റബര്‍ വില വീണ്ടും ഇടിയുന്നു. മഴമൂലം ഉല്‍പാദനം കുറഞ്ഞിട്ടും വില ഉയരാത്തതില്‍ കര്‍ഷകരും ആശങ്കയിലാണ്. ഉല്‍പാദനം വര്‍ധിപ്പിക്കണമെന്ന റബര്‍ ബോര്‍ഡിന്റെ ആവശ്യം കര്‍ഷകര്‍ മുഖവിലക്കെടുക്കുന്നുമില്ല. ടാപ്പിങ്ങില്‍നിന്ന് കര്‍ഷകര്‍ പിന്മാറുന്ന സാഹചര്യമാണ് പലയിടത്തും പ്രകടമാകുന്നത്. ഒറ്റയടിക്ക് നാലു രൂപവരെയാണ് കുറഞ്ഞത്. ആര്‍.എസ്.എസ് നാലിന് 129 രൂപയാണ് തിങ്കളാഴ്ചത്തെ വിപണിവില. ആര്‍.എസ്.എസ് നാലിന് 127 ഉം. എന്നാല്‍, കര്‍ഷകര്‍ക്ക് 125 126 വരെ മാത്രമാണ് ലഭിക്കുന്നത്. രാജ്യാന്തര വിപണിയിലും വില കുറയുകയാണ്. ടോക്കിയോയില്‍ 120 രൂപയില്‍നിന്ന് 113 ആയി കുറഞ്ഞു. ചൈനയിലും വിലയില്‍ മാറ്റമില്ല113. ബാങ്കോക്കില്‍ ഇതിലും താഴെയാണ് വില107 108 രൂപ.

വരും ദിവസങ്ങളില്‍ വില വീണ്ടും കുറയുമെന്ന സൂചനയാണ് ലഭിക്കുന്നത്. ആഭ്യന്തര വിപണിയില്‍ ദിവസങ്ങള്‍ക്കുമുമ്പ് 134 രൂപ വരെയായി വില ഉയര്‍ന്നെങ്കിലും വിലയിടിക്കാന്‍ ടയര്‍ കമ്പനികള്‍ നീക്കം ശക്തമാക്കിയതോടെയാണ് 126ല്‍ എത്തിയത്. ടയര്‍ കമ്പനികള്‍ക്കായി 1500 ടണ്‍ മാത്രമാണ് കച്ചവടക്കാര്‍ വാങ്ങിയത്. ഉല്‍പാദനം കുറഞ്ഞിട്ടും വിപണിയില്‍നിന്ന് റബര്‍ വാങ്ങാന്‍ ടയര്‍ കമ്പനികള്‍ ഇനിയും തയ്യാറായിട്ടില്ല. രാജ്യാന്തര വില ഇടിയുന്നതോടെ കൂടുതല്‍ ഇറക്കുമതിക്കുള്ള നീക്കത്തിലാണ് ടയര്‍ ലോബി. വിലയിടിവില്‍ ചെറുകിട കര്‍ഷകരാണ് കടുത്ത പ്രതിസന്ധി നേരിടുന്നത്. വരവും ചെലവും പൊരുത്തപ്പെടാനാകാത്ത അവസ്ഥയും നിലനില്‍ക്കുന്നു.

അസംസ്‌കൃത വസ്തുക്കളുടെ വിലക്കയറ്റവും പ്രതിസന്ധി രൂക്ഷമാക്കുന്നു. വില ഉയരുമെന്ന പ്രതീക്ഷയില്‍ റബര്‍ വന്‍തോതില്‍ സ്‌റ്റോക്ക് ചെയ്ത വ്യാപാരികളും ഇടനിലക്കാരും ദുരിതത്തിലാണ്. ഇറക്കുമതിക്ക് നിലവില്‍ നിയന്ത്രണമൊന്നും ഏര്‍പ്പെടുത്താന്‍ കേന്ദ്രസര്‍ക്കാറും തയ്യാറല്ല. വില വര്‍ധിപ്പിക്കാന്‍ ഇടപെടല്‍ ഉണ്ടാകുമെന്ന വാണിജ്യമന്ത്രാലയത്തിന്റെ പ്രഖ്യാപനവും ജലരേഖയായി.