയം, കെപിസിസി അംഗങ്ങളാകാന്‍ യോഗ്യരായ വനിതകള്‍ ഇല്ലെന്നു പറഞ്ഞാല്‍ അംഗീകരിക്കാനാവില്ലെന്നു മഹിളാ കോണ്‍ഗ്രസ് സംസ്ഥാന അധ്യക്ഷ ബിന്ദു കൃഷ്ണ പറഞ്ഞു. പട്ടിക പ്രഖ്യാപിക്കുമ്പോള്‍ കേരളത്തിലെ എല്ലാ ജില്ലകളില്‍നിന്നും അര്‍ഹരായ വനിതകള്‍ക്ക് പ്രാതിനിധ്യം ഉണ്ടാകും. വനിതകള്‍ക്ക് സംവരണം നല്‍കണം എന്നത് കോണ്‍ഗ്രസ് അധ്യക്ഷ സോണിയാ ഗാന്ധിയുടെ നിലപാടാണ്. പട്ടികയില്‍ പേരുള്‍പ്പെടുത്താത്തത് സംബന്ധിച്ച് കേന്ദ്ര തിരഞ്ഞെടുപ്പ് അതോറിറ്റിക്കു പരാതി സമര്‍പ്പിച്ചതായും ബിന്ദു കൃഷ്ണ പറഞ്ഞു.